Prezident İlham Əliyevin təməlini qoyduğu yeni Sumqayıt Azərbaycanda tərəqqi və yüksəlişin əsas ünvanlarından birinə çevrilib

Sumqayıt Şəhər İcra Hakimiyyətinin başçısı Eldar ƏZİZOV: "Sumqayıt Bakıya sürətlə yaxınlaşır. Tək məsafəcə yox, həm də quruculuq və inkişafın dinamikasına görə"

Son illərdə Azərbaycanın bütün bölgələri sosial-iqtisadi inkişaf baxımından mühüm nəticələr əldə edib. Həm regionların tərəqqi dinamikası yüksəlib, həm də genişmiqyaslı abadlıq-quruculuq prosesləri şəhərlərin, qəsəbələrin, kəndlərin mənzərəsini müasirləşdirərək gözəlləşdirib. İnsanların sosial vəziyyətinin davamlı olaraq yaxşılaşdırılması, onların yaşam tərzinin yüksəlməsi də ölkə iqtidarının yürütdüyü inkişaf konsepsiyasının nailiyyətlərindəndir.

Bu inkişaf tendensiyasının özünü daha aydın büruzə verdiyi məkanlardan biri də Sumqayıtdır. Tarixən "gənclər şəhəri" kimi tanıdığımız Sumqayıt indi inkişafının yeni mərhələsinə qədəm qoyub. Hər addımda modernləşmə, yeniləşmə, abadlaşmanın müşahidə olunduğu şəhərdə quruculuğun daha mükəmməl formaları tətbiq olunur və ilkin uğurlu nəticələrini verir. Sumqayıtın artıq paytaxt Bakının standartlarına yaxınlaşdığı da hər addımda görünür.

Elə müsahibimiz Sumqayıt Şəhər İcra Hakimiyyətinin başçısı Eldar ƏZİZOVla söhbətimizə də bu məqamlardan başladıq.

- Eldar müəllim, ilkin müşahidəmiz budur ki, Sumqayıt artıq Bakıya hər mənada yaxınlaşır...

- Əslində, bu bizim fəaliyyətimizdə əsas vəzifələrdən biridir. Daha dəqiq desək, məramımız Sumqayıtı modern, müasir, zövqlü şəhərə çevirməkdir. Amma unutmayaq ki, inkişafın müvafiq meyarları, hədəfləri, məramları və buna uyğun da nəticələri olur. Şübhəsiz, Azərbaycan miqyasında hər bir şəhərin hədəfi də paytaxtın inkişaf tendensiyasına hansısa mənada yaxınlaşmaqdır. Yəni, Bakı bu gün yüksəlişin və quruculuğun ölkə miqyasında əsas meyarıdır. Respublikamızdakı şəhərlər, yaxud rayon mərkəzləri də hansısa küçəsində, məkanında paytaxtın müəyyən elementlərini tətbiq edirlər. Amma bizim qarşımızda dayanan əsas məsələ Sumqayıtı bütünlüklə paytaxtın inkişaf tempinə uyğunlaşdırmaqdır. Bu barədə tapşırıq şəxsən cənab Prezident İlham Əliyev tərəfindən bizə verilib. Ölkə rəhbərinin qarşımızda müəyyənləşdirdiyi vəzifələrin kompleks mahiyyəti məhz budur: Sumqayıt tez bir zamanda Bakı standartlarına yaxınlaşmalıdır.

Ötən ilin iyul ayında möhtərəm Prezidentimiz Sumqayıta gələrkən görülən işlərlə tanış oldu, öz tövsiyə və tapşırıqlarını verdi. Cənab İlham Əliyev vurğuladı ki, "biz şəhərin inkişafına kompleks şəkildə yanaşırıq. Şəhərin inkişafı üçün master plan hazırlanır, onun ilkin əlamətləri artıq var və reallaşır. Mən yeni, müasir yanaşma ilə hesab edirəm ki, bir neçə il ərzində Sumqayıtda çox böyük quruculuq, abadlıq işləri başa çatacaq və şəhər ölkəmizin, bölgənin və bəlkə də dünyanın ən gözəl şəhərlərindən birinə çevriləcəkdir. Bu, bizim hədəfimizdir. Bəzi hallarda qarşıya qoyduğumuz hədəflər çox böyük görünür, ancaq həyat göstərir ki, biz bütün məqsədlərə çatırıq".

Prezidentin bu sözləri bizə həm etimadın göstəricisi idi, həm də qarşımızda daha böyük məsuliyyət müəyyənləşdirirdi. Çünki Prezident bütün layihələrin reallaşdırılmasının konkret müddətlərini müəyyən etməklə faktiki olaraq yeni Sumqayıtın təməlini qoymuşdur. Prezidentin iş üslubu və metodlarına bələd olan adam kimi yaxşı bilirəm ki, əgər o bir söz deyibsə, deməli, elə də olacaqdır.

Diqqəti bir məqama da çəkmək istərdim. Cənab İlham Əliyev zəngin zövqə malik olmaqla yanaşı, həm də tikinti, quruculuq, abadlıq, bir sözlə, şəhərsalma prosesində də mükəmməl təşkilatçı və istiqamətvericidir. Mən hərdən düşünürəm ki, Prezident həm də çox mahir memardır. Çünki hansısa bir layihəyə, - istər park, istər məscid, istərsə də, istehsal müəssisəsi olsun, - nəzər salarkən, hökmən yeni təkliflərini verir, bizim müəyyən hallarda nəzərə almadığımız ən xırda detallar barədə tövsiyələri olur, ən əsası isə hər bir işi yüksək zövqlə, müasir standartlara uyğun tərzdə həyata keçirməyimizi istəyir. Bu cür tələbkarlıq istər-istəməz hər bir məmurun məsuliyyətini daha da artırır. Çünki hesabat verəcəyin və görəcəyin işi təslim alacaq insan məhz cənab İlham Əliyevdir.

Bir sözlə, Prezidentin dəyərli tövsiyələri və birbaşa şəxsi nəzarətinin məntiqi davamı olan maddi dəstəyi nəticəsində "Yeni Sumqayıt" quruculuğunda əsaslı müsbət irəliləyişlər müşahidə olundu. Ötən ilin dekabr ayında möhtərəm Prezidentimiz növbəti dəfə Sumqayıtda olarkən vurğuladı ki, "Sumqayıtı memarlıq baxımından gözəl şəhərə çevirmək üçün artıq konkret proqramlar icra edilir. Mən bu məsələləri nəzarət altında saxlayıram və Sumqayıtı gözəlləşdirmək üçün konkret planlarımız vardır. Mən keçən dəfə də burada olarkən demişəm, Sumqayıtda, memarlıq sahəsində, tikintidə Bakı standartları tətbiq edilməlidir. Bakı bu gün dünyanın ən gözəl şəhərlərindən biridir. Sumqayıt da geri qalmamalıdır".

Yəni, bu, artıq qarşımızda müəyyənləşdirilən yeni vəzifə idi. Bununla da Prezident "Yeni Sumqayıt" quruculuğunun növbəti mərhələsinə start verdi: abadlaşan, gözəlləşən Sumqayıt artıq modern, daha müasir, daha zövqlü metropol standartlarına malik olmalıdır.

Yeni standartları tətbiq etmək, Sumqayıtı Bakı səviyyəsinə çatdırmaq əlbəttə ki, bəzilərinə xülya kimi də görünə bilər. Şübhəsiz, burada müəyyən çətinliklər də olmalıdır. Çünki etiraf etməliyik ki, Bakıya çatmaq asan məsələ deyil. Bu gün Azərbaycanın paytaxtı Avropanın ən çox inkişaf etmiş şəhərləri ilə uğurla rəqabət aparır, bəzi parametrlərə görə isə hətta onlardan üstündür. Bakı özünün min beş yüz illik tarixi ərzində bəlkə də ilk dəfə bu səviyyəyə çatmışdır. Amma Prezidentin qarşımızda müəyyənləşdirdiyi bu tələbi həyata keçirməkdə heç bir tərəddüdümüz, narahatçılığımız yoxdur. Ona görə ki, bütün bu proseslər birbaşa ölkə başçısının şəxsi nəzarətindədir. Bu işlərə cənab İlham Əliyev həm intellektual, həm də praktiki baxımdan rəhbərlik edir.

Azərbaycan Prezidenti fəaliyyətə başlayanda elan etmişdi ki, əsl siyasət real iş və konkret fəaliyyətdən ibarətdir. Bu məram mübaliğəsiz olaraq, cənab İlham Əliyevin fəaliyyət kredosuna çevrilib. Prezidentimizin bütün vədləri necəki əməli işdə gerçəyə çevrilib, əminik ki, Sumqayıtın da genişmiqyaslı inkişafına qısa müddətdə nail olunacaq. Çünki bir daha xatırladıram, Sumqayıtda şəhərin yenidən qurulması prosesi şəxsən cənab İlham Əliyevin rəhbərliyi və nəzarəti altında gedir, buna görə mən inanıram ki, biz ən yaxın zamanlarda Bakı standartlarına uyğunlaşacağıq. Bu prosesin ilkin nəticəsi artıq var: Sumqayıt sürətlə Bakıya yaxınlaşır. Özü də təkcə məsafəcə yox, həm də quruculuq və inkişaf dinamikasına görə.

- Prezidentin Sumqayıta səfərlərinə toxundunuz. Maraqlıdır, bu səfərlərin iqtisadi-sosial aspektdə şəhər üçün hansı nəticələri olub?

- Prezident son bir il ərzində üç dəfə Sumqayıtda olmuşdur. Hər səfər də əlamətdar məqamlarla zəngin idi. Yeni infrastruktur, istehsalat, mədəniyyət, təhsil, sosial, idman obyektlərinin açılışlarında, çoxsaylı təməlqoyma mərasimlərində iştirak etmiş, quruculuq işləri ilə tanış olmuşdur. Hər səfər özü-özlüyündə Prezidentə bir hesabatımız olmaqla yanaşı, həm də yeni layihələrin başlanmasına ölkə rəhbəri tərəfindən verilən xeyir-dua idi.

Amma onu da nəzərə alaq ki, bu səfərlər Prezidentin Sumqayıta münasibətinin yalnız bir məqamıdır. Cənab İlham Əliyev daim Sumqayıtda görülən işlərlə maraqlanır, elə olur ki, həftədə 3-4 dəfə şəhərimizlə bağlı verdiyi tapşırıqların icra vəziyyətini öyrənir, qarşımıza çıxan problemlərin həllinə yardımçı olur. Bu qədər işinin olduğu bir vaxtda, cənab Prezidentin konkret şəhərin problemləri ilə məşğul ola bilməsi adamı həm təəccübləndirir, həm də valeh edir.

Eyni zamanda, Prezident Sumqayıtın abadlaşmasına və quruculuğuna, həmçinin şəhər xəstəxanasının yenidən qurulmasına, Kimya Sənaye parkının yaradılmasına böyük məbləğdə vəsaitlər ayırıb. Prezidentin dəstəyi hər bir sahəni əhatə etdiyindən, Sumqayıtda elə hər bir sahədə də mühüm artım, yüksəliş müşahidə olunur. 2011-ci ilin yekunlarına görə, iqtisadiyyatda artım 137 faiz olub. Bu il üçün proqnoz göstəriciləri daha yüksəkdir. Həmçinin orta aylıq əməkhaqqının ötən ilə nisbəti 140 faiz artıq olub. Bir sözlə, bu gün Sumqayıt ölkənin ən böyük şəhərlərindən biri olaraq möhtərəm Prezident İlham Əliyevin rəhbərliyi altında Azərbaycanda yüksək dinamizmə əsaslanan tərəqqi və yüksəlişin əsas ünvanlarından birinə çevrilib.

- Sumqayıt şəhəri yaranarkən əsas məqsəd buranı sənaye mərkəzinə çevirmək idi. Onilliklər boyu Sumqayıt bu missiyasını uğurla həyata keçirdi. Lakin yeni iqtisadi formasiyaya keçid müddətində şəhərin sənaye potensialı öz qüdrətini demək olar ki, itirdi. Bu sahədə mövcud vəziyyət necədir?

- Sumqayıt onillər boyu tək Azərbaycanın yox, Cənubi Qafqazın, keçmiş ittifaq məkanının əsas sənaye mərkəzlərindən olub. Demək olar ki, bütün müəssisələrin istehsal təyinatı və əmək qüvvəsi məhz bu sahəyə yönəlib. Ötən əsrin 90-cı illərinin məlum prosesləri bu sferada da böyük böhran yaratdı. Ulu öndər Heydər Əliyevin məqsədyönlü islahatları nəticəsində Sumqayıtın sənaye potensialı demək olar ki, yenidən qurulmağa başladı. Bu proses indi daha geniş vüsətlə aparılır.

Əsas konseptual xətt Prezident İlham Əliyev tərəfindən çox dəqiq müəyyən edilmişdir: Sumqayıt regionun mühüm sənaye mərkəzi olmalıdır. Burada sənaye obyektlərinin yenidən qurulması və modernləşdirilməsi işinə xüsusi diqqət yetirilir. Eyni zamanda sənaye potensialının inkişafı üçün vacib infrastruktur layihələri icrası da xüsusi diqqət mərkəzində yer alır. Kimya kompleksində görülən yenidənqurma işləri isə burada istehsal edilən məhsulların təkcə yerli tələbatın ödənilməsində yox, ixrac həcminin genişlənməsində də yeni imkanlar yaradıb. Bundan başqa, dövlət başçısının təşəbbüsü ilə Sumqayıtda nəinki ölkəmizdə, bölgədə, Cənubi Qafqazda ən böyük texnologiyalar parkı ərsəyə gətirlib. Sumqayıt Texnoloji Parkı - Sumqayıtın yeni şansıdır. Məhz bu texnologiyalar parkının fəaliyyəti nəticəsində şəhərin tutduğu mövqe artacaq. Bu, bütünlükdə respublikamızın bölgələrinin Sumqayıtla əlaqələrinin yaranması və inkişafı deməkdir.

Bu proses fəal inkişaf edir. Prezidentin təşəbbüsü ilə yeni müəssisələr tikilir, həmçinin Bakı müəssisələrinin bir hissəsi Sumqayıta köçürülür, lakin bunlar artıq əvvəlkindən fərqli, yüksək texnologiyalara əsaslanan istehsalatlardır. Sənaye limanının tikintisi haqqında qərar qəbul edilmişdir. Müvafiq infrastruktur obyektləri yaradılır, yeni iş yerləri açılır, lakin orada artıq uyğun ixtisaslara malik insanlar işləyə biləcəklər. Buna görə də Prezidentin tapşırığına əsasən, burada müvafiq texniki peşə məktəbləri açılır.

Bu gün Sumqayıtda sənaye məhsulu buraxılışında 151 faiz, o cümlədən kimya sənayesində 167 faiz, yeyinti sənaye məhsullarında 186 faiz, metallurgiyada 3 dəfə, tikinti materiallarının istehsalında 2,4 dəfə artım var. Bütün bunlar o deməkdir ki, sənaye mərkəzi olaraq Sumqayıtın xüsusi çəkisi qarşıdakı müddət ərzində daha da artacaq və yaradılan yüksək keyfiyyətli məhsullar ölkəmizdə onlara tələbatın ödənilməsinə imkan verməklə yanaşı, ixrac potensialının genişlənməsinə də öz töhfəsini verəcək.

Həmçinin şəhərdə digər təyinatlı məhsulların istehsalı ilə məşğul olan müəssisələrin də maddi-texniki bazası davamlı olaraq möhkəmləndirilir, müasir tələblərə uyğunlaşdırılır, yeniləri inşa edilir. Görülən işlər öz növbəsində əhalinin məşğulluq səviyyəsinin yüksəlməsinə, şəhər sakinlərinin maddi gəlirlərinin artmasına, insanların layiqli həyat tərzinin təmin olunmasına gətirib çıxarır. Sumqayıtda yeni iş yerlərinin yaradılması, o cümlədən özəl sektorun inkişaf etdirilməsi prosesi uğurla davam edir. Elə şəhərdə yeni infrastrukturun qurulması istiqamətində görülən işlər nə qədər insanın işlə təmin olunması deməkdir. Bir faktı misal çəkim ki, əhalinin işlə təminat göstəricisi bir il ərzində 143 faiz yaxşılaşıb. Məncə, bu, uğurdur. Bütün bunlar ölkədə qeyri-neft sektorunun inkşafını nümayiş etdirir.

Sumqayıt texnologiyalar parkının uğurlu fəaliyyəti, yaradılacaq kimya parkı, Sumqayıtda və ölkəmizin digər bölgələrində qurulan ən yüksək tələblərə cavab verən müəssisələr bir daha təsdiq edir ki, akademik Ramiz Mehdiyevin elə "Azərbaycan" qəzetində dərc edilən "XXI əsrdə Azərbaycan ideyası kreativ millət kontekstində" əsərində qeyd edildiyi kimi, bu gün Azərbaycanın yüksək texnoloji dövlətə çevrilməsi və yaradıcı təfəkkürlü mütəxəssislərin hazırlanması üçün fundamental baza yaradılır.

- Şəhərinizin inkişaf təmayüllərini "Yeni Sumqayıt" adı ilə müəyyənləşdirirsiniz. "Yeni Sumqayıt"ın əsas mahiyyəti nə olacaq?

- "Yeni Sumqayıt" şərti adı verdiyimiz inkişaf konsepsiyasının hədəfi şəhərin giriş qapısından ən ucqar məhəlləyədək, mərkəzi prospektdən ən uzaq küçəyədək bütün ərazilərin abadlaşdırılması, modern standartlara uyğunlaşdırılması, müasir zövqlə yenilənməsidir. Bu məqsədlə Prezident İlham Əliyevin rəhbərliyilə mühüm layihələr hazırlanıb və onların icrası uğurla həyata keçirilir.

Bu gün Sumqayıt dinamik inkişaf edir, bütövlükdə respublikada gedən proseslərlə həmahəng abadlaşır. Yeniliklər həyatın bütün sahələrini əhatə edir. Hazırda şəhərin əhalisi 500 min nəfərə çatmaq üzrədir. Yaxın bir neçə ildə verilən proqnozlara görə, əhalinin sayı daha da artacaq. Bütün bunlar şəhərdə aparılan abadlıq-quruculuq işləri, o cümlədən infrastruktur obyektlərinin inşası prosesində indidən nəzərə alınmalıdır. Cənab Prezidentin tövsiyələrinə uyğun olaraq bu gün şəhərin infrastrukturu elə formada qurulur ki, şəhər əhalisinin sayının artması fonunda belə yaxın bir neçə on il ərzində heç bir problem yaranmasın. Sözügedən kontekstdə təsadüfi deyil ki, Sumqayıt həm əhalinin say tərkibi baxımından, həm də inzibati ərazi vahidi olaraq sürətlə böyüməkdə, eyni zamanda ölkənin əsas iqtisadi və sənaye mərkəzlərindən birinə çevrilməkdədir. Şəhərin sürətli böyüməsi fonunda genişmiqyaslı işlər görülmüş, müxtəlif sahələrdə yaşanan inkişafın müasir tələblərə cavab verdiyi, o cümlədən infrastrukturun yeniləndiyi açıq-aydın nəzərə çarpır.

Şəhər əhalisinin dinamik artımı burada təbii olaraq yaşayış evlərinə tələbatın yüksəlməsinə səbəb olur. Bu mənada Sumqayıtda yeni yaşayış binalarının inşası, əvvəl mövcud olanlarda modernləşmə işlərinin həyata keçirilməsi diqqət mərkəzindədir. İndi şəhərin demək olar bütün əsas prospekti, küçəsi və məhəllələrində quruculuq, təmir-tikinti işləri aparılır və bəzilərində artıq başa çatıb. Son zamanlar görülən tikinti işləri sistemli hala salınıb. Şəhərin vahid baş planına uyğun olaraq aparılacaq tikinti, yenidənqurma və digər işlər öncə müzakirə edilir, sonra onun inşasına başlanır.

Bu gün Sumqayıtın qəsəbə, məhəllə və mikrorayonlarında əhalinin istirahətini normal qaydada təşkil edəcək müasir tələblərə cavab verən yaşayış massivlərinin yaradılması istiqamətində müəyyən işlər görülüb. Ölkə başçısının tövsiyə və tapşırıqları əsasında yaradılan belə yaşayış massivlərində insanların günün hər hansı bir vaxtında istirahət etmələri mümkündür. Bu gün şəhərdə nümunəvi mikrorayon və bir neçə nümunəvi məhəllələr yaradılıb. Bu istiqamətdə işlər davam edir. Həmçinin təkcə şəhər daxilində deyil, ətraf qəsəbələrdə də tikinti-abadlıq işləri görülür. Həmin qəsəbələrin öncə yol infrastrukturu dəyişdirilir. Qəsəbələrin işıqlandırma sistemləri yenilərilə əvəzlənir, qədim tarixə malik binalar yararlı hala gətirilir. Ümumiyyətlə, qarşıya qoyulan vəzifə ondan ibarətdir ki, şəhərin qəsəbələri simasını dəyişməli, müasirləşməlidir. Lakin bu zaman ənənəvi memarlıq üslubu və digər mental məqamlar mütləq nəzərə alınmalıdır. Məsələn, Sumqayıtın ən böyük qəsəbələrindən sayılan Corat qədim yaşayış məntəqəsidir. Burada həyata keçirilən yenidənqurma işlərində qədimliyin saxlanması ilə müasirliyin birliyi yaradılmalı, bunun vəhdəti tapılmalıdır. Qəsəbələrin müasirləşdirilməsini nəzərdə tutan layihələrin hazırlanması zamanı belə həssas məqamlar mütləq nəzərə alınır.

- Onilliklər boyu burada yerləşən sənaye müəssisələrinin fəaliyyəti nəticəsində Sumqayıt ekoloji cəhətdən bərbad məkan sayılıb. Bu mənfi imicdən şəhər qurtulurmu?

- Bəli, bu mənfi imic artıq keçmişdə qalıb. Cənab Prezident Sumqayıtı ekoloji cəhətdən ölkənin ən gözəl məkanlarından birinə çevirməyi qarşımıza bir vəzifə kimi qoyub. Qeyd etdiyiniz kimi, şəhərimizin çirklənməsinin əsas səbəbi buradakı müəssisələr olub. İndi fəaliyyət göstərən sənaye müəssisələri isə texniki standartlar baxımından olduqca mükəmməldir və ətraf mühitə mənfi təsiri yoxdur. Demək problemi yaradan səbəblər aradan qaldırılıb.

Nəqliyyat, sosial, mədəni və digər sahələr üzrə infrastrukturun yenilənməsi prosesi şəhər sakinlərinə xidmət səviyyəsinin daha da yüksəlməsi ilə yanaşı, həmçinin ekoloji vəziyyətin davamlı şəkildə yaxşılaşması deməkdir. Məsələn, görülən işlər çərçivəsində şəhərin kanalizasiya sistemi tamamilə dəyişdiriləcəkdir. Bu gün çirkli suların 60 faizi təmizlənmədən dənizə axıdılır. Lakin təmizləyici qurğuların tikintisinin başa çatması nəticəsində çirkli sular demək olar ki, təmiz su kimi dənizə axıdılacaq. Artıq bu proses başlayıb. Sumqayıt bütün Cənubi Qafqazda şəhər kanalizasiyasının təmizləmə sistemləri ilə yüz faiz əhatə edildiyi ilk şəhərlərdən biri olacaq. Bunun nəticəsində ekoloji baxımdan dəniz daha da təmiz olacaq, sahildə havanın çirklənmə səviyyəsi aşağı düşəcək.

Bundan başqa, şəhərdə yaşıllaşdırma işləri getdikcə daha geniş vüsət almaqdadır. İnsanların xoş və mənalı istirahəti üçün salınan yeni park və xiyabanlarda ağacların, digər yaşıllıq bitkilərinin əkilməsi prioritet istiqamətlər sırasında yer alır. Bu işə təkcə müvafiq dövlət strukturları yox, hər bir Sumqayıt sakini öz töhfəsini verməyə çalışır. Məhz bunun nəticəsidir ki, Sumqayıt artıq yaşıllıqlar məskəninə çevrilməkdədir.

Sosial infrastrukturun yenilənməsi, əhaliyə yüksək keyfiyyətli xidmətlərin göstərilməsi, bu zaman ən qabaqcıl təcrübənin nəzərə alınması, insanların istirahəti üçün yüksək şəraitin yaradılması hər zaman əsas diqqət mərkəzində yer alıb. Bu kontekstdə Sumqayıtda möhtəşəm işlərə, analoqu olmayan layihələrə imza atılmaqdadır. Görülən işlər çərçivəsində Nəsimi istirahət parkının dənizə doğru ərazisindən yeni magistral yol çəkilməsi nəzərdə tutulub. Azərbaycan üçün analoqu olmayacaq həmin yerdə dəniz-yol-park-şəhər dördlüyü düzənlənəcək. Burada ucaldılacaq beş ulduzlu mehmanxananın, yaxt klubun, müasir istirahət komplekslərinin tikintisi planlaşdırılır. Şəhərimizin təmizlənməsinə, ekoloji cəhətdən saflaşmasına yönələn bütün işlərin Prezidentin dəstəyilə uğurla başa çatacağına sumqayıtlılar tam əmindirlər.

- Sumqayıtda humanitar sferada vəziyyət necədir?

- Humanitar sahəni əhatə edən bütün istiqamətlər üzrə - səhiyyədən mədəniyyətədək, təhsildən elmə qədər hər bir sahədə dövlət qayğısı var və bu himayədarlıq öz məntiqi nəticəsini verir. Son dövrlərdə səhiyyə obyektlərinin modernləşdirilməsi, onların ən müasir tibbi texniki avadanlıqlarla təmini sahəsində işlər uğurla həyata keçirilir. Ölkə rəhbərinin bir saylı şəhər xəstəxanasının ən müasir standartlar əsasında yenidən qurulması haqqında sərəncamı sumqayıtlılar tərəfindən böyük məmnunluq və minnətdarlıqla qarşılandı. Təhsil, mədəniyyət və digər mühüm sahələr üzrə də infrastrukturun qurulması prosesi qabaqcıl təcrübəyə uyğun aparılır. Humanitar sahədə görülən işlərdə bütün ölkədə olduğu kimi, əsas dəstəyi Heydər Əliyev Fondu göstərir. Sumqayıtlılar ölkənin birinci xanımının fəaliyyətini böyük qürurla izləyirlər. Hansısa problemlə üzləşən insanlar Fonda müraciət edirlər. Bir sözlə, Heydər Əliyev Fondu və şəxsən Mehriban xanım Əliyeva sumqayıtlılar üçün böyük inam və etimad ünvanıdır.

Yerli əhali müstəqillik tariximizin ən böyük mədəniyyət hadisəsi olan "Eurovision" mahnı müsabiqəsini böyük qürur hissi ilə izlədi. Bu müsabiqə vasitəsilə 500 milyona yaxın insan televiziya vasitəsilə Azərbaycana baxdı, ölkəmizin gücünü, qüdrətini müşahidə etdi. Bu, özlüyündə böyük nailiyyətdir. Azərbaycan özünün yüksək mədəni səviyyəsini və təşkilatçılıq qabiliyyətini nümayiş etdirdi. Bu tədbir çərçivəsində respublikamız bütün dünyaya fəal təbliğ olunurdu. Sumqayıtlılar bütün bunları yaxşı başa düşür və bu işləri təşkil edənlərin zəhmətini yüksək qiymətləndirirlər. "Eurovision" mahnı müsabiqəsinin Təşkilat Komitəsinin rəhbəri Mehriban xanım Əliyevanın yüksək təşkilatçılıq qabiliyyəti, mədəniyyəti və intellekti sayəsində müsabiqə qüsursuz keçirildi. İnamla deyə bilərik ki, indi dünyanın ictimai-siyasi sistemində Azərbaycana müsbət münasibət əhəmiyyətli dərəcədə artmışdır.

- Son vaxtlar Sumqayıtda müxtəlif dini konfessiya üzvlərinin siyasi avantüra cəhdləri də müşahidə olunur...

- Bəli, belə cəhdlər olub. Ancaq anındaca qarşısı alınıb. Azərbaycan tolerantlığa görə dünyada model dövlət olaraq qəbul edilir. Ölkəmizdə əsas etiqad vasitəsi olan İslam dini ilə yanaşı, digər dinlər də, onlara bağlı olan təriqətlər də normal fəaliyyət göstərir. Hər biri dini ayinlərini, rituallarını həyata keçirməkdə sərbəstdirlər. Vicdan azadlığı tam qorunur, heç kəs dini etiqadına görə təqib edilmir. Onlardan sadəcə bir tələb var: dini fəaliyyətinizi siyasi vasitə predmetinə çevirməyin, ölkə qanunvericiliyinin normalarına hörmətlə yanaşın.

Təəssüf ki, bu tələblərə cavab verməyən, radikal abu-havada olan bəzi ünsürlərə də rast gəlinir. Belələri şəhərimizdə çox az da olsa mövcud olub. Açıq deyək, xüsusi xidmət və hüquq-mühafizə orqanlarının apardığı operativ əməliyyat tədbirləri sayəsində məlum olub ki, bu ünsürlər dövlətçiliyə qarşı qəsd cəhdləri hazırlayırlarmış. Şübhəsiz, bu avantüralarda xarici qüvvələrin də birbaşa təsiri və dəstəyi var. Bunlar Azərbaycan Prezidenti İlham Əliyevin müstəqil xarici siyasəti ilə barışmayan, respublikamızın bəzi xarici ölkələrin maraqları əsasında deyil, yalnız öz dövlətçilik mənafeyi əsasında inkişafından narahat olan qüvvələrdir. Belə qüvvələrin fəaliyyəti xalqımız tərəfindən böyük hiddət və nifrətlə qarşılanır. Belə avantürist və utopik cəhdlərin ölkəmizdə hər hansı bir nəticə verəcəyinin mümkünsüzlüyü bir daha öz təsdiqini tapır.

Qeyd etdiyim kimi, bu gün dünya miqyasında Azərbaycanı fərqləndirən əsas xüsusiyyətlərdən biri yüksək tolerantlıq, dini dözümlülük mühitinin mövcudluğudur. Bütün Azərbaycanda olduğu kimi, Sumqayıtda da demokratiyanın əsas prinsiplərindən biri olan vicdan azadlığı prinsipi tam həcmdə reallaşır. Bu şəhərdə dünyanın demək olar ki, bütün konfessiyaları təmsil olunmuş, onların öz imkanlarını reallaşdırması üçün normal şərait yaradılmışdır. İslam bizim ənənəvi dinimizdir. Respublikamızda məscidlərin, ziyarətgahların ən yüksək səviyyədə yenidən qurulması və əsaslı təmiri Heydər Əliyev siyasətinin, İlham Əliyev hakimiyyətinin dinimizə və dindarlara olan qayğısını, hörmətini nümayiş etdirir. Sumqayıtın dindarları bir müddət öncə Cümə məscidinin yenidənqurulması üçün ölkə başçısına müraciət etdilər və Azərbaycan Prezidentinin tapşırığına əsasən şəhərin baş məscidində minarə ucaldılıb, genişmiqyaslı yenidənqurma, təmir işləri aparılır. Bu, nadir memarlıq abidəsi olacaq. Cənab Prezident məscidin yenidən qurulması işləri ilə yerində tanış olmuş, bu məqsədlə xüsusi vəsait ayırmışdır. Biz dindarlarla tez-tez görüşürük və deyə bilərəm ki, onlar Prezidenti dəstəkləyən elektoratın fəal hissəsidir. Onlar belə məsələləri siyasiləşdirmək üçün kənardan göstərilən cəhdlərə görə təəssüfləndiklərini bildirirlər. Dinimizi bölmək, parçalamaq, belə deyək, klassik islama, elə Qurani-Kərimə də ziddir. Müqəddəs kitabın özündə deyilir ki, bölünməyin, bir olun! Belə olan halda hansı parçalanmadan söhbət gedə bilər. Biz dünyəvi ölkədə yaşayırıq. Sumqayıt yaradıldığı gündən dünyəvi şəhərdir. Burada hər hansı bir avantüra həyata keçməmiş iflasa uğrayacaq.

- Eldar müəllim, ümumiyyətlə, bu gün sumqayıtlıların əhval-ruhiyyəsi necədir?

- Olduqca yüksək! Bu yaxınlarda nümunəvi mikrorayonun açılış mərasimində "açıq mikrofon" tədbiri keçirildi. İyirmi minə yaxın sakinin iştirak etdiyi həmin tədbirdə otuzdan çox adam çıxış etdi. Onların hər biri Prezidentin fəaliyyəti barədə məhəbbətlə danışırdı. Bu, danılmaz faktdır! Belə tədbirləri reqlamentləşdirmək qeyri-mümkündür, onları xalqın fikri kimi qəbul etmək lazımdır.

Sumqayıtlılar sabaha böyük ümidlə baxırlar. Sakinlərimiz bilirlər ki, məhz cənab İlham Əliyevin intellekti, istedadı, qeyri-ordinar şəxsiyyəti sayəsində ölkəmiz qısa müddətdə bir neçə onilliyə bərabər inkişaf yolu keçmişdir. Prezident intensiv işləyir, mütəmadi olaraq bölgələrdə olur və öz fəaliyyəti ilə hətta zamanı qabaqlayır. Azərbaycan getdikcə daha güclü olur! Bu isə xaricdə Azərbaycanı zəif və asanlıqla idarə edilən bir ölkə kimi görmək istəyən müəyyən siyasi dairələrdə narahatlıq doğurmaya bilməz. Belələri vaxtilə öz səriştəsizliyini sübut etmiş, ölkəni parcalanma, məhv olma həddinə çatdıran və ya hərc- mərclikdən istifadə edərək külli miqdarda vəsait mənimsəmiş, xaricə qaçmış və Azərbaycana qayıdacağını söyləyən, lakin buna cəsarəti çatmayan, iradəsiz insanların vasitəsi ilə ara qarışdırmağa cəhd göstərirlər. Amma xalqımız başa düşür ki, güclü Azərbaycan, təəssüf ki yalnız bizim özümüzə lazımdır və bu gün onu yalnız Prezident İlham Əliyev möhkəmlədə bilər! Prezidentin iş üslubu hər məsələdə konseptuallığı və konkretliyi ilə səciyyəvidir. Onun atdığı addımlar həmişə insanların istəklərini qabaqlayır və onlara müsbət təsir edir. Prezident İlham Əliyev insanları yaxşı hiss edən, onları sevən və qurub-yaradan, buna görə də cəmiyyətdə böyük xarizmatik potensiala malik olan qeyri-adi, son dərəcə istedadlı insandır. Bu həqiqətləri xalq dərindən anlayır! Ona görə də Heydər Əliyev siyasi kursuna - Prezident İlham Əliyevin fəaliyyətinə alternativ görmür. Buna görə də bütün xalqımız, o cümlədən qədirbilən sumqayıtlılar dövlət başçısının ətrafında sıx səfərbər olublar.

İxtiyar HÜSEYNLİ

Azərbaycan.- 2012.- 3 iyul.- S. 6.