“Üç tenor” adlı vokal musiqi axşamı olmuşdur

Heydər Əliyev Fondunun təşkilatçılığı ilə keçirilən Qəbələ IV Beynəlxalq Musiqi Festivalı çərçivəsində iyulun 28-də "Qafqaz Resorte" hotelinin kamera zalında "Üç tenor" adlı vokal musiqi axşamı olmuşdur.

AzərTAc xəbər verir ki, konsertin birinci hissəsində bəstəkar F.Çileanın "Arlezianka" operasından Federikonun, J.Bizenin "Karmen" operasından Xozenin ariyaları, C.Puççininin "Toska" operasından Kavaradossinin romansı, "Turandot" operasından Kalafın, C.Verdinin "Otello" operasından Otellonun, "Lambardiyalılar" operasından Orontanın, P.Maskanyinin "Kənd namusu" operasından Turiddunun, R.Leonkovallonun "Payatsı" operasından Kanionun ariyaları, habelə ispan və neopolitan mahnıları ifa olunmuşdur.

Səhnəyə çıxan vokalçıları - İtaliyanın R.Leonkovallo adına Musiqi Festivalının və eyni adlı musiqi fondunun rəhbəri Ottavio Palmierini, İtaliyanın Pezaro Musiqi Akademiyasının tələbəsi Azər Rzazadəni, beynəlxalq festivallar və müsabiqələr iştirakçısı Adil Axundovu pianoçuların "Rendano" beynəlxalq müsabiqəsində "Qran-pri" mükafatının sahibi, digər beynəlxalq müsabiqələrin mükafatçısı, İtaliyanın Alessandriya Konservatoriyasının baş müəllimi Covanni Brollo (piano) müşayiət etmişdir.

Azərbaycan və İtalyan musiqiçilərinin çıxışları tamaşaçılar tərəfindən alqışlarla qarşılanmışdır.

Azərbaycan.- 2012.- 29 iyul.- S. 4.