Firəngiz ƏLİZADƏ: İpək Yolu festivalı gözəl bir musiqi bayramı olacaqdır

 

 Zənn edirəm ki, "İpək Yolu" festivalı gözəl bir musiqi bayramı olacaqdır. AzərTAc xəbər verir ki, bu sözləri Şəkidə keçirilən "İpək Yolu" III Beynəlxalq musiqi festivalının bədii rəhbəri, Azərbaycan Bəstəkarlar İttifaqının sədri, xalq artisti, UNESCO-nun sülh naminə incəsənət xadimi Firəngiz Əlizadə demişdir.

F.Əlizadə bildirmişdir ki, festivalın yenidən öz yolunu Şəki şəhərindən salması sevindirici haldır. Festivalın açılışı üçün xüsusi layihə hazırlanmışdır. Şəki xanları sarayının qoynunda maraqlı musiqili kompozisiyanı - dahi Azərbaycan bəstəkarı Üzeyir Hacıbəylinin bütün dünyada məşhurlaşmış əsəri əsasında hazırlanmış "Arşın malçı İpək Yolunda" tamaşasını izlədik. Ümidvarıq ki, Azərbaycan Dövlət Akademik OperaBalet Teatrının truppasının, Azərbaycan Dövlət Filarmoniyasının Fikrət Əmirov adına Dövlət Mahnı və Rəqs Ansamblının, habelə xalq çalğı alətləri orkestrinin iştirakı ilə baş tutan bu qeyri-adi tamaşa parlaq təəssüratlarla yadda qalacaqdır.

Festivalın bədii rəhbəri demişdir: "Biz dünyanın bir çox ölkələrindən qonaqlar gözləyirik. Festivala məşhur musiqi kollektivləri təşrif buyuracaqlar. Gürcüstandan "Erisioni", İrandan "Acəmlər", Koreya Respublikasından "Buyoqun Cunqnam", Türkiyədən "Əl-Kindi" ansambllarının, eləcə də Türkiyənin Şəki ilə qardaşlaşmış Giresun şəhərindən folklor ansamblının konsertləri tamaşaçılara böyük zövq verəcəkdir.

Həmişə olduğu kimi, bu dəfə də azərbaycanlı musiqiçilərin çıxışları festivalı bəzəyəcəkdir. Cabbar Qaryağdı adına muğam üçlüyünün, Azərbaycan Televiziyası və Radiosunun Niyazi adına simfonik orkestrininCahangir Cahangirov adına xor kollektivlərinin konsertləri, habelə Şəki Musiqi Kollecinin tələbələri üçün görkəmli musiqiçilərin ustad dərsləri təşkil olunacaqdır. Festival çərçivəsində, həmçinin Azərbaycan bəstəkarlarının iki yeni əsərinin premyerası da gözlənilir".

 

 

Azərbaycan.- 2012.- 3 iyul.- S. 8.