Azərbaycan Respublikasının Qiymətli Kağızlar üzrə Dövlət Komitəsi yeni qaydaları təsdiq etmişdir

Azərbaycan Respublikasının Qiymətli Kağızlar üzrə Dövlət Komitəsinin (QKDK) qərarı ilə bir sıra normativ hüquqi akt təsdiq olunmuş və Azərbaycan Respublikasının Hüquqi Aktların Dövlət Reyestrinə daxil edilmişdir. Belə ki, "Qiymətli kağızlar bazarında aktivlərin idarə edilməsi üzrə fəaliyyətin həyata keçirilməsi", "Qiymətli kağız sahiblərinin reyestrinin aparılması üzrə fəaliyyətin həyata keçirilməsi" , "Qiymətli kağızlar bazarında peşəkar fəaliyyətin növləri ilə eyni zamanda məşğul olunması" qaydaları və "Depozitar fəaliyyətinin həyata keçirilməsi" standartlarına dəyişikliklər təsdiq edilmişdir.

Həmçinin "2011-2020-ci illərdə Azərbaycan Respublikasında qiymətli kağızlar bazarının inkişafı" Dövlət Proqramının icrası ilə əlaqədar "İnvestisiya qiymətli kağızların emissiyası" qaydaları təsdiq edilmişdir. Sözügedən qaydalar mülkiyyət formasından asılı olmayaraq, Azərbaycan Respublikasında fəaliyyət göstərən hüquqi şəxslər tərəfindən korporativ istiqrazların emissiyasını, səhmdar cəmiyyətinin nizamnamə kapitalının artırılması zamanı səhmlərin əlavə emissiyasını, səhmlərin birləşdirilməsi, xırdalanması, onların nominal dəyərinin artırılması və azaldılması zamanı səhmlərin emissiyasını, kommersiya təşkilatlarının yenidən təşkili zamanı investisiya qiymətli kağızlarının emissiyasını tənzimləyir və investisiya qiymətli kağızların buraxılışlarına dövlət qeydiyyat nömrəsinin verilməsi prosedurunu müəyyən edir. Eyni zamanda, Azərbaycan Respublikasında emissiya edilən bütün investisiya qiymətli kağızlarının qeydiyyat nömrəsinin beynəlxalq standartlar əsasında verilməsini müəyyən edir və Milli Nömrəliyici Agentliyi tərəfindən beynəlxalq eyniləşdirmə nömrələrinin (İSİN kodların) verilməsini nəzərdə tutur.

Azərbaycan.- 2012.- 6 iyun.- S. 8.