Azərbaycan beynəlxalq tədbirlərin keçirilməsində zəngin təcrübə toplayıb

Sərgi iştirakçıları bunu vurğulayır və bəyənirlər

Xəzər neft, qaz, neftayırma və neft kimyası sərgisi artıq 19 "yaş"ına çatsa da, ona dünyanın nüfuzlu şirkətlərinin, sahənin qabaqcıl mütəxəssislərinin marağı səngimir. "Baku Expo Center"də öz işini davam etdirən budəfəki sərginin əvvəlkilərdən daha böyük olması həmin fikri təsdiqləyir. Burada 35 ölkənin 300-dən çox şirkəti iştirak edir. Bütövlükdə sərgi ekspozisiyasının ümumi artımı 15 faizdir.

Prezident İlham Əliyevin sərginin açılışında iştirak etməsi buraya toplaşanların hamısının ürəyincə olmuşdur. Dövlət başçısı sərgi iştirakçıları qarşısındakı nitqində bu tədbiri yüksək dəyərləndirərək onun tarixini də yada salmışdır: "Buraya gələrkən mən birinci sərgini xatırlayırdım. O sərgi 1994-cü ildə təşkil edilmişdi. Birinci sərginin Azərbaycanın nəinki neft-qaz sənayesində, ümumi inkişafında çox böyük rolu olmuşdur. Çünki Azərbaycan gənc müstəqil dövlət idi. Məhz sərginin 1994-cü ildə keçirilməsi ilə Azərbaycanın imkanları, xüsusilə neft sektorundakı imkanları dünyaya təsdiq edildi. Azərbaycana çox böyük maraq göstərilməyə başlandı. Təsadüfi deyildir ki, sərgidən bir neçə ay sonra "Əsrin kontraktı" imzalanmışdır ki, bu gün biz hamımız onun nəticələrini görməkdəyik".

Sərginin "veteran"larının sırası ildən-ilə möhkəmlənir, bununla yanaşı, tədbirə yeni iştirakçılar da qoşulur. Onların hamısı belə möhtəşəm bir sərgidə iştirak etməkdən məmnundur.

Almaniyanın RWE şirkətinin son illərdə sərgiyə marağı ölkəmizlə əməkdaşlıq etmək istəyi ilə sıx bağlıdır. Əslində, RWE karbohidrogenlərin kəşfiyyatından satışına qədər geniş fəaliyyət sahəsini əhatə edən çoxsaylı strukturlardan ibarətdir ki, onların da hərəsi ayrı-ayrılıqda bir şirkətdir. Bu şirkətlərdən biri - RWE Dea neftin bilavasitə kəşfiyyatı və hasilatı ilə məşğul olur. Şirkətin yeni müəssisələr üzrə baş vitse-prezidenti, doktor Hans-Herman Eke deyir:

- Azərbaycanda iki ildir fəaliyyət göstəririk. Biz ARDNŞ-la "Naxçıvan" strukturuna aid danışıqlar aparırıq. Söhbət hasilatın pay bölgüsü üzrə saziş tipli müqavilədən gedir. "Naxçıvan" strukturunda kəşfiyyat və qazma işlərini əhatə edən sazişlə bağlı irəliləyişlərimiz var. Ümidvarıq ki, yaxın vaxtlarda bu sənəd imzalanacaq və biz artıq Azərbaycanda tam fəaliyyətə başlaya biləcəyik. Həmçinin qeyd etmək istəyirəm ki, Azərbaycanda başqa maraqlarımız da var. ARDNŞ-la birgə digər layihələrdə iştirak etməyə hazırıq.

Neft-qaz sərgisinin əməkdaşlıq üçün münbit şərait yaratdığını vurğulayan H.Eke daha sonra əlavə edir:

- Əməkdaşlıq həmişə biznesin ümumi inkişafına təkan verir. Müsbət mənada rəqabət isə şirkətləri daim daha yaxşı işləməyə çağırır. Biz artıq dördüncü dəfədir bu sərgidə iştirak edirik. Sərgi çox möhtəşəm təşkil olunub. Bu göstərir ki, Azərbaycanın belə tədbirlərin təşkilində zəngin təcrübəsi var. Bu, xaricdən gələn şirkətlərə çox xoşdur və onların sərgidə iştirakı üçün stimul yaradır.

Bu il ilk dəfə olaraq sərgiyə uzaq Vyetnam da qoşulub. "Petrovyetnam"ın - Vyetnam Neft və Qaz Korporasiyasının "debüt"ü uğurlu və inamlıdır. Şirkətin Azərbaycan nümayəndəliyinin əməkdaşı Arzu Həsənovanın sözləri də bunu təsdiqləyir:

- "Petrovyetnam" 1970-ci illərin əvvəllərində təşkil olunub. Bu, dövlət strukturudur, karbohidrogen yataqlarının kəşfiyyatı, hasilat, emal və satışla məşğul olur. Azərbaycanda isə bir neçə ildir fəaliyyət göstərir. Şirkət keçmiş SSRİ məkanının bir sıra digər yerlərində də işləyir. Məsələn, Qazaxıstanda, Rusiyanın neft rayonlarında. O, həmçinin Kanadada, Sinqapurda, Malayziyada, Madaqaskarda, Konqoda neft hasilatı ilə yanaşı, boru çəkilişi, ekologiya ilə bağlı işlər aparır. Ümumiyyətlə, dünyada 80-ə qədər layihədə payçı kimi iştirak edir. "Petrovyetnam" Azərbaycanda ARDNŞ-la birgə işlər aparacaq. Sərgiyə gəlincə isə, qeyd etmək istəyirəm ki, biz buraya keçən il ziyarətçi kimi baş çəkmişdik. Bu, qəlbimizdə iştirakçı olmaq istəyi oyatdı. Çünki burada digər şirkətlərlə tanış olmaq, danışıqlar aparmaq imkanı var. Bu baxımdan sərgi çox yaxşı təşkil olunub.

Sərginin təşkilindən ziyarətçilər də çox razıdırlar. Onların arasında təkcə neft-qaz sektorunun işçiləri deyil, digər sahələrdə çalışan insanlar da var. Paytaxt sakinləri gözəl tərtib olunmuş bu sərgiyə baxmaqdan, yeni məlumatlar əldə etməkdən zövq aldıqlarını bildirirlər.

AMEA-nın Kibernetika İnstitutunun bir neçə əməkdaşı stendlərə maraqla tamaşa edirdi. İnstitutun laboratoriya rəhbəri Robert Qarayev həmkarlarının da təəssüratlarını ümumiləşdirərək söylədi:

- Bu, çox zəngin və aktual bir sərgidir. Neftçi olmasaq da, özümüz və həmkarlarımız üçün bir çox faydalı məlumatlar topladıq. Təəssüratlarımızı digər iş yoldaşlarımıza da danışacağıq. Biz elmi işçi olaraq görürük ki, burada yüksək texnologiyalarla işləyən kampaniyalar təmsil edilir. Çoxlu sayda belə şirkətlərin məhz Azərbaycanda bir araya gəlməsi bizi çox sevindirir. Sovet dövründən üzübəri bir çox sərgilərə baxmış və hətta orada işləmişik də. Amma belə yüksək səviyyə hələ görməmişik. Bu, ölkəmizin nail olduğu dünya standartları səviyyəsidir ki, özünü iqtisadiyyatda da, ekologiyada da, sosial həyatda da göstərir.

Maraqlıdır ki, həm iştirakçılar, həm də ziyarətçilər indidən gələn ilki sərginin arzusunda olduqlarını söyləyirlər. Bu, 20-ci yubiley sərgisi olacaq.

İki onillik ərzində Xəzər neft, qaz, neftayırma və neft kimyası sərgisi həqiqətən böyük missiya yerinə yetirib. İyunun 5-də "Baku Expo Center"dəki nitqində dövlətimizin başçısı İlham Əliyev bunu da vurğulayıb: "Bugünkü açılış mərasiminə toplaşmış bütün qonaqları ürəkdən salamlayıram, sərginin təşkilatçılarına minnətdarlığımı bildirmək istəyirəm. Yenə də qeyd etmək istəyirəm ki, onların fəaliyyəti ölkəmiz üçün çox vacibdir, önəmlidir. Həm işin əvvəlində, 90-cı illərin ortalarında, həm bu gün. Çünki bu gün bir daha demək istəyirəm ki, Azərbaycana maraq daha da böyükdür və nəinki neft-qaz sektoruna, bütün başqa sahələrə. Azərbaycan əməkdaşlığa həmişə olduğu kimi hazırdır".

Flora SADIQLI

Azərbaycan.- 2012.- 7 iyun.- S. 9.