Parisdə AŞ PA Monitorinq Komitəsinin yığıncağı keçirilmişdir

Mayın 31-də Avropa Şurasının (AŞ) Parisdəki ofisində Avropa Şurası Parlament Assambleyası (AŞ PA) Monitorinq Komitəsinin yığıncağı keçirilmişdir.

Yığıncaqda Monteneqronun, Gürcüstanın, Monakonun, Serbiyanın, Ukraynanın, Rusiya Federasiyasının, Albaniyanın, Makedoniyanın və Azərbaycanın Avropa Şurasına üzv olarkən qurum qarşısında götürdükləri öhdəliklərin yerinə yetirilməsinin vəziyyəti məsələsi müzakirə edilmişdir.

Komitə üzvü, Azərbaycanın AŞ PA-dakı deputat qrupunun rəhbəri Səməd Seyidov yığıncaq barədə AzərTAc-a verdiyi müsahibəsində demişdir: Ölkəmizlə bağlı məsələnin müzakirəsində AŞ PA-nın Azərbaycan üzrə həmməruzəçisi ispaniyalı deputat Aqramunt Font de Mora çıxış edərək məruzənin hazırlanması haqqında məlumat vermişdir. Komitə üzvləri onun məlumatına münasibət bildirmişlər.

Məruzə ətrafında müzakirələr zamanı çıxış edərək xüsusi bir məsələni komitə üzvlərinin diqqətinə çatdırdım. Son zamanlar Azərbaycana qarşı qeyri-obyektiv fikirlər səsləndiyini və heç bir əsası olmayan müxtəlif mövqelərdən yanaşmalar olduğunu qeyd etdim. Azərbaycan ətrafında yaranan söz-söhbətə erməni lobbisinin, ölkəmizi istəməyən, onun inkişaf qüdrətini gözü götürməyənlərin rəvac verməsi ilə bağlı məsələ qaldırdım. Bu məsələ komitə üzvləri tərəfindən düzgün başa düşüldü və qərara alındı ki, Azərbaycanın beynəlxalq aləmdə formalaşmaqda olan nüfuzuna kölgə salmaq cəhdləri öyrənilsin. Nə üçün bəzi dairələr Azərbaycana qarşı belə siyasət aparırlar? Bunun kökü haradan gəlir?

Çıxışımda qeyd etdim ki, Azərbaycan ətrafında yaranan xoşagəlməz söz-söhbətin mənbəyi ondan ibarətdir ki, son zamanlar Azərbaycan dünya miqyaslı layihələr həyata keçirir, beynəlxalq aləmdə nüfuzu getdikcə artır, sürətlə inkişaf edir, iqtisadi qüdrəti yüksəlir, regionda lider dövlətə çevrilir. Müxtəlif parlamentlər və beynəlxalq təşkilatlar ölkəmizin ərazi bütövlüyü, Dağlıq Qarabağ ətrafında gedən məsələlərdə Azərbaycanı dəstəkləyən sənədlər qəbul edirlər. Bundan ehtiyatlanan və Azərbaycanı istəməyən qara qüvvələr başqa bir siyasət seçmişlər. Bu qüvvələr guya Azərbaycanda insan haqlarının pozulması barədə heç bir reallıqla səsləşməyən əsassız səs-küy salmağa cəhd göstərirlər. Bu fikirləri açıq şəkildə komitə üzvlərinə bəyan etdim və bildirdim ki, Azərbaycan AŞ qarşısında götürdüyü bütün öhdəlikləri lazımi səviyyədə yerinə yetirir və bu istiqamətdə fəaliyyətini davam etdirməkdə israrlıdır. Bəzi dairələrin Azərbaycanın nüfuzuna xələl gətirməyə cəhd etmələrinə baxmayaraq, tezliklə Avropa təşkilatları kimin haqlı olduğunu müəyyənləşdirəcəklər.

Azərbaycan.- 2012.- 2 iyun.- S. 4.