ORDUM MƏNİM, YURDUM MƏNİM

İnsanlar ilk dəfə silahı ov etmək, qida tapmaq üçün yaradıblar. Sonra bu silahdan vəhşi heyvanlardan qorunmaqdan ötrü istifadə ediblər. Özlərinə yaşayış məskəni salan, ərzaq ehtiyatı yaradan, geyim və zinət əşyaları düzəldən, daha əlverişli və qida əldə edilməsi nisbətən asan olan yerlərdə yaşayan əcdadlarımız olanları saxlamaq, özünü və ailəsini, obasını xain qəsdlərdən qorumaq üçün silaha əl atmalı olublar. Müdafiə və qorumaq funksiyası şərəf işi, cəsurluq sayılıb. Təbii ki, silahla daha yaxşı davrananlar, döyüşlərdə fərqlənənlər daha çox hörmət qazanaraq nüfuz sahibinə çevriliblər, bəzən hətta qəbilə başçısı səviyyəsinədək yüksəliblər.

Zaman keçdikcə döyüşçüyə (əsgərə), orduya münasibət də dəyişib. İşğalçı ordular yaranıb, insanları daha çox və daha uzaq məsafədən öldürən silahlar icad olunub. Müharibələr daim bəşəriyyətə ölüm, dağıntı və fəlakətlər gətirib, milyardlarla günahsız, nakam ömürləri yarıda qırıb. Təəssüf ki, elmin nailiyyətləri, zəka sahibləri bir çox hallarda hərbə işləyib, yeni təyinatlı silahlar kəşf edilib, insanların öldürülməsi texnologiyaları daim təkmilləşdirilib.

Bütün bunlara baxmayaraq ordu əsas funksiyasını - vətəni qorumaq və müdafiə etmək vəzifəsini daim qoruyub saxlayıb!

Azərbaycanın ikinci dəfə dövlət müstəqilliyi qazanması ərəfəsində də ölkəmizə uzanan murdar əllər, məkrli niyyətlər vətənin müdafiəsinə zəruri ehtiyac duyulduğunu ortaya qoydu. Lakin ordu hardaydı? Qırmızı imperiyanın mövcudluğu dövründə SSRİ "böyük vətənimiz", sovet ordusu isə "beynəlmiləlçi, humanist və xilaskar" ordu kimi beynimizə yeridilmişdi. Elə ki, imperiyanın çöküşü başladı, "böyük vətən"in "doğma" övladlarına ögey münasibəti meydana çıxdı, "humanist və xilaskar ordu" isə 1990-cı ilin 20 Yanvarında xalqımızı gülləbaran edərək zirehli texnikanın altında qoydu. Beləliklə, iç üzünü açıb göstərdi, "xalqlar dostluğu və proletar beynəlmiləlçiliyi" prinsipinin isə çürük əsaslara söykəndiyini sərgilədi. Ötən əsrin 90-cı illərinin əvvəllərində ölkəmizə qarşı işğalçılıq planlarının icrasına başlayan Ermənistanda ordu yaradıldığı bir vaxtda Azərbaycanın maymaq və qətiyyətsiz rəhbərləri əhalidəki ov tüfənglərini belə yığdıraraq insanları yağı düşmən qarşısında əliyalın qoydular.

Ordun varsa, yurdun var - deyiblər.

Bir də "öz ordusunu yedirtməyən xalq, başqa ölkələrin ordusunu yedizdirər" - söyləyiblər.

Bu müdrik deyimlərdə böyük həqiqətlər var. Məhz ordunun və ona rəhbərlik edəcək sərkərdənin yoxluğu, torpaqların müdafiəsinin vaxtında təşkil olunmaması ölkə ərazisinin 20 faizinin işğalı, bir milyondan çox qaçqın və məcburi köçkünün yaranması ilə nəticələndi. Beləliklə, xalq nə qədər qəhrəmanlıq göstərsə də, 20 mindən çox oğul və qızlarını şəhid versə də, yurdunu itirdi, ən çətin və ağır qaçqın ömrü yaşamaq məcburiyyətində qaldı!

Azərbaycanın həmişə hərb elminə dərindən bələd general övladları olub!

Azərbaycanlı gənc döyüşməyi, qəhrəmanlıq göstərməyi bacarıb!

Azərbaycan xalqı orduya məhəbbətlə yanaşıb!

Bütün bunlara baxmayaraq həm çar Rusiyası, həm də sovet hakimiyyəti dövründə bizi ordudan uzaqda saxlamağa, hərb elmini öyrənməyə qoymamağa çalışıblar. Gah orduya çağırmayıblar, gah da xidməti müddəti tikinti ilə məşğul olan hissələrdə, qeyri-hərbi sahələrdə keçməyə vadar ediblər. Yalnız xalqımızın böyük oğlu Heydər Əliyev hərb elminin əhəmiyyətini, bu sahədə kifayət qədər kadr hazırlanmasının vacibliyini düzgün qiymətləndirərək öz dəyərli töhfələrini də verdi. Əvvəlcə, C.Naxçıvanlı adına hərbi liseyin yaradılmasına, Azərbaycandakı və keçmiş SSRİ-nin digər şəhərlərindəki hərbi məktəblərdə azərbaycanlı gənclərin təhsil almasına nail oldu, ikinci dəfə ölkə rəhbərliyinə qayıtdıqdan sonra isə Milli Ordu quruculuğu prosesinə başlayaraq onu qısa müddətdə və uğurla başa çatdırdı!

Bu gün Azərbaycan Cənubi Qafqazda ən güclü və modern orduya malikdir!

Azərbaycan ordusunun yüksək peşəkar, hərb elminin incəliklərinə yiyələnmiş cəsur, vətənpərvər zabit korpusu formalaşmışdır!

Hərbi hissələr ən müasir, yeni texnologiyaya əsaslanan, hər şəraitdə yüksək nəticələrə imkan verən silah-sursat, zirehli texnika, uçuş aparatları və raketlərlə təmin edilmişdir.

Azərbaycan əsgəri hər an Ali Baş Komandanın əmrlərini dəqiqliklə icra edən, cəsarət və qəhrəmanlığı ilə nümunə göstərən döyüşçüyə çevrilmişdir.

Dövlət başçısı Ali Baş Komandan cənab İlham Əliyev orduya xüsusi qayğı göstərir, onun təchizat və təminatını daim diqqət mərkəzində saxlayır. Mütəmadi hərbi hissələrə gedir, cəbhə bölgəsində, düşmənlə üzbəüz səngərlərdə olur, əsgər yeməkxanalarında əsgərlərlə bir süfrə arxasında əyləşir, fərqlənənləri elə səngərdəcə mükafatlarla təltif edir. Neçə il öncə Prezidentimiz Azərbaycan ordusuna Ermənistanın dövlət büdcəsi həcmində vəsait ayrılacağını söyləmişdi. Dövlət başçısı bu vədinə də şərəflə əməl edib! Bu gün Azərbaycan dövləti orduya Ermənistanın dövlət büdcəsindən 50 faiz çox vəsait ayırır. Müdafiə sənayemiz 600 addan çox silah-sursat istehsal edir. Hər il ordumuza yeni təyyarə və vertolyotlar, raketlər, müasir silah növləri alınır, mövcud texnika modenrləşdirilərək yeniləndirilir.

Azərbaycan xalqı öz ordusunu yedirdir, geyindirir, silahlandırır, sevərək böyük ümidlər bəsləyir!

Azərbaycan müstəqil siyasət yürüdür, bütün məsələlərdə dövləti və milli maraqları əsas tutur!

Azərbaycan ərazisində heç bir dövlətin hərbi bazası yoxdur, əcnəbi əsgərlər saxlanılmır və yedizdirilmir!

Müstəqilliyin 20 ili ərzində Azərbaycan çox böyük uğurlara imza atıb, dünya birliyinin sayılıb-seçilən üzvlərindən birinə çevrilib. BMT Təhlükəsizlik Şurasının qeyri-daimi üzvü seçilib, iqtisadi sahədə keçid dövrünü başa vurub, investisiya qoyulan ölkədən investisiya yatıran dövlətə çevrilib, beynəlxalq tədbirlərə ev sahibliyi edən qonaqpərvər və tolerant ölkə kimi tanınıb. Ötən dövrdə həll edə bilmədiyimiz bircə problem qalıb: Ermənistan-Azərbaycan, Dağlıq Qarabağ problemi! Hələ ki, səmərəsiz sülh danışıqları davam edir!

Növbə orduya çatsa, Azərbaycan öz sözünü deyəcək!

Bunu Mübariz İbrahimov kimi qəhrəman balalarımız canları və qanları ilə sübut edirlər!

Azərbaycan ordusunun qüdrətini, Azərbaycan əsgərinin gücünü və imkanlarını düşmənlərimiz, onların havadarları da yaxşı bilirlər!

Biz hərb istəmirik, amma torpaqların işğalda qalmasına da yol verməyəcəyik!

Bu gün əsgər olmaq qürurludur!

Əsgər valideyni sayılmaq fəxarətdir!

Müstəqil dövlətin ordusunda xidmət etmək şərəfdir!

Ordun varsa, yurdun var!

Artıq güclü, modern ordumuz, qətiyyətli Ali Baş Komandanımız var!

Yurda dönəcəyimiz gün də uzaqda deyil!

Azərbaycan.- 2012.- 26 iyun.- S. 4.