GUAM-ın 2013-cü il üçün büdcə layihəsi razılaşdırılmışdır

Demokratiya və İqtisadi İnkişaf naminə Təşkilatın (GUAM) Katibliyindən AzərTAc-a bildirmişlər ki, qurumun Kiyevdəki iqamətgahında GUAM dövlətlərinin maliyyə ekspertlərinin görüşü olmuşdur.

İki günlük iclasda Azərbaycan Xarici İşlər Nazirliyinin (XİN) Valyuta-Maliyyə idarəsinin rəisi Nazim Əliyev, Gürcüstanın xarici siyasət idarəsinin Daxili Audit Xidməti rəisinin müavini T.Kiladze, Ukrayna XİN-in Maliyyə-İnzibati məsələlər və kargüzarlıq departamenti direktorunun müavini İ.Yaroş, habelə Moldova Respublikasının Kiyevdəki səfirliyinin müşaviri V.Sarançuk iştirak etmişlər. Tərəflər GUAM-ın 2013-cü il üçün büdcə layihəsinin dövlətdaxili razılaşdırılması məqsədi ilə onu qurumun üzvü olan ölkələrə göndərmək üçün gözdən keçirmiş və təshih etmişlər.

Görüş çərçivəsində GUAM ölkələrinin maliyyə ekspertləri qurumun maliyyə əsasnamələrinin və qaydalarının yeni redaksiyası üzərində işi davam etdirmişlər.

Zeynal AĞAZADƏ

Azərbaycan.- 2012.- 3 iyun.- S. 2.