Mançesterdə Xocalı soyqırımı ilə bağlı yürüş keçirilib

Böyük Britaniyanın Mançester şəhərində Xocalı faciəsinin 20-ci ildönümü münasibətilə etiraz aksiyası keçirilmişdir. Aksiya Azərbaycan Respublikasının Böyük Britaniyadakı səfirliyinin və Azərbaycan Dövlət Neft Şirkətinin (ARDNŞ) dəstəyi ilə Mançester-Azərbaycan Cəmiyyəti tərəfindən təşkil olunmuşdur.

Mançesterdə təhsil alan azərbaycanlı tələbələr tərəfindən qurulmuş Mançester-Azərbaycan Cəmiyyəti artıq 2 ildir ki, Azərbaycanın tanıdılması üçün müxtəlif tədbirlər keçirir. Bu il də istisna olmayıb və Xocalı faciəsinin 20-ci ildönümü ilə əlaqədar aksiya keçirilib. Aksiyada azərbaycanlı tələbələrlə yanaşı, türkiyəli və qazaxıstanlı tələbələr də fəal iştirak ediblər. Aksiya Mançester Universitetinin əsas binasının yaxınlığındakı meydanda (University Place) başlayıb. Tədbir iştirakçıları "Xocalıya Ədalət - Qarabağa Azadlıq!", "Erməni aqressiyasına son!", "Bir daha soyqırımlar yaşanmasın!", "Daha uşaqlar öldürülməsin!" kimi şüarlar səsləndiriblər. Azərbaycanlı tələbələr əvvəlcədən Mançester-Azərbaycan Cəmiyyəti tərəfindən Xocalı faciəsi haqqında hazırlanmış broşürləri universitetin müəllim və tələbə heyətinə təqdim edərək, onlara Xocalı və Qarabağ münaqişəsi haqqında ətraflı məlumat veriblər.

Daha sonra aksiya iştirakçıları Mançester Universitetindən şəhər mərkəzinə, oradan da Mançester şəhərinin bələdiyyə binasının önündəki meydana yürüş ediblər. Yürüş boyunca ətrafdakı insanlara Xocalı faciəsi haqqında broşürlər paylanılıb və yürüşün məqsədi haqqında məlumat verilib. Bələdiyyə binasının önünə Xocalı faciəsini əks etdirən plakatlar və qərənfillər düzülüb. Aksiyanın sonunda Xocalı faciəsi və Ermənistan-Azərbaycan, Dağlıq Qarabağ münaqişəsi haqqında məlumatları özündə cəmləşdirən bukletlər Mançester şəhərinin meri Richard Leese-ə təqdim olunması üçün bələdiyyə təmsilçisinə verilib.

Kənan FİRDOVSİOĞLU

Azərbaycan.- 2012.- 1 mart.- S. 5.