Argentina iqtisadi araşdırmalar missiyasının üzvləri ARDNŞ-də olmuşlar

ARDNŞ-in mətbuat xidmətindən AzərTAc-a bildirmişlər ki, martın 2-də şirkətin birinci vitse-prezidenti, akademik Xoşbəxt Yusifzadə Bakıda səfərdə olan Argentina iqtisadi araşdırmalar missiyasının üzvləri ilə görüşmüşdür. Görüşdə Xoşbəxt Yusifzadə Argentina və Azərbaycanın böyük neft-qaz sənayesinə malik olduğunu vurğulamış, bildirmişdir ki, iki ölkə arasında iqtisadi münasibətlərin genişləndirilməsi istiqamətində son vaxtlar mühüm işlər görülür.

Qonaqlar Azərbaycanın qədim neft ölkəsi olduğunu yaxşı bildiklərini və neft sənayesinin flaqmanı olan Dövlət Neft Şirkətinə gəlməkdən məmnunluqlarını ifadə etmişlər. Argentina nümayəndə heyətinin üzvləri öz ölkələrinin iqtisadi yönümlü nazirliklərini təmsil etdiklərini və səfərlərinin məqsədinin Bakıda Azərbaycan-Argentina biznes forumunun təşkilinə hazırlıq işləri olduğunu söyləmişlər. Bu günlərdə Azərbaycanda Argentina səfirliyinin təsis edildiyini diqqətə çatdıran qonaqlar respublikamızla iqtisadi əməkdaşlıqda maraqlı olduqlarını qeyd etmişlər.

Xoşbəxt Yusifzadə Azərbaycanda neftçıxarma işinin zəngin tarixə malik olduğunu, dünyada sənaye üsulu ilə ilk neft quyusunun Bakıda qazıldığını, neftçilərimizin dünya neft sənayesinə çoxsaylı töhfələr verdiklərini söyləmiş, hələ sovetlər dövründə onlar tərəfindən Xəzər dənizinin müxtəlif milli sektorlarında yerləşən böyük neft-qaz yataqlarının kəşf olunduğunu, keçmiş SSRİ-nin bir çox yerlərində neft sənayesinin əsası qoyulduğunu diqqətə çatdırmışdır. Sonra heyət üzvlərini maraqlandıran sualları cavablandıran X.Yusifzadə onlara ulu öndər Heydər Əliyevin rəhbərliyi altında Azərbaycanın yeni neft strategiyasının uğurla həyata keçirilməsi və bu strategiya çərçivəsində regional əhəmiyyətli layihələrin gerçəkləşdirilməsi haqqında ətraflı məlumat vermişdir. O, Azərbaycanda hasil olunan karbohidrogenlərin dünya bazarlarına çıxarılması məqsədi ilə qısa müddətdə şaxələndirilmiş neft və qaz kəmərləri sisteminin yaradılmasından söz açmış, bildirmişdir ki, hazırda bu sistemə 3 böyük neft və 4 qaz kəməri daxildir. Azərbaycanın karbohidrogen ehtiyatlarının zəngin olduğunu vurğulayan X.Yusifzadə təbii qazın ixracı məsələlərində iqtisadi səmərəliliyin əsas götürüldüyünü qeyd etmiş, yeni qaz-kondensat yataqlarının kəşf olunduğunu söyləmiş, ARDNŞ-in son illər ölkə daxilində və xaricdə həyata keçirdiyi investisiya layihələri haqqında ətraflı məlumat vermişdir.

Azərbaycan.- 2012.- 3 mart.- S. 4.