Nazirlər Kabineti üç yeni qərar qəbul etmişdir

Son günlər Nazirlər Kabineti üç yeni qərar qəbul etmişdir.

Azərbaycan Respublikası Konstitusiyasının 119-cu maddəsinin dördüncü abzasına əsasən, "Azərbaycan Milli Ensiklopediyası" Elmi Mərkəzinin Ədliyyə, Maliyyə və Əmək və Əhalinin Sosial Müdafiəsi nazirlikləri ilə razılaşdırılmış təkliflərini nəzərə alaraq Nazirlər Kabineti "Azərbaycan Milli Ensiklopediyası" Elmi Mərkəzində çalışan işçilərin aylıq vəzifə maaşlarına əlavələrin müəyyən edilməsi haqqında qərar qəbul etmişdir.

Qərar 2012-ci il aprelin 1-dən qüvvəyə minir.

Azərbaycan Respublikası Əmək Məcəlləsinin 36-cı maddəsinə əsasən Nazirlər Kabineti, Azərbaycan Həmkarlar İttifaqları Konfederasiyası və Azərbaycan Respublikası Sahibkarlar (İşəgötürənlər) Təşkilatlarının Milli Konfederasiyası arasında 2012-2013-cü illər üçün Baş Kollektiv Sazişin bağlanması haqqında qərar qəbul edilmişdir.

Bu qərar martın 6-dan - imzalandığı gündən qüvvəyə minmişdir.

"Azərbaycan Respublikasının Gənclər və İdman Nazirliyi yanında Gənclər Fondunun yaradılması haqqında" Azərbaycan Respublikası Prezidentinin 2011-ci il 19 dekabr tarixli fərmanının 4.2-ci bəndinin icrasını təmin etmək məqsədi ilə Nazirlər Kabineti özünün 2011-ci il 6 dekabr tarixli qərarı ilə təsdiq edilmiş "Azərbaycan Respublikası Gənclər və İdman Nazirliyinin strukturuna daxil olmayan tabeliyindəki qurumların Siyahısı"nda dəyişikliklər edilməsi haqqında qərar qəbul etmişdir.

Bu qərar martın 7-dən - imzalandığı gündən qüvvəyə minmişdir.

Nazirlər Kabinetinin mətbuat xidmətindən AzərTAc-a bildirmişlər ki, bu qərarların tam mətni ilə Nazirlər Kabinetinin www.cabmin.gov.az ünvanlı internet saytında və Azərbaycan Respublikasının Qanunvericilik Toplusunda, həmçinin AzərTAc-ın www.azertag.com internet resursunda tanış olmaq mümkündür.

Azərbaycan.- 2012.- 13 mart.- S. 7.