Azərbaycanlıların soyqırımına həsr olunmuş abidə kompleksinin və ya muzeyin yaradılması məsələsi müzakirə olunur

Azərbaycanlıların soyqırımına həsr olunmuş ümumi abidə kompleksinin və ya muzeyin yaradılması ilə bağlı təşəbbüs vardır. Bu, hazırda Prezident Administrasiyasında öyrənilir, müvafiq qurumlar tərəfindən qiymətləndirilir.

Bu sözləri martın 29-da Azərbaycan Respublikası Prezidenti Administrasiyasının İctimai-siyasi məsələlər şöbəsinin müdiri Əli Həsənov demişdir.

Əli Həsənov soyqırımına aid abidə kompleksinin və ya muzeyinin harada yaradılacağı və bununla bağlı müsabiqənin elan edilməsi məsələlərinin müzakirə olunduğunu bildirmişdir. Məsələ ilə bağlı hələlik qərarın verilmədiyini deyən şöbə müdiri vurğulamışdır ki, milli yaddaşın formalaşdırılması, tarixi keçmiş, bu gün və gələcək arasında əlaqə yaratmaq, bu soyqırımı haqqında ictimai fikrin formalaşması üçün belə bir abidə kompleksinin və ya muzeyin yaradılması vacibdir.

AzərTAc

Azərbaycan.- 2012.- 30 mart.- S. 1.