Konfrans keçirilmişdir

Şəmkir Rayon İcra Hakimiyyəti YAP Şəmkir rayon təşkilatının təşəbbüsü ilə "Gender siyasəti, erkən nikah problemləri: "Sosial psixoloji aspektlər" mövzusunda elmi-praktik konfrans keçirilmişdir. Konfransda rayonun idarə, müəssisə, təşkilat, şirkət işçiləri, ictimaiyyətin çoxsaylı nümayəndələri iştirak etmişlər. Tədbiri YAP Şəmkir rayon təşkilatının sədri Fəxrəddin Vəliyev açaraq Azərbaycan ailəsinin cəmiyyətdə, xalqımızın milli-mənəvi dəyərlər sisteminin formalaşmasında müstəsna rol oynadığını, ailənin firavanlığının və xoşbəxtliyinin ölkənin tərəqqisinin əsas göstəricisi olduğunu bildirmişdir. Milli Məclisin deputatları Sahibə Qafarova, Məlahət İbrahimqızı və Sevinc Hüseynova çıxışlarında ailənin cəmiyyətin əsas təsisatlarından biri kimi bəşəri dəyərlərin, mədəniyyətin və nəsillərin tarixi varisliyinin qoruyucusu, sabitlik və inkişafın amili olduğunu vurğulamışlar. Vətəndaşlıq Vəziyyəti Aktları Dövlət Qeydiyyatı Şəmkir rayon şöbəsinin müdiri Ruqiyyə Allahverdiyeva, rayon təhsil şöbəsinin metodisti Firuzə İmanova, rayonun Kür qəsəbəsindəki 1 nömrəli orta məktəbin direktoru Pirverdi Dağlaroğlu, Sabirkənd orta məktəbinin direktoru Müqabil Yolçuyev və başqaları mövzu ətrafında təkliflərlə çıxış etmişlər.

Azərbaycan.- 2012.- 18 may.- S. 9.