Ermənistanın növbəti yalanı ifşa edilmişdir

Mayın 18-də Ermənistanın kütləvi informasiya vasitələri "sensasiya doğuran" xəbər yayaraq bildirmişlər ki, guya Amerika Birləşmiş Ştatları qondarma "Dağlıq Qarabağ respublikası"nın müstəqilliyini tanımışdır.

Azərbaycanın Xarici İşlər Nazirliyinin rəsmisi Elman Abdullayev AzərTAc-a müsahibəsində buna münasibət bildirərək demişdir ki, erməni KİV-lərinin yaydığı məlumata dərhal reaksiya verilmiş və diplomatik əlaqələr vasitəsilə müəyyən edilmişdir ki, bu xəbər Ermənistanın yalan və böhtandan ibarət təbliğatının tərkib hissəsidir və heç bir əsası yoxdur.

E.Abdullayev demişdir ki, ABŞ administrasiyası rəsmi olaraq "Dağlıq Qarabağ" adlı qondarma dövləti tanımır və Azərbaycanın suverenliyinə və ərazi bütövlüyünə hörmətlə yanaşır.

Ermənistan bu addımı ilə növbəti dəfə dünya ictimaiyyətini aldatmağa çalışmışdır. Bu cür siyasi imitasiya xarakterli hərəkətlər Azərbaycanı haqq işini daha qətiyyətlə tələb etməyə sövq edəcəkdir.

Azərbaycan hökuməti və xaricdəki diaspor təşkilatları Dağlıq Qarabağın Ermənistan tərəfindən işğal edildiyini dünya dövlətlərinin və beynəlxalq təşkilatların diqqətinə çatdıraraq torpaqlarımızın işğaldan azad olunmasını tələb etməkdə davam edəcəkdir. Bu istiqamətdə artıq bir sıra nailiyyətlər də əldə olunmuşdur. Məhz bu nailiyyətlərdən narahat olan Ermənistan mətbuatı əsassız xəbərlər yayaraq ictimai fikri yanlış istiqamətə yönəltməyə uğursuz cəhd göstərmişdir.

Azərbaycan.- 2012.- 19 may.- S. 4.