Ümummilli lider Heydər Əliyevin Azərbaycan elminin və təhsilinin inkişafında xidmətləri misilsizdir

Təhsil Nazirliyində ulu öndər Heydər Əliyevin anadan olmasının 89-cu ildönümünə həsr edilmiş tədbir keçirilmişdir.

AzərTAc xəbər verir ki, ali məktəb rektorlarının, təhsil işçilərinin iştirak etdikləri tədbirdə təhsil naziri Misir Mərdanov ümummilli lider Heydər Əliyevin müstəqil Azərbaycan dövlətinin yaradılmasında, möhkəmlənməsində və dünyaya tanınmasında tarixi xidmətlərindən danışmışdır.

Nazir hər yerdə ulu öndərin anadan olmasının 89-cu ildönümünə həsr edilmiş geniş tədbirlər keçirildiyini bildirmişdir.

Dahi rəhbər Heydər Əliyevin böyük xilaskarlıq rolunu xatırladan M.Mərdanov ulu öndərin siyasəti nəticəsində ölkəmizdə bütün sahələrin, o cümlədən iqtisadiyyatın, elmin, təhsilin, mədəniyyətin inkişaf etdiyini diqqətə çatdırmışdır.

Nazir böyük şəxsiyyət Heydər Əliyev ideyalarının Azərbaycan Prezidenti İlham Əliyev tərəfindən uğurla həyata keçirildiyini söyləmişdir.

Prezident İlham Əliyevin apardığı siyasətin uğurlu nəticələrindən bəhs edən nazir Azərbaycanın öz inkişafına görə dünyanın öndə gedən ölkələrindən biri olduğunu söyləmişdir. Qeyd etmişdir ki, Azərbaycan BMT-nin Təhlükəsizlik Şurasının qeyri-daimi üzvü seçilmişdir.

Müdrik dövlət xadimi Heydər Əliyev siyasi irsinin əhəmiyyətini vurğulayan M.Mərdanov ulu öndərin zəngin həyat və fəaliyyətinin ayrı-ayrı məqamlarından bəhs edən sənədli filmlərin təhsil müəssisələrində nümayiş etdirilməsinin zəruriliyini xatırlatmışdır.

Xalq artisti Vaqif Mustafayev müdrik rəhbər Heydər Əliyevin doğma Vətən və xalq qarşısındakı müstəsna xidmətlərindən danışmış, ümummilli liderin ideyalarının əbədi yaşayacağını vurğulamışdır. O, ulu öndərin zəngin həyat və fəaliyyətinə həsr olunmuş filmlərinin dünyanın müxtəlif ölkələrində nümayiş etdirildiyini və sonsuz maraqla qarşılandığını bildirmişdir.

Sonra V.Mustafayevin ulu öndər Heydər Əliyevin zəngin həyat və fəaliyyətinin ayrı-ayrı məqamlarından bəhs edən "Tale" və "Əsl məhəbbət haqqında" sənədli filmləri nümayiş etdirilmişdir.

Azərbaycan.- 2012.- 3 may.- S. 6.