Fransada Azərbaycana həsr olunan radioverilişində AzərTAc-ın materiallarından istifadə edilmişdir

Strasburqda fəaliyyət göstərən "Azərbaycan evi"nin təşəbbüsü ilə Fransada Azərbaycana həsr olunmuş növbəti radioverilişində ölkəmizdə keçiriləcək "Eurovision-2012" beynəlxalq mahnı müsabiqəsinə dair xəbər səslənmişdir. Xəbərdə ötən ilin mahnı yarışmasında Azərbaycan təmsilçilərinin qələbəsi, bu il müsabiqənin Azərbaycanda keçiriləcəyi, "Eurovision-2012"nin keçirilməsi üçün konsert salonunun qısa bir vaxtda tikilməsi, mahnı müsabiqəsində 42 dövlətin iştirakı barədə dinləyicilərə məlumat verilmişdir.

Fransız dilində yayımlanan radioverilişində daha çox Azərbaycan Dövlət Teleqraf Agentliyinin (AzərTAc-ın) materiallarından istifadə edilmişdir. Kolumbiya Senatının Azərbaycanın ərazi bütövlüyünü dəstəkləməsi, Latın Amerikası ölkələri arasında Meksikadan sonra Xocalı faciəsinə münasibət bildirməsi və onu soyqırımı kimi qiymətləndirməsi barədə məlumatlar da verilişdə yer almışdır. Bundan əlavə, verilişdə həmçinin Xocalı faciəsinin soyqırımı kimi tanınmasına 102 senatorun səs verdiyi, beynəlxalq ictimaiyyət tərəfindən bu hadisələrə siyasi-hüquqi qiymətin verilməsi istiqamətində Azərbaycan diplomatiyasının uğurlarından bəhs olunmuşdur.

Bu ilin yanvar ayında Londonda Heydər Əliyev Fondunun vitse-prezidenti Leyla xanım Əliyevanın təşəbbüsü ilə açılmış "Bakıya uçuş. Müasir Azərbaycan incəsənəti" sərgisinin aprelin 11-də Parisdə nümayiş etdirildiyi, tədbirin rəsmi açılışında Azərbaycanın birinci xanımı, Heydər Əliyev Fondunun prezidenti Mehriban Əliyevanın, Fransanın mədəniyyət və kommunikasiya naziri Frederik Mitteranın iştirak etmələri haqqında məlumat verilmişdir.

Aprelin 20-də qədim sivilizasiyanın məskəni hesab olunan İtaliyanın paytaxtı Romada dahi Azərbaycan şairi Nizami Gəncəvinin abidəsinin təntənəli açılışı və bu tədbirdə Heydər Əliyev Fondunun prezidenti Mehriban xanım Əliyevanın iştirakı və çıxışı radioverilişinin ən maraqlı materiallarından biri kimi səsləndirilmişdir.

Radioverilişində may ayının 15-16-da Strasburqda Fransadakı Uyğur Tələbə Cəmiyyəti tərəfindən Uyğur Mədəniyyəti Günlərinin keçiriləcəyi və buna hazırlıq barədə məlumat da verilmişdir.

Verilişin Azərbaycan-Türkiyə dostluq münasibətlərindən bəhs edən materialında isə Tbilisidəki Diplomatiya və Hüquq məktəbində Türkiyə Baş nazirinin müavini Əli Babacanın çıxışına yer verilmiş, əsas diqqət onun "Ermənistan ilə Azərbaycan arasında münaqişə həll olunmayanadək Türkiyə Sürixdə imzalanmış protokoldan irəli gələn hər hansı müddəanı həyata keçirməyəcəkdir" sözlərinə yönəldilmişdir.

Sonda Azərbaycan mətbuatının geniş xülasəsi verilmiş, ölkəmizdə baş verən mühüm hadisələr barədə məlumatlar dinləyicilərə çatdırılmışdır.

Xatırladaq ki, Azərbaycan musiqisi ilə müşayiət olunan iki saatlıq verilişi hər ayın sonuncu bazar günü yerli vaxtla saat 15-dən 17-dək (Bakı vaxtı ilə 18-dən 20-dək) FM kanalı vasitəsilə 91.9 MHZ tezlikdə dinləmək mümkündür. Verilişin materialları ilə www.radiorbs.com saytından tanış olmaq olar.

Əsgər ƏLİYEV

Azərbaycan.- 2012.- 3 may.- S. 7.