MƏTBUAT TARİXİMİZİN ƏN UNUDULMAZ GÜNLƏRİNDƏN BİRİ

Azərbaycan jurnalistləri üçün böyük tarixi əhəmiyyət kəsb edən bir neçə unudulmaz gün var. Müstəqil mətbuatın meydana gəlməsi və formalaşması, söz və ifadə azadlığının qorunması və inkişafı ilə bağlı olan həmin günlər mətbuat tariximizin şərəfli səhifələrini təşkil edir. Şübhəsiz, ən yaddaqalanı 22 iyul 1875-ci il - Həsən bəy Zərdabinin yaratdığı "Əkinçı" qəzetinin ilk nömrəsinin çapdan çıxdığı gündür. Milli mətbuatımızın tarixi həmin gündən başlayır. Maraqlıdır ki, qəzetin senzoru özündən qabaq müəyyənləşmişdi və faktiki olaraq "Əkinçi" azad doğulmamışdı.

İkinci mühüm tarixi isə Azərbaycan mətbuatının senzuranın buxovlarından azad edildiyi gündür. Bu günün banisi isə ulu öndər Heydər Əliyevdir. Məhz ümummilli liderimizin qətiyyət və cəsarəti sayəsində 6 avqust 1998-ci ildə mətbuata senzura nəzarəti ləğv edilmiş, ölkə tarixində ilk dəfə olaraq KİV-lər tam müstəqil və sərbəst fəaliyyət göstərməyə başlamışlar. Anadan olmasının 89-cu ildönümünü qeyd etməyə hazırlaşdığımız ulu öndər Heydər Əliyev həm də Azərbaycan tarixində "Jurnalistlərin dostu" adını almış birinci dövlət başçısıdır.

Ulu öndər Heydər Əliyev çox çətin, zəhmət və mübarizə ilə dolu ömür yaşamışdır. Sadə bir ailədə dünyaya göz açan bu zəka və istedad sahibi siyasət olimpinin zirvəsinə yüksəlmiş, SSRİ adlı superdövlətin ikinci şəxsi olmuşdur. Sonra paxıl və qısqanc adamların məkrli oyunları nəticəsində böyük siyasətdən uzaq düşmüş, doğma vətəni Naxçıvana qayıtmışdır. Lakin burada da xalqa xidmət missiyasını bir an belə unutmamışdır. O zamankı Azərbaycan rəhbərliyinin "gözündən düşən" doğma vətənimizin ayrılmaz hissəsi Naxçıvanın düşmən qarşısında duruş gətirməsi, aclıqdan və soyuqdan qorunması üçün əlindən gələni əsirgəməmişdir. Şəxsi nüfuzu və fədakarlığı sayəsində blokadanın doğura biləcəyi ziyan və təhlükələri vaxtında aradan qaldıra bilmişdir. Həm də ulu öndər Heydər Əliyev təkcə Naxçıvanı fəlakətdən qurtarmadı.

Azərbaycanın dövlət müstəqilliyi barədə Konstitusiya Aktı qəbul edildikdən sonra həqiqi müstəqilliyə nail olunması üçün çox iş görülməli idi. Lakin o zaman Azərbaycana başçılıq edən maymaq, qorxaq, təcrübəsiz və səriştəsiz insanlar zəruri addımlar ataraq islahatlar keçirmədiklərindən nəinki müstəqilliyi möhkəmləndirdilər, əksinə dövləti məhvolma həddinə çatdıraraq qaçıb aradan çıxdılar. Xalqın arzu və təkidli xahişinə biganə qalmayan ulu öndər Heydər Əliyev yenidən ölkə rəhbərliyinə qayıtdı, dövlət müstəqilliyini əbədiliyə çevirərək müasir Azərbaycan dövlətinin banisi kimi tarixə düşdü!

Ulu öndər Heydər Əliyevin doğum günü Azərbaycanda söz və mətbuat azadlığını yüksək qiymətləndirən hər bir şəxs üçün əziz və unudulmaz tarixdir. Çünki Heydər Əliyev həm də mətbuat tariximizdə azad və müstəqil mətbuatın formalaşmasının banisidir, senzurasız mətbuatın təməlqoyanıdır.

Heydər Əliyev şəxsiyyəti və fəaliyyəti jurnalistlər üçün daim böyük məna və əhəmiyyət kəsb edib. Bu əlaqədə həmişə hər iki tərəf maraqlı olub. Ümummilli liderimiz mətbu sözdən, onun imkanlarından həmişə məharətlə istifadə edib, ictimai rəyin yaranmasında, formalaşmasında və düzgün istiqamətləndirilməsində mətbu sözün imkanlarından bacarıqla faydalanıb. Jurnalistlər isə ulu öndərin gördükləri işlərin tarixi əhəmiyyətini lazımınca qiymətləndirdiklərindən daim onunla təmasa girməyə, hadisələr barədə rəyini öyrənərək xalqa çatdırmağa can atıblar. Jurnalist əməyinə ən dəqiq və dolğun qiyməti də məhz ümummilli lider Heydər Əliyev vermişdir: "Jurnalist əməyi qeyri-adi əməkdir, olduqca böyük, zəhmətli əməkdir, çox səylər göstərilməsini, hətta cəsurluq, hünər, fədakarlıq tələb edən əməkdir, öz peşəsinə vurğunluq tələb edən əməkdir".

Azərbaycan və dünya jurnalistlərinin ulu öndər Heydər Əliyevin şəxsiyyətinə böyük maraq göstərmələri səbəbsiz deyildi. Özündən əvvəlki bütün rekordları qıran ümummilli liderimiz həm də bir sıra yeni - qeyri-adi rekordlara imza atmışdır.

Heydər Əliyev Azərbaycanın ən uzunömürlü dövlət rəhbəri olmuşdur.

Heydər Əliyev bir türk oğlu kimi Kremlə işləməyə aparılan, SSRİ-nin rəhbərlərindən birinə çevrilən, uğurla fəaliyyət göstərərək sağ-salamat geriyə qayıdan ilk azərbaycanlıdır.

Heydər Əliyev "vurulduqdan" sonra hər şeyə təzədən başlamaqla yenidən dövlət başçısı vəzifəsinə seçılmiş şəxsiyyətdir.

Heydər Əliyev ən çox beynəlxalq görüş keçirib danışıqlar aparan, ən çox saziş, müqavilə və müxtəlif sənədlərə imza atan dövlət xadimidir.

Heydər Əliyev Xəzərin karbohidrogen ehtiyatlarını dünya üçün yenidən "kəşf" edərək onu Avropanın təchizatına yönəldən müstəqil dövlət başçısıdır.

Heydər Əliyev qeyri-adi, fenomen insan sayılırdı. Həyatın bütün sahələrinə dair dərin və zəngin biliyə, "kompyuter yaddaşa" malik idi. Sutkada 18 saat işləməyi, saatlarla müxtəlif mövzularda mətnsiz - sinədəftər çıxışlar etməyi bacarırdı. İki dəfə dövlət çevrilişi cəhdinin qarşısını almışdı, özünə qarşı törədilməsi nəzərdə tutulan üç sui-qəsd əməli isə baş tutmamışdı. Heydər Əliyev həm də jurnalistlərlə ən çox görüşüb təmasda olan və onların suallarını cavablandıran dövlət başçısı olmuşdur.

Jurnalistlərin bu dahi insanla görüşməyə can atmaları səbəbsiz deyildi. Çünki Heydər Əliyev təkcə dəyərli informasiya verməklə kifayətlənmirdi, həm də jurnalistləri öyrədir, yetişdirir, dünyagörüşlərini zənginləşdirirdi. Əslində müəyyən mənada bizlərə jurnalistika dərsi keçirdi. Bütün bunlar öz axarında, "nəzərə çarpmadan" baş verərdi. Ulu öndər gündəmə daim maraqlı və aktual mövzular çıxarmağı bacarırdı. Belə mövzular o qədər cəlbedici və vaxtı çatmış sayılırdı ki, qəzetlər öz mövzularını buraxaraq ondan yapışırdılar. Həm də gündəmə gətirdiyi məsələləri səmtləndirməyin, lazımi məcraya yönəltməyin də ustası idi.

Heydər Əliyevin mətbuat üçün prioritet saydığı mövzular da vardı. Onların sırasında dövlət quruculuğu, demokratik inkişaf, vətənpərvərlik tərbiyəsi, dünya birliyinə inteqrasiya məsələləri, habelə xarici siyasət, Ermənistan-Azərbaycan, Daglıq Qarabag münaqişəsi, qaçqın və məcburi köçkünlərin problemləri, Azərbaycançılıq ideologiyası, milli-mənəvi dəyərlə bağlı mövzular xüsusi yer tuturdu. Əslində ulu öndərin tövsiyə etdiyi mövzular bu gün də öz aktuallığını qoruyub saxlayır.

Ümummilli liderimiz "Jurnalistlərin dostu" adına layiq görülmüş ilk dövlət başçısı olmaqla mükafatı almazdan çox-çox qabaq həmin adı doğrultmuşdu. Bu mükafat ona müstəqil mətbuatın inkişafı naminə atdığı addımlara - mətbuatın və jurnalistlərin sərbəst və maneəsiz fəaliyyət göstərmələrinə imkan yaradan qanunçuluq bazasını formalaşdırdığına, qəzetləri əlavə dəyər və mənfəət vergisindən azad etdiyinə, onların kreditlər almalarına şərait yaratdığına, bütövlükdə müstəqillik dövründə KİV-lərə diqqət və qayğısına görə verilmişdi.

Biz jurnalistlər bu gün də ulu öndəri özümüzün ən böyük dostu və xeyirxahı hesab edirik!

Onun qətiyyət və cəsarəti sayəsində senzura nəzarətindən qurtulan Azərbaycan mətbuatı yeni və sürətli inkişaf yoluna çıxaraq ölkənin demokratikləşməsi prosesinə dəyərli töhfəsini verdi!

Nə qədər ki, müstəqil mətbuat, azad söz var, ümummilli lider Heydər Əliyev də sonsuz hörmət və məhəbbətlə yad ediləcəkdir!

Azərbaycan.- 2012.- 4 may.- S. 6.