“İrəli” İctimai Birliyinin ikinci hesabat-seçki konfransı keçirilmişdir

Mayın 5-də Heydər Əliyev Sarayında "İrəli" İctimai Birliyinin nizamnaməsinə əsasən, təşkilatın ikinci hesabat-seçki konfransı keçirilmişdir.

AzərTAc xəbər verir ki, konfransın təşkilat komitəsinin sədri Hikmət İsmayılov iştirakçıları təbrik etmiş və tədbirin əhəmiyyətindən danışmışdır. O, bugünkü tədbirin təşkilatın həyatında önəmli bir tarix olduğunu diqqətə çatdırmışdır. H.İsmayılov konfransda 1784 nəfər qeydiyyatdan keçmiş iştirakçıdan 1693-nün iştirak etdiyini bildirmişdir. Natiq konfransda təşkilatın yeni loqotipinin təqdim olunacağını, həmçinin yeni sədrin və nəzarət-təftiş komissiyasının üzvlərinin seçiləcəyini bildirmişdir.

Azərbaycan Respublikasının dövlət himni səsləndirildikdən sonra təşkilatın fəaliyyətini əks etdirən "İrəli 2008-2012" hesabat filmi nümayiş etdirilmişdir.

Konfransda əvvəlcə say və katiblik komissiyalarının üzvləri seçilmişlər.

"İrəli" İctimai Birliyinin sabiq sədri, Milli Məclisin deputatı Ceyhun Osmanlı ötən dövr ərzində həyata keçirilən layihələr və görülən işlər barədə məlumat vermişdir.

C.Osmanlı Azərbaycanın Vətən uğrunda canlarından belə keçməyi bacaran qəhrəman oğullarından, ölkəmizi ən ali tribunalarda təmsil etməyi bacaran, dünyada tanıdan gənclərindən danışmış və bildirmişdir ki, bu gün hər bir gənc tariximizə, keçmişimizə, mədəniyyətimizə, incəsənətimizə dərindən bələd olmalıdır. O, tarix boyu demokratik təfəkkürə sahib olan Azərbaycanın bu gün də həmin ənənələri davam etdirdiyini diqqətə çatdırmışdır.

C.Osmanlı bildirmişdir ki, "İrəli" Vətən deyib, öndə olanların təşkilatıdır. O qeyd etmişdir ki, bugünkü Azərbaycan gəncliyi dövlətimizin, onun seçilmiş hakimiyyətinin və qazanılan bütün uğurlarının qədrini bilməli, ona sahib çıxmalıdır. Şərqin ilk demokratik dövləti olan Azərbaycanı, onun parlamentini yaradan şəxsiyyətlərimizi xatırlayan təşkilatın sabiq sədri, bizə miras qalan ənənələrin qorunmasının vacibliyini vurğulamışdır.

Konfransda "İrəli" İctimai Birliyinin mərkəzi nəzarət-təftiş komissiyası adından Mahir Məmmədov təşkilatın cari dövr üçün fəaliyyət hesabatı barədə iştirakçıları məlumatlandırmışdır.

Bildirilmişdir ki, "İrəli" yalnız Azərbaycanın deyil, regionun ən böyük və peşəkar gənclər təşkilatlarından biridir. Təşkilatın cari dövr ərzində bir çox layihələr həyata keçirdiyini diqqətə çatdıran M.Məmmədov layihələr çərçivəsində nəşr edilmiş kitablar və s. barədə iştirakçılara ətraflı məlumat vermişdir.

Gənclər və idman naziri Azad Rəhimov "İrəli"nin yarandığı vaxtdan ətrafında fəal, intellektual səviyyəli, vətənpərvər gəncləri birləşdirməyi qarşısına məqsəd qoyduğunu bildirmişdir. Nazir təşkilatın təkcə Bakı ilə məhdudlaşmadığını, həm də regionlara üz tutduğunu, beləliklə, bütün Azərbaycan gəncliyini ətrafında birləşdirdiyini mühüm amil kimi vurğulamışdır.

A.Rəhimov bildirmişdir ki, "İrəli" bu gün Azərbaycanın rayonlarında yaşayan gənclərin də ictimai sahədə və vətəndaşlıq məktəbi istiqamətindəki fəaliyyətlərinin genişləndirilməsinə yaxından köməklik göstərməyə çalışır.

A.Rəhimov təşkilata üzv olan 20 mindən artıq gəncin öz ideyaları ilə "İrəli"ni gücləndirdiyini və inkişaf etdirdiyini diqqətə çatdırmışdır. Qeyd etmişdir ki, bu, Azərbaycan gənclərinin təşəbbüskar, sözün yaxşı mənasında, əsl vətəndaş kimi yetişməsinin sübutudur. Nazir "İrəli"nin fəal təşkilat olmaqla çoxsaylı sahələri əhatə etdiyini vurğulamışdır.

Azad Rəhimov öz sıralarında Azərbaycanın bilikli, yüksək dünya görüşünə malik gənclərini birləşdirən "İrəli"nin bundan sonra inkişaf sahələrini daha da genişləndirəcəyinə, böyük uğurlara nail olacağına əminlik ifadə etmişdir.

Azərbaycan Respublikasının Prezidenti Administrasiyasının siyasi təhlil və informasiya təminatı şöbəsinin müdiri Elnur Aslanov konfrans iştirakçılarını əlamətdar hadisə münasibətilə təbrik etmişdir. O, bütün demokratik ənənələrə riayət edilərək keçirilən konfransın istər "İrəli" İctimai Birliyinin, istərsə də Azərbaycanın digər qeyri-hökumət təşkilatlarının tarixində uzun müddət qalacağını bildirmişdir.

Şöbə müdiri qeyd etmişdir ki, "İrəli" 20 minlik bir ordudur. Bu ordunu Prezident Administrasiyası adından salamlayan Elnur Aslanov Azərbaycan gəncliyinə gələcək fəaliyyətində də daim təşəbbüskarlıq nümayiş etdirməyi, uğurlu layihələr həyata keçirməyi və yüksək intellektual potensialını qoruyub saxlamağı tövsiyə etmişdir.

E.Aslanov konfransın iştirakçısı olan gənclərə müraciətlə demişdir: "Siz böyük millətin, qədim tarixi və zəngin mədəniyyəti olan bir məkanın övladlarısınız. Siz Cavanşirin, Tomrisin, Pənah xanın, Cavad xanın, Əhməd bəy Ağaoğlunun, Əlibəy Hüseynzadənin, Fətəli xan Xoyskinin, Əlimərdan bəy Topçubaşovun, Məmməd Əmin Rəsulzadənin və Heydər Əliyevin övladları və tələbələrisiniz. Sizlər Azərbaycanın bu günü və sabahısınız.

Sizlər Azərbaycanın 28 may, 15 iyun, 18 oktyabr tarixlərini yaşadan gənclərsiniz. Siz Azərbaycanımızı parlaq gələcəyə doğru aparan bir qüvvəsiniz. Azərbaycan gəncliyi olaraq siz bu ölkəni inkişaf etdirən, gələcək nəsillərə təhvil verən, onun siyasi və iqtisadi potensialını yeni mərhələyə qaldıran şəxslərsiniz. Biz də bu yolda sizinlə birlikdəyik".

Prezident Administrasiyasının şöbə müdiri bildirmişdir ki, Azərbaycanın gənclər siyasətinin həyata keçirilməsində iki əsas prioritet vardır. Birinci prioritet təşəbbüskar və intellektual gəncliyin formalaşdırılmasıdır. Razılıq hissi ilə qeyd etmək olar ki, hazırda bu müsbət tendensiyanı gənclərimiz arasında görmək mümkündür. İkinci prioritet isə Azərbaycan gənclərinin iş yerləri ilə təmin olunmasıdır. Şöbə müdiri Prezident İlham Əliyevin müvafiq sərəncamı ilə təsdiq edilmiş "Azərbaycan gəncliyi 2011-2015-ci illərdə" Dövlət Proqramının bu istiqamətdə görülən işlərin sübutu olduğunu bildirmişdir.

Prezident Administrasiyasının siyasi təhlil və informasiya təminatı şöbəsinin müdiri son illər ərzində ölkədə 900 min iş yerinin açıldığını və bu istiqamətdə tədbirlərin davam etdirildiyini diqqətə çatdırmışdır.

Azərbaycan iqtisadiyyatının bütövlükdə Cənubi Qafqaz iqtisadiyyatının 80 faizini təşkil etdiyini bildirən Elnur Aslanov ölkəmizin bu gün regionun lider dövlətinə çevrildiyini demişdir. Başlıca problemimizin Ermənistan-Azərbaycan, Dağlıq Qarabağ münaqişəsi olduğunu vurğulayan şöbə müdiri torpaqlarımızın sülh yolu ilə işğaldan azad edilməsinə nail ola bilməsək, Ali Baş Komandanın əmri ilə hər bir azərbaycanlının əsgərə çevrilərək ərazilərimizi azad etməyə hazır olduğunu diqqətə çatdırmışdır.

Konfransda "İrəli" İctimai Birliyinin yeni loqotipinin təqdimatı olmuşdur.

Daha sonra təşkilatın mərkəzi nəzarət-təftiş komissiyasının yeni üzvləri müəyyənləşmişdir. Komissiya üzvlüyünə səs çoxluğu ilə Leyla Yolçiyeva, Orxan Əmrahov, Kövsər Orucova, Xəqani Fərəcov və Dünya Fərzəliyeva seçilmişlər.

Konfransda "İrəli" İctimai Birliyinin yeni sədri vəzifəsinə isə Rauf Mərdiyev seçilmişdir.

"İrəli"nin yeni sədri bu gün ətrafında 20 mindən artıq Azərbaycan gəncini birləşdirən bir təşkilatın fəaliyyət istiqamətlərinin gələcəkdə daha da genişləndirilməsinə çalışacağını bildirmişdir. R.Mərdiyev bir neçə il bundan əvvəl cəmi altı nəfərlik heyətlə fəaliyyətə başlayan təşkilatın bu gün Azərbaycan dövlətinin inkişafı istiqamətində daha böyük potensialla çalışmaq gücündə olduğunu demişdir. O, "İrəli"nin sıralarının bundan sonra daha da genişlənəcəyinə, ətrafında daha çox gənci birləşdirəcəyinə əminliyini ifadə etmişdir.

AzərTAc

Azərbaycan.- 2012.- 6 may.- S. 5.