Azərbaycanın paytaxtı kimi, bölgələri də əzəmətli və füsunkardır

Şəkidə gördüyümüz turistlər də belə düşünür

2700 ilə yaxın yaşı olan dağlar diyarı Şəki planetimizin Şimal yarımkürəsində, subtropik qurşağın sərhədində, Baş Qafqaz sıra dağlarının cənub ətəklərində yerləşir. Tarix boyu bu dağlar diyarını məşhurlaşdıran, tanıtdıran onun füsunkar təbii gözəllikləri ilə yanaşı, həm də adı dillər əzbərinə çevrilmiş sənətkarları olub.

Memarlıq, daşoyma və taxtaoyma, dulusçuluq, dəmirçilik, misgərlik, zərgərlik, ipəkçilik, şəbəkəçilik sənəti ilə Şəkinin şan-şöhrəti çox ellərə, çox ölkələrə yayılıb. Hələ Şəkinin ləziz-ləziz yeməkləri, pitisi, halvası, növbənöv şirniyyatı...

Xan sarayı, Karvansara, Kişdəki Alban məbədi kimi tarixi abidələr, eləcə də digər görməli yerlər istər xarici, istərsə də daxili turistlərin can atdığı məkanlardır. Bu günlər Azərbaycan paytaxtının 57-ci "Eurovision-2012" mahnı müsabiqəsinə ev sahibliyi etməsi ilə bağlı bütün diqqətlər Bakıya yönəlsə də, qədim Şəkinin də qonaq-qarası az deyil. Möhtəşəm mahnı müsabiqəsi ilə əlaqədar Azərbaycan paytaxtına gəlmiş turistlər imkan tapan kimi bir günlüyə də olsa Şəkini də ziyarət etmək şanslarını qaçırmırlar.

Rusiyanın Kaluqa vilayətindən gəlmiş İrina və Nikolay Zıkinlər bugünkü Bakını əfsanələr və nağıllar şəhəri adlandırırlar. Nikolay qeyd edir ki, sonuncu dəfə Azərbaycana (Bakıya) sovetlər dönəmində gəlib:

- Bakı o vaxt da gözəl idi. Ancaq indiki Bakı müqayisəolunmaz dərəcədə dəyişib, inkişaf edib, dünyanın ən gözəl, ən müasir şəhərlərindən birinə çevrilib. Azərbaycanlılar həmişə mehriban və qonaqpərvər olublar. İndi də belədir. Mənə çox xoşdur ki, belə möhtəşəm şou Bakıda keçirilir. Bu, elə-belə olmadı. Bunu sizin istedadlar qazandılar və bu tədbirin Bakıda keçirilməsinin səbəbkarı oldular. Şəki haqqında çox eşitmişik. Qısa vaxta da olsa Şəkini görmək, onun qədim abidələri ilə tanış olmaq istədik. Şəkiyə gəlib çatana qədər yol boyu keçdiyimiz yerlər, gördüyümüz mənzərələr yaddaşımızdan heç vaxt silinməz. Azərbaycanda çox böyük, bənzərsiz inkişaf gördük. Müsabiqədə bizim nənələrə də, sizin Səbinəyə də uğurlar arzulayırıq.

Avstraliyadan gəlmiş John Patterson və Ryie Budces bir həftəyə yaxındır ki, Şəkidədirlər. Xan sarayından, Karvansaradan, gördükləri sənətkarlıq nümunələrindən maraqla danışırlar. Şəkililərin istiqanlığı, qonaqpərvərliyi onları valeh edib. Bildirirlər ki, "Eurovision-2012" mahnı müsabiqəsinin birinci turunu hoteldə mavi ekran vasitəsilə izləyiblər:

- Afərin Azərbaycana! "Baku Crystal Hall"da elə bir gözəllik yaradıblar ki, bunu heç bir ölkə ilə müqayisə etmək olmaz. Müsabiqə Şəkidən də çox maraqlı görünür. Burada da yaşından asılı olmayaraq hamı bu möhtəşəm musiqi yarışması ilə maraqlanır. Maraqlı bir məqam da odur ki, birinci turun səhərisi günü bir çox müsabiqə mahnılarını artıq küçədə, maşında disklərdən eşitdik. Bu, musiqiyə və mədəniyyətə məhəbbətdən, başqa sözlə, diqqətdən və orijinallıqdan irəli gəlir. Şəki nə qədər maraqlı və gözəl olsa da, bu günlər adam Bakı üçün, onun dənizi, bənzərsiz gecə həyatı, müasir və səmimi insanları üçün darıxır. Ancaq bu gözəl Şəkini, bu sadə və mehriban insanları da unutmayacağıq. Qoy həmişə Azərbaycanda sülh, əmin-amanlıq, firavanlıq olsun!

Enrike Sançes İspaniyadan gəlib. Tək səyahət etməyi xoşlayır. Ölkəmizdən, xalqımızdan çox məhəbbətlə danışır. Deyir ki, o qədər mehribanlıq göstərirlər ki, hərdən adam özünü itirir. Düşünürsən ki, bunlara neyləmişəm ki, mənə belə səmimiyyət və məhəbbət göstərirlər.

Enrike bildirir ki, Şəkidə ona kiçik hədiyyələr də bağışlayıblar. Hətta evə çay içməyə də dəvət ediblər. Ölkəmizin keçənilki müsabiqə qaliblərinə təşəkkür edir ki, "Eurovision-2012" Bakıda oldu və o da bu füsunkar yerlərə gəlib çıxdı. O, Azərbaycana yenə birincilik arzuladı.

Bəli, "Azərbaycan", "Bakı", "Şəki" kəlmələri xarici qonaqların dilində çox məhəbbətlə səslənir. Bu məhəbbətdən isə qürur duymamaq olmur. Bu vətən bizimdir, onu sevmək nə qədər xoşdursa, onun sevildiyini, sevgilərə, ən xoş sözlərə layiq olduğunu eşitmək, ən nəhayət, belə gözəl məmləkətdə yaşamağın fərqində olmaq özü də çox xoşdur.

Telman NƏZƏRLİ

Azərbaycan.- 2012.- 26 may.- S. 7.