Luc Sermeus: Bakının təmizliyi, insanların qonaqpərvərliyi adamı valeh edir

Bakının təmizliyi, insanların qonaqpərvərliyi adamı valeh edir. Burada gördüklərim məndə çox xoş təəssüratlar yaratmışdır.

Bu sözləri AzərTAc-a müsahibəsində Belçikadan gəlmiş jurnalist Luc Sermeus demişdir.

Bildirmişdir ki, on bir ildir jurnalist kimi "Eurovision" mahnı müsabiqəsinə qatılır. Artıq iki həftədir Bakıda olduğunu deyən Luc Sermeus şəhər turuna çıxdığını, qədim və müasir memarlıq nümunələrini seyr etdiyini nəzərə çatdırmışdır.

Luc Sermeus bir jurnalist kimi "Eurovision" mahnı müsabiqəsini işıqlandırmaq üçün Mətbuat Mərkəzində KİV nümayəndələri üçün hər cür şərait yaradıldığını, könüllülərin fəaliyyətindən razılığını söyləmişdir.

Bakı şousunun müvəffəqiyyətlə davam etdiyini bildirən belçikalı jurnalist "Baku Crystal Hall"un gözəl və modern, ən müasir standartlara cavab verən hər bir şeylə təchiz olunduğunu diqqətə çatdırmışdır.

Məşqlərdə iştirak etmiş Luc Sermeus Rusiya, İsveç, Azərbaycan təmsilçilərinin ifalarını yüksək qiymətləndirmişdir. Sevimli ifaçısının Makedoniya təmsilçisi olduğunu deyən belçikalı jurnalist bütün iştirakçılara uğurlar arzulamışdır.

Azərbaycan.- 2012.- 27 may.- S. 9.