20 İLLİK NAİLİYYƏTLƏRİN MÖHTƏŞƏM TƏSDİQİ

 

Baş redaktordan

 

"Eurovision" Bakıya elə-belə, təsadüfən gəlməyib! Onu Azərbaycan xalqı və dövləti gətirib! Təbii ki, qazandıqları iqtisadi və siyasi uğurlar, bir də möhtəşəm yarışmadakı qələbə sayəsində!

"Eurovision" hərilki müsabiqənin keçiriləcəyi məkanı özü seçmir, yarışma sonuncu qalibin vətəninə salınır! Üstəlik, özünə güvənən, bu yarışmanı keçirməyə bacarıq və qabiliyyəti, eyni zamanda imkan və şəraiti olan dövlətlər belə bir iddiaya qol qoyurlar! Müstəqil Azərbaycan bu fikrə düşdü və çox az müddətdə məqsədinə çatdı!

Azərbaycanın ən böyük və nüfuzlu tədbirləri keçirmək üçün zəruri imkanları var. Əvvəla, Cənubi Qafqazın ən modern və nüfuzlu dövlətidir. 155 dövlətin dəstəyi ilə BMT Təhlükəsizlik Şurasına üzv seçilməsi ona olan etimadı daha da artırmışdır. İkincisi, ölkəmizin böyük maliyyə imkanlarına  malik olması tədbirlərin tələb etdiyi vacib şəraitin qısa müddətdə təşkilinə şərait yaradır. Ən nəhayət, son dövrlərdə ölkəmizdə dalbadal beynəlxalq səviyyəli görüş və tədbirlərin, idman yarışlarının təşkili bu sahədə zəruri təcrübənin toplanmasına səbəb olmuşdur.

Avropa məkanında, Avropa mədəniyyəti prinsipləri əsasında keçirilən musiqi yarışmasında qalib gəlməyimiz və 57-ci "Eurovision"un müstəqil Azərbaycanda keçirilməsi hüququnu qazanmağımız hələ işin birinci yarısı idi. Əsas məsələ yarışmanın bütün cəhətləri nəzərə alınmaqla təşkili, qonaqların rahat qarşılanıb yerləşdirilməsinin təmini, musiqiçilərin məşq və çıxışlarına normal şəraitin yaradılması, onların asudə vaxtlarının səmərəli keçirilməsi, habelə təhlükəsizlik və digər tədbirlərin icrası idi. Tədbirin təşkilatçıları qarşıya təkcə yarışmanın yüksək səviyyədə keçirilməsini yox, həm də  qonaqların asudə vaxtlarının mənalı təşkilini də məqsəd qoymuşdular. Və bu niyyət onlara müyəssər oldu!

Bakı şəhəri yarandıqdan bu günədək belə sürətli və genişmiqyaslı tikinti-quruculuq görməmişdi. Küçələrin təmiri və yeni yolların çəkilməsi, təzə binaların tikilməsi və müasir infrastruktur yaradılması, köhnə binaların yenilənməsi və parkların yenidənqurulması prosesi "Eurovision" müsabiqəsində qalib gəlməmizdən çox-çox əvvəl başlanmışdı və bundan sonra neçə illər də davam edəcəkdir. Amma çoxminli qonaqların qəbuluna hazırlıq bəzi layihələrin icra sürətini xeyli artırmağı da tələb edirdi. Azərbaycan iqtidarı başladığı çoxcəhətli və əhatəli işləri günün tələblərinə uyğun şəkildə vaxtında yekunlaşdırmağı bacardı!

Mavi Xəzərin qoynunda, sovet dövründə hərbi baza yerləşən yerdə son dərəcə müasir və möhtəşəm "Bakı Kristal Zalı" rekord sürətilə tikilərək yarışanların ixtiyarına verildi. Dənizkənarı Milli Park daha 1,8 kilometr böyüdülərək Dövlət Bayrağı Meydanına çatdırıldı. İnsanların rahatlığı və vaxtını mənalı keçirməsi üçün Dənizkənarı Milli Parka yeni avtomobillər və avtobuslar, dənizdə üzməyə katerlər, gəmilər gətirildi, əyləncəli qurğuların sayı artırıldı. Qədimliklə müasirliyin vəhdətinə qovuşan İçərişəhər açıq səma altında nəhəng muzeyə çevrildi. Qız qalası yeni formada təqdim olundu. Bu tarixi məkanda dalbadal keçirilən tədbirlər, turist gəzintiləri, suvenir satışı, yəqin ki, Bakının qonaqlarının xatirində uzun müddət yaşayacaqdır. Heç zaman ölkəmizdə bu qədər sayda bir-birindən gözəl beşulduzlu hotellər istifadəyə verilməmişdi. Üzərlərində "Eurovision - 2012"-nin emblemi olan yeni avtobuslar və taksilər isə az qala paytaxt küçələrinin atributuna çevrilmişdir. Qonaqları ən çox razı salan məqamlardan biri isə, şübhəsiz, Azərbaycan mətbəxi oldu. Onlar ilk  təmasdan "düşbərə", "kabab", "paxlava" sözlərini əzbərlədilər.

Jurnalistlərlə təmasa girən, KİV-lərə müsahibə verən qonaqlar heyranlıqlarını gizlətmirdilər. Onların əksəriyyəti etiraf edirdi ki, ayaqları Bakının hava limanına dəyən andan ölkəmiz haqqında təsəvvürləri tam dəyişmişdir! Hansısa müsəlman dövlətini, ərəb mühitini  andıran məkana gələcəklərini güman edirmişlər. Ancaq hamısı memarlıq simasında milliliklə müasirliyi birləşdirən, yeni şəhər elementlərinə malik, əhalisi isə Avropa və dünya mədəniyyətinə yiyələnmiş mehriban insanlardan ibarət Bakıya gəldiklərindən məmnun qaldıqlarını söylədilər. Xüsusən şəhərin müsabiqəyə hazırlığı, müsabiqənin təşkili və keçiriləcəyi məkanın möhtəşəmliyi barədə ağızdolusu danişdılar. İlk baxışdan onları razı salan məqamlardan biri şəhərimizdəki sabitlik və təhlükəsizlik vəziyyəti idi. "Elə zənn edirik ki, öz evimizdəyik" - çoxları əminliklərini bu sözlərlə ifadə edirdilər. Şübhə yoxdur ki, doğmaları və yaxınları ilə bölüşmək üçün geriyə qayıdanda həmin təəssüratları özləri ilə apardılar!

Artıq 57-ci "Eurovision" da tarixə çevrildi. Təbii ki, müxtəlif və maraqlı anları kino və telelentlərə köçürülməklə, fotolar qəzet və jurnal səhifələrində "əyani" formada saxlanmaqla! Burada yaşanan xoş anlar, musiqili dəqiqələr, mənalı günlər uzun müddət yaddaşlarda qalacaqdır. Özü də təkcə əcnəbi və "yerli" qonaqların deyil, həm də Bakının daimi sakinlərinin! Bakılılar, yəqin ki, keçirdikləri gözəl anları, görüş və görüntüləri uzun illər anacaqlar. Əslində bu həm də onlar üçün bir imtahan sayılırdı. Kütləviliyi ilə seçilən beynəlxalq tədbir keçirmək, dilini bilmədiyin qonaqlarla təmas qurmaq, tolerant ev sahibliyi nümunəsi göstərmək imtahanı! Şübhəsiz, belə bir imtahan vermək və ondan alnıaçıq çıxmaq hamı üçün olduqca xoşdur! Xüsusən düşünəndə ki, həm xaricdən, həm də içimizdən "Eurovision" yarışmasının Azərbaycanda keçirilməsinin əleyhdarları vardı və onlar fəal iş, antitəbliğat aparırdılar! Amma həqiqət və obyektivlik qərəzli niyyətlərə üstün gəldi, xoş məram yüksəkdə dayandı!

Bu gün geriyə boylanaraq "Azərbaycan niyə "Eurovision" mahnı müsabiqəsini yüksək səviyyədə keçirə bildi?" kimi ilk məqamda qəribə səslənən sualı verməkdən özünü saxlaya bilmirsən! Sualın cavabı isə onun bəsit olmadığını, arxasında böyük mənalar və gərgin çalışmalar dayandığını göstərir.

Azərbaycan ona görə "Eurovision - 2012"-ni keçirdi və tədbiri yüksək səviyyədə başa çatdırdı ki:

BİRİNCİSİ, Azərbaycan artıq müstəqil dövlətdir, müstəqil xarici siyasət yeridir, beynəlxalq tədbir və qurumlarda azad, sərbəst şəkildə təmsil olunur!

İKİNCİSİ, ölkəmizin güclü iqtisadi potensialı, bütün dövlətlərlə bərabər hüquqa əsaslanan əməkdaşlığı, zəruri infrastrukturu və imkanı vardır!

ÜÇÜNCÜSÜ, Azərbaycan öz dəyərlərini qorumaqla Avropa mədəniyyətinə yiyələnmiş, onu Şərq mədəniyyətinin elementləri ilə zənginləşdirmiş tolerant məkan, yeni model dövlətdir!

DÖRDÜNCÜSÜ, xalqımız Heydər Əliyev Fondunun dəstəyi ilə milli mədəniyyətini və musiqisini - muğam, aşıq, simfonik musiqisini - Avropa məkanına çıxararaq təbliğ etməyi və sevdirməyi bacarmış, Avropada Qərb musiqisi prinsipləri əsasında keçirilən müsabiqədə qalib çıxa bilmişdir!

BEŞİNCİSİ, dünya standartları səviyyəsində iş görməyi, qısa müddət ərzində böyük nəticələrə nail olmağı, beynəlxalq səviyyəli, çoxsaylı qonaqların iştirak etdiyi möhtəşəm tədbirləri hazırlamağı və keçirməyi mükəmməl şəkildə öyrənmişik!

ALTINCISI, xalqla iqtidarın birliyi müvəffəqiyyətin rəhninə çevrilib, çünki belə tədbirlərdə geniş xalq kütlələri yaxından iştirak edir və dövlətini dəstəkləyir!

Əlbəttə, tədbirə mane olmağa çalışanlar, hətta təxribat və terror əməlləri törətməyə cəhdlər də baş verdi! Amma iqtidar xalq birliyi, bir də hüquq-mühafizə orqanlarının yüksək peşəkarlığı qarşısında geriyə çəkildilər!

Yüz dəfə eşitməkdənsə, bir dəfə görmək yaxşıdır - söyləyib aqillər!

Azərbaycan dörd dəfə müsabiqədə iştirak  etməklə onun qalibinə çevrildi!

"Eurovision" müsabiqəsinin ən yaddaqalan yarışmalarından birini keçirdi!

Avropa Azərbaycanı yenidən əyani şəkildə kəşf etdi!

Müsabiqə iştirakçıları və qonaqlar unudulmaz anlar yaşadılar!

Bu müsabiqə həm də Heydər Əliyev Azərbaycanının dünyaya müasir forma və imicdə prezentasiyası oldu!

 

 

Azərbaycan.- 2012.- 30 may.- S. 6.