Respublikamız dünyanın taleyini müəyyənləşdirən fövqəldövlətlərlə bir sırada addımlayır

Müstəqillik tariximizin mühüm siyasi-diplomatik zəfəri

Dünyada mövcud olan dövlətlərin hamısına müstəqil şəkildə yaşamaq nəsib olmur. Vaxtı ilə babalarımız millətlər içərisində imza axtarırdı. Artıq bizim imzamız dünya xalqlarının içərisində nəinki imza şəklində tanınıb, hətta digər millətlərin həyatına, tarixinə təsir etmək imkanına malik imzaya çevrilib.

BMT Təhlükəsizlik Şurasına Azərbaycanın sədrlik etməsi isə tariximizin ən yaddaqalan anlarından hesab olunur.

Adıçəkilən qurumda Azərbaycanın səlahiyyət sahibi olması onu göstərir ki, Cənubi Qafqazın lider ölkəsi olan Azərbaycan böyük dövlətlərlə birgə addımlayır.

Hələ vaxtı ikən Xalq Cümhuriyyətinin apardığı siyasət ondan ibarət idi ki, ölkəmiz dünya dövlətləri tərəfindən tanınsın. Ancaq bəzi dövlətlərin laqeyd münasibəti nəticəsində Xalq Cümhuriyyətinin taleyi uğursuz sonluqla bitdi. Bu gün isə Azərbaycan dünyanın ən mötəbər təşkilatlarının üzvüdür və öz müstəqilliyini, dövlətçiliyini qoruyaraq haqq səsini dünyaya çatdıra bilir. BMT Təhlükəsizlik Şurasına qəbul və bu quruma sədrlik etmək isə Azərbaycan Prezidenti İlham Əliyevin apardığı uğurlu xarici siyasətin təntənəsidir. Hesab edirəm ki, bu dövr ərzində Azərbaycan dünyaya tanınmaq istiqamətində müsbət nailiyyətlər qazanacaq və ərazilərinin işğal altında olması faktını bir daha böyük dövlətlərə xatırladacaq, BMT-nin qəbul etdiyi məlum 4 qətnamənin icrasını tələb edəcək.

Azərbaycanın təşəbbüsü ilə "Terror aktlarının beynəlxalq sülh və təhlükəsizliyə yaratdığı təhdidlər" mövzusunun BMT Təhlükəsizlik Şurasının gündəliyinə salınması isə uğurlu addım kimi dəyərləndirilir. Bu mövzu hazırda dünyada çox aktual olan məsələdir. Çünki Azərbaycan terrora məruz qalmış bir ölkədir. Ermənistanın silahlı qüvvələri və eyni zamanda bu ölkənin himayəsində olan terror təşkilatlarının yüzlərlə azərbaycanlını qətlə yetirməsi, Bakıda terror aktları törətməsi faktları onu göstərir ki, terror hədəflərindən biri də Azərbaycandır. İndi BMT Təhlükəsizlik Şurasında terrorçu bir rejimin ifşa olunması üçün münbit şərait yaranıb. Azərbaycanın uğurlu xarici siyasəti nəticəsində dünya dövlətləri bir daha Ermənistanın terrorçu dövlət olduğunun şahidi olacaq.

Fəzail İBRAHİMLİ,

Milli Məclisin deputatı,

tarix elmləri doktoru,

professor

Azərbaycan.- 2012.- 15 may.- S. 5.