Azərbaycanın beynəlxalq arenada çox mühüm yeri vardır

Azərbaycanın beynəlxalq arenada çox mühüm yeri vardır. AzərTAc xəbər verir ki, bu sözləri ABŞ dövlət katibi köməkçisinin Avropa və Avrasiya məsələləri üzrə müavini Erik Rubin demişdir.

E.Rubin bildirmişdir ki, ABŞ-ın təyyarələri Azərbaycan üzərindən Əfqanıstana minlərlə tranzit uçuşları edir, ölkənin hava məkanından vacib yüklər daşınır.

Dağlıq Qarabağ münaqişəsinin nizamlanmasının ABŞ üçün prioritet məsələlərdən olduğunu deyən E.Rubin vurğulamışdır ki, Birləşmiş Ştatların rəhbərliyi bu problemin sülh yolu ilə ədalətli həllinin tərəfdarıdır. ABŞ 20 ildir ki, davam edən bu münaqişənin həllində ATƏT-in Minsk qrupunun həmsədrlərinə və tərəflər arasındakı danışıqlar prosesinə yaxından kömək göstərmək əzmindədir. Biz inanırıq ki, sülh mümkündür və vacibdir. İnanırıq ki, Azərbaycan hakimiyyəti bunu istəyir. Tərəflərin istəyi və siyasi iradəsi ilə biz indiki qəbuledilməz status-kvodan çıxa, regionda daha təhlükəsiz gələcəyə doğru gedə bilərik. Qarşıdakı illərdə bu, bizim üçün prioritet məsələ olacaqdır.

Azərbaycan.- 2012.- 16 may.- S. 1.