İslam Əməkdaşlıq Təşkilatı azərbaycanlı qaçqın və məcburi köçkünlərin öz evlərinə qayıtmasına şərait yaradılmasını tələb edir

Mayın 11-12-də Aşqabadda İslam Əməkdaşlıq Təşkilatının (İƏT) "Müsəlman dünyasında qaçqınlar" adlı nazirlər səviyyəsində keçirilmiş beynəlxalq konfransında yekun bəyannamə qəbul olunmuşdur.

Azərbayca Xarici İşlər Nazirliyinin mətbuat xidmətindən AzərTAc-a bildirmişlər ki, "Aşqabad bəyannaməsi" adlanan sənədin 9-cu bəndi Ermənistan-Azərbaycan, Dağlıq Qarabağ münaqişəsinə həsr olunmuşdur. Həmin bənddə vurğulanmışdır ki, İƏT Xarici İşlər Nazirləri Şurasının 38-ci sessiyasında Ermənistanın Azərbaycana qarşı təcavüzü barədə 1038-POL saylı qətnamə qəbul edilmişdir.

Sənəddə deyilir: "Bu kontekstdə biz bir milyondan artıq azərbaycanlı qaçqının və məcburi köçkünün Azərbaycan Respublikasının Dağlıq Qarabağ regionu və ətrafındakı işğal olunmuş ərazilərdən qovulmuş əhalinin vəziyyəti, bu humanitar problemlərin ölçüləri və kəskinliyinə dair dərin narahatlığımızı ifadə edirik. Biz azərbaycanlı qaçqınların və qovulmuş əhalinin təhlükəsizliyi, şərəf və ləyaqətləri təmin edilməklə öz evlərinə qayıtması üçün şərait yaradılmasını tələb edir və bu məqsədlə Azərbaycan hökuməti və xalqının göstərdiyi səylərə verilən dəstəklə tam şərikliyimizi bir daha təsdiq edirik. Bu baxımdan, biz İƏT, BMT Baş Məclisi və Təhlükəsizlik Şurasının müvafiq qətnamələrinin tam şəkildə icrasını qətiyyətlə tələb edirik".

Azərbaycan.- 2012.- 16 may.- S. 4.