Xalqın həyat səviyyəsini daha da yaxşılaşdırmağa hesablanan iri sosial layihələr uğurla həyata keçirilir

Azərbaycan Respublikası regionlarının sosial-iqtisadi inkişafına dair birinci Dövlət Proqramının uğurlu icrası sonrakı mərhələdə qazanılacaq nailiyyətlərin etibarlı təməlinə çevrilmişdir. Bölgələrdə hər kəsin görüb böyük dəyər verdiyi dinamik inkişaf göz qabağındadır. Bu gün Azərbaycanın elə bir guşəsi yoxdur ki, orada genişmiqyaslı abadlıq-quruculuq işləri aparılmasın, xalqın həyat səviyyəsini daha da yaxşılaşdırmağa hesablanan iri sosial layihələr həyata keçirilməsin. Bu sırada bərəkətli Muğan düzünün mərkəzinə çevrilmiş Sabirabad rayonunun xüsusi yeri vardır.

Torpağı münbit, adamları əməksevər, mehriban və qədirbilən olan bu diyar istər sovet dönəmində, istərsə də müstəqillik illərində respublika rəhbərliyinin böyük önəm verdiyi məkan olmuşdur. Xalqımızın ümummilli lideri Heydər Əliyev Azərbaycana rəhbərliyinin birinci mərhələsində Sabirabada 14 dəfə səfər etmişdir. Bu unudulmaz səfərlərin hər biri yaddaşların şirin xatirəsi olmaqla yanaşı, bu gün də diqqət çəkən təhsil, səhiyyə, mədəniyyət müəssisələrinin, iri istehsal və emal sahələrinin, həmişə minnətdarlıqla xatırlanan möhtəşəm körpünün ünvan tapması ilə yadda qalır.

Ulu öndərin başladığı işləri bütün istiqamətlərdə uğurla, həm də müasir dövrün tələblərinə uyğun yaradıcılıqla davam etdirən Azərbaycan Prezidenti İlham Əliyev Sabirabada münasibətdə də varislik missiyasına sədaqətini parlaq şəkildə nümayış etdirir. Bu bölgənin yüksəlişinə xüsusi münasibətin məntiqi nəticəsidir ki, dövlət başçısı rayonun sosial-iqtisadi inkişafını sürətləndirmək üçün təkcə ötən il ərzində dörd sərəncam imzalamışdır. Təbii ki, bu böyük qayğı rayon əhalisində hədsiz razılıq və minnətdarlıq doğurur. Dövlətin qayğısından güc alan sabirabadlılar rayonun sosial-iqtisadi həyatının əsas istiqamətlərində böyük uğurlara imza atmışlar. Prezident İlham Əliyevin sərəncamları əsasında dövlət büdcəsindən, Azərbaycan Respublikası Prezidentinin Ehtiyat Fondundan ayrılan vəsait qısa müddət ərzində əsaslı dəyişikliklərə stimul vermiş, mühüm infrastruktur layihələrinin icrasını şərtləndirmiş, əhalini narahat edən içməli su, təbii qaz, elektrik enerjisi ilə təminatdakı problemləri aradan qaldırmağa imkan yaratmış, kəndarası yolların yenidən qurulmasını, müxtəlif sosialyönümlü obyektlərin tikintisini gerçəkləşdirmişdir.

Sabirabadın sosial həyatında dövlət qayğısından kənarda qalan sahə yoxdur. Ata-babalarımız yol çəkməyi, körpü salmağı həmişə böyük savab bilmişlər. Dövlət başçısının təşəbbüsü ilə Kür çayının Cavad kəndi ərazisindən keçən hissəsində müasir standartlara cavab verən yaraşıqlı körpünün tikilib istifadəyə verilməsi 16 min nəfərdən çox əhalinin yaşadığı Cavad, Yolçubəyli, Narlıq, Türkədi, Həsənli, Əlicanlı və Zəngənə kənd sakinlərinin rayon mərkəzinə olan yolunu dəfələrlə qısaltmışdır. İndi adamlar hər dəfə bu körpüdən keçəndə, qovuşduqları rahatlığın müqabilində dövlət başçısına minnətdarlıqlarını dəfələrlə dilə gətirirlər.

Yeddi milyon manata başa gələn 34 min nəfər əhalinin yaşadığı 18 yaşayış məntəqəsini birləşdirən Sabirabad-Qasımbəyli-Narlıq-Qaraqaşlı avtomobil yolunun istifadəyə verilməsi rayonun sosial-iqtisadi həyatında mühüm hadisəyə çevrilmişdir. İndi rayonun çoxsaylı kəndlərini rahat və geniş asfalt yollar birləşdirir. Yol infrastrukturunun yaxşılaşdırılması istiqamətində işlər isə uğurla davam etdirilir.

Rayon əhalisinin içməli su təminatını yaxşılaşdırmaq da dövlət başçısının böyük önəm verdiyi məsələlər sırasında yer alır. Rayonun Şıx Salahlı, Bulaqlı, Qaratuğay, Xankeçən, Poladtuğay kəndlərində modul tipli sutəmizləyici qurğular inşa edilməsi məhz Prezident İlham Əliyevin imzaladığı sərəncam əsasında reallaşmışdır.

2010-cu ildə Sabirabad sel fəlakəti ilə üz-üzə qalanda, adamlar təbiətin sərt sınağı ilə qarşılaşanda yenə dövlətin qayğısı sayəsində sarsılmadılar. Seldən böyük zərər çəkən, evlərini itirən Ulacalı kəndinin sakinləri üçün yeni salınmış qəsəbədə ev alan, yaşı 80-ni haqlayan Zakir Babayev o ağrılı günləri belə xatırlayır:

- Hər şey qəflətən baş verdi. Bir anın içində kəndimiz suya qərq oldu. Rayondan gələn texnikanın gücü ilə ailə-uşağı selin ağzından alıb təhlükəsiz yerə çıxardıq. Fövqəladə Hallar Nazirliyi tərəfindən qurulan çadırlarda yerləşdirildik. Sel sularına qərq olan evimizi, irili-xırdalı məişət əşyalarımızı, yaşayış üçün zəruri olan avadanlıqlarımızı itirmişdik. Baş sındırsaq da, düşdüyümüz burulğandan çıxış yolu tapa bilmirdik. Maddi itkilər bir yana, mənəvi böhran keçirirdik. O ağır anlarda Prezident İlham Əliyevi yanımızda görəndə toxtadıq. Dövlət başçısının: "Narahat olmayın, dövlət səviyyəsində bütün zəruri tədbirlər görüləcəkdir. Əvvəlkindən də yaxşı evləriniz olacaqdır" - sözləri bizə böyük təsəlli oldu. Aradan cəmi bir neçə ay keçməsinə baxmayaraq hər cür rahatlığı olan 50 evdən ibarət yeni Ulacalı qəsəbəsi tikildi. Bizim ailəyə də bu yaraşıqlı qəsəbədə 3 otaqlı mənzil verdilər. Artıq xeyli vaxtdır ki, məişət rahatlığına qovuşmuşuq. Hər şey üçün, bizə verilən təmənnasız evə, dar gündə mənəvi dayağa görə Prezident İlham Əliyevə minnətdarıq.

İki il əvvəl baş vermiş sel fəlakətinin nəticələrini aradan qaldırmaq üçün dövlət səviyyəsində görülən tədbirlər indi də müvəffəqiyyətlə davam etdirilir. Bu günədək rayon ərazisində 1439 ev tikilib istifadəyə verilmişdir. Daha 380 evin tikintisi sürətlə aparılır. Seldən zərər çəkmiş 17 sosial obyektdə bərpa işləri görülmüşdür. Sel fəlakətinin nəticələrini aradan qaldırmaq üçün indiyədək 17,2 milyon manat dövlət vəsaiti xərclənmişdir.

Dövlətin davamlı və yetərli qayğısından güc alan Sabirabad bu gün Muğan düzündə ulduz kimi parlayır. Bölgədə abadlıq-quruculuq işləri vüsət almışdır. Yaraşıqlı park və xiyabanlar, abad prospekt və küçələr gələn qonaqları heyran edir. Bir neçə il əvvəllə müqayisədə bölgə əhalisinin həyat tərzi, dolanışıq səviyyəsi müqayisəolunmaz dərəcədə dəyişmişdir. Bu diyarın hünərvər oğul-qızlarının qayğısı təkcə abadlıq və quruculuq işləri ilə məhdudlaşmır. Rayonda becərilən torpaq sahələrinin hər qarışından maksimum səmərəli şəkildə istifadə etmək, ölkənin ərzaq təhlükəsizliyinə sanballı töhfələr vermək üçün hər kəs səy və bacarığını əsirgəmir. Sabirabad sabaha, böyük uğurlara doğru inamla addımlayır.

Lazım QULİYEV

Azərbaycan.-2012.- 1 noyabr.- S.6.