Milli Ordu xalqın qürur və güvənc ünvanıdır

"Azərbaycan ordusu çox sürətlə inkişaf edir. Azərbaycanda ordu quruculuğu çox sürətlə gedir. Ordumuzun indiki vəziyyəti çox sevindiricidir. Biz həm hərbi potensialımızı gücləndiririk, həm də orduda hazırlıq səviyyəsi yüksəlir və beləliklə, ordumuz qarşıda duran bütün vəzifələri həll etməyə qadirdir. Ermənistan-Azərbaycan, Dağlıq Qarabağ münaqişəsinin həlli üçün siyasi-diplomatik səylər davam etdirilməlidir, eyni zamanda, qüdrətli ordu potensialının yaradılması prosesi daha da güclənməlidir. Biz son bir neçə il ərzində orduya ayrılan xərcləri bir neçə dəfə artırmışıq...

Biz müharibə şəraitində yaşayırıq. Bizim torpaqlarımız işğal altındadır. Ona görə istənilən vəsaiti biz bu sahəyə yönəltməliyik. Biz güclü ordu yaratmalıyıq, güclü hərbi potensial yaratmalıyıq ki, istənilən anda öz doğma torpaqlarımızı azad edə bilək".

İlham ƏLİYEV

Şəxsi heyət yüksək kalorili qida ilə təmin olunur

Milli Məclis Sədrinin müavini Bahar Muradova, AMEA-nın vitse-prezidenti Akif Əlizadə, parlamentin Regional məsələlər komitəsinin sədri Arif Rəhimzadə, deputatlar Musa Quliyev, Bəxtiyar Sadıqov, Sahibə Qafarova, hüquq müdafiəçiləri Novella Cəfəroğlu, Səadət Bənənyarlı, həmçinin Müdafiə Nazirliyi Şəxsi Heyət Baş İdarəsinin Tərbiyə işləri idarəsinin rəisi general-mayor Vaqif Məmmədov, general-mayor Nizam Osmanov və Müdafiə Nazirliyi Mətbuat Xidmətinin rəisi polkovnik Eldar Sabiroğlunun da daxil olduğu heyətlə əsgər yeməkxanasındayıq. Nahar edən hərbçiləri narahat etmədən onların qidalarına göz gəzdiririk. Masaların üzərində isti yeməklər, şirələr düzülüb. Masa üzərindəki qab-qacağın təmizliyi, yeməklərin ətrindən hiss olunur ki, əsgərlər burada bişirilən xörəklərlə evlərində hazırlanan arasında fərqi hiss etmirlər.

General-mayor Vaqif Məmmədov bizi şəxsi heyətin gündəlik qida normalarında istifadə olunan məhsullarla tanış edir. Qidalar əsasən yerli məhsullardır. Bütün ərzaqların üstündə "Satışı qadağandır" sözləri yazılıb. Yəni həmin qidalar Müdafiə Nazirliyi tərəfindən xüsusi olaraq hərbçilər üçün alınır. Burada eyni zamanda bir əsgərin hərbi hissədən kənarda qaldığı müddətdə gündəlik ərzaq bağlaması da var. Nümayəndə heyəti maraqla şəxsi heyətin gündəlik qida normasında istifadə edilən məhsullara baxır.

Sonra vitse-spiker Bahar Muradova əsgərlərlə birgə əyləşərək özü üçün yemək çəkir və nümayəndə heyətinin digər üzvləri də keyfiyyətli yerli ərzaq məhsulları ilə hazırlanan yeməklərdən dadırlar. Bir sözlə, hiss olunur ki, əsgər yeməkxanasında şəxsi heyətin yüksək kalorili qida ilə təminatı üçün hər cür şərait var. Yeməkxanada səliqə-sahmana və təmizliyə tam riayət edilir. Gündəlik yemək hazırlanması ilə məşğul olan əsgərlərin xüsusi geyimdə olması da bu qənaəti bir daha gücləndirir. Ümumiyyətlə, əsgər və zabit heyətinin aylıq rasionunda ət, yumurta, balıq məhsullarından tutmuş meyvə-tərəvəzə, kompot və təbii şirələrə qədər, ümumilikdə 24-27 adda qida məhsulu var. Şəxsi heyətə "Nuş olsun!" deyərək yeməkxananı tərk edib uz tuturuq əsgər yataqxanasına.

Milli Qəhrəman Mübariz İbrahimovun ailəsinə yazdığı son məktubu hər gün oxuyan əsgərlər...

Buradakı səliqə-sahman da diqqətdən yayınmır. Şəxsi heyətin döyüş ruhunun yüksəldilməsi məqsədilə divarlara milli qəhrəmanların döyüş yollarını əks etdirən fotoşəkillər vurulub. Yataqxananın qapısının üstündəki lövhədə isə Milli Qəhrəman Mübariz İbrahimovun valideynlərinə yazdığı son məktub və "İgidliyə görə" medalı ilə təltif olunmuş zabitimiz Fərid Əhmədovun şəkillərindən ibarət lövhə diqqətimizdən yayınmadı. Bəlli olur ki, gizir və zabitlər tərəfindən şəxsi heyətlə iş, hərbi-vətənpərvərlik təbliğatı nizamnaməyə uyğun formada həyata keçirilir.

Bacarıqlı manqa və bölük komandirləri gənc əsgərlərə hərb elminin incəliklərini öyrədir, onlara lazımi tapşırıq və tövsiyələr, eyni zamanda düşmənlə təmas xəttində təhlükəsizlik tədbirlərini nəzərdə tutan təlimatlar verirlər. Əsgərlərin hərbi hazırlıq səviyyəsinin yüksəldilməsinə xidmət edən xüsusi hərbi təlimatlar, döyüş tapşırığı planı, eyni zamanda müxtəlif qəzetlərin, kitabların olması maraq doğurur. Divara vurulmuş lövhələrdə Silahlı Qüvvələrin hərbi andının və Azərbaycanın dövlət himninin mətnləri ilə tanış olmaq mümkündür. Boş vaxtlarında əsgərlər hərbi- vətənpərvərlik ruhunun artırılması istiqamətində çəkilən filmlərə də tamaşa edirlər. İçəri daxil olan hər bir əsgər çəkməsini çıxarıb ona məxsus nömrələnmiş başmağı geyinir. Hər bir əsgərin üzərində nömrəsi olan öz başmağı var. Yataqxananın digər istiqamətində isə silah-sursat, tabur, bölük və taqım komandirinin istirahət otaqları, dəftərxana və digər inzibati otaqlar yerləşir. Əsgərlərin şəxsi bacarığının üzə çıxarılması məqsədilə yaradılan guşələrdə isə onların yaradıcılıq nümunələri, divar qəzeti və hərbi qaydalar haqqında lövhələr asılıb. Br sözlə, burada şəxsi heyətin rahat istirahəti üçün bütün lazımi şərait yaradılıb.

Düşmən gülləsi qarşısında cəsarətlə dayanan Qapanlı sakinləri

Yeməkxana və yataqxana ilə tanışlıqdan sonra ön xətdə düşmənlə üz-üzə dayanan bölüyə baş çəkmək üçün yola düşürük. Bir neçə istiqamətdən düşmən postları ilə əhatələnən Qapanlı kəndinin torpaq yolları bizi təhlükəli nöqtəyə bir qədər də yaxınlaşdırır. Ancaq bu kəndin əhalisi heç bir təhlükədən çəkinmir. Onlar məhz orduya güvənərək öz doğma yurdlarını tərk etmirlər. Atəş səslərinin bir gün də səngimədiyi, müxtəlif dövrlərdə ağır artilleriyanın hədəfi olan bu kənddə yaşamaq həqiqətən də böyük cəsarət və dövlətə, orduya inam tələb edir. Kənddə hər kəs öz işi ilə məşğuldur. Bu ürəkaçan mənzərəyə tamaşa edə-edə kəndin ən ucqar nöqtəsində qərarlaşmış bölüyə yetişirik.

Düşmənlə təmas xətti özünəməxsus çətinlikləri, ciddi rejimi, əsgər və zabit heyətinin sərt nizam-intizamı ilə seçilir. Burada xidmət keçən əsgər və zabitlərin mənəvi-psixoloji cəhətdən möhkəm, fiziki cəhətdən güclü olması vacib şərtlərdəndir. Ön cəbhədə əsas diqqət döyüş növbətçiliyinə yönəldilir. Əsgərlər təlimləri əsasən ehtiyat bölmələrdə keçir, səngərlərə tam hazır vəziyyətdə gəlirlər. Burada xidmət edənlər seçilərkən onların fiziki və psixoloji-mənəvi hazırlıqları nəzərə alınır. Bölüklə düşmən səngəri arasındakı məsafə 400-450 metrdir. Bölükdə olan zaman əsgərlər əsasən təmizlik işləri ilə məşğul olurlar. Silahlar təmizlənir, təlimlər, döyüş hazırlığı keçirilir və idman təmrinləri yerinə yetirilir.

Taburun şəxsi heyətinin yataqxanasında olan şəraitlə məntəqədəki şərait eynidir. Nümayəndə heyəti vəziyyətlə daha yaxından tanış olur.

Ali Baş Komandan əmr versə, bu ordu ildırım sürəti ilə qarşısında duran şərəfli vəzifəni yerinə yetirəcək

Gördüklərindən daha da qürurlanan vitse-spiker Bahar Muradova yenə də öz təəssüratlarını bölüşür:

- Biz tez-tez cəbhə bölgələrində oluruq, müxtəlif hərbi hissələrdə şəxsi heyətin xidmət fəaliyyəti ilə tanış oluruq. Bu da növbəti səfərlərdən biridir. Bu səfərdə gördüklərimiz Azərbaycan ordusu haqqında indiyə qədər söylədiyimiz fikirlərin möhkəmlənməsinə əsaslı şərait yaratdı. Ona görə ki, biz Azərbaycan Silahlı Qüvvələrinin necə böyük qüdrətə malik olduğunun günbəgün, anbaan şahidi olmaqdayıq. Ordunun maddi-texniki bazasının möhkəmlənməsi, döyüş sursatları və digər müasir texnika ilə təmin olunması, o cümlədən əsgərlərin sosial durumunun yaxşılaşdırılması istiqamətində görülən işlərin nəticəsini gözlərimizlə gördük və qiymətləndirdik. Hesab edirəm ki, istənilən halda hər bir dövlət, millət öz ordusuna güvənməlidir. Çünki Dağlıq Qarabağ münaqişəsi ümummilli problemimizdir və onun məsuliyyəti hər birimizin üzərindədir. Amma bu problem elə bir vəziyyətdədir ki, yalnız bizim iradəmizlə həll olunmur. Bu prosesə beynəlxalq vasitəçilər cəlb olunublar və onlar da məsələnin yalnız sülh yolu ilə aparılmasını tövsiyə edirlər. Azərbaycan da hələlik sülh danışıqlarının tərəfdarıdır. Biz bunu əməlimizdə də göstəririk.

Təəssüf ki, qarşı tərəf qeyri-konstruktiv mövqeyindən əl çəkmir və sülh danışıqlarını pozmaq istiqamətində cəhdlər göstərir. İşğal olunmuş ərazilərdə "oyuncaq" hərbi təlimlər keçirir və biz onların ordusunun hansı səviyyədə olduğunu çox yaxşı bilirik. Təcavüzkar Ermənistan belə təlimlərlə bizi qorxuda bilməz! Çünki biz bu gün şahid olduğumuz ordunun gücünə bələdik və görürük ki, bu ordu bütün həlli çətin, amma bizim üçün vacib olan məsələlərin yoluna qoyulmasına, döyüş tapşırığını yerinə yetirməyə qadir bir ordudur. Bu Silahlı Qüvvələr iqtisadi cəhətdən inkişaf etmiş bir dövlətin yurdunu sevən, vətənpərvər əsgərlərinin cəmləşdiyi bir ordudur. Əminəm ki, Ali Baş Komandan İlham Əliyevin göstərişi olduğu təqdirdə bu ordu ildırım sürəti ilə qarşısında duran şərəfli vəzifəni yerinə yetirəcək! Qoy ermənilər bunu bu sərhəd bölgəsindən eşitsinlər!

Sonra Milli Məclisin Regional məsələlər komitəsinin sədri Arif Rəhimzadə səfər təəssüratlarını bölüşür. Komitə sədri cəbhə bölgəsinə səfərin məqsədini belə izah edir:

- Son vaxtlar Azərbaycan ordusu haqqında həqiqətə uyğun olmayan məlumatlar da yayılır. Bu xəbərlər isə hər bir ölkə vətəndaşını narahat edir. Ona görə də buradakı həqiqi vəziyyəti görmək üçün səfərə çıxdıq. Onu deyim ki, ulu öndər Heydər Əliyev hakimiyyətə gələndə ilk fərmanlarından biri ordu quruculuğu ilə bağlı idi. Bu gəlişimlə mənə aydın oldu ki, həqiqətən bu gün Azərbaycanın qüdrətli ordusu yaranıb! Ən müasir hərbi texnikalar, silahlar, NATO standartlarına uyğun hərbi hissələr və yüksək səviyyəli, peşəkar hərbçilərin olması məni qürurlandırdı! Ən başlıcası odur ki, ordunun şəxsi heyətində yüksək əhval-ruhiyyə var. Hesab edirəm ki, belə bir ordu istənilən döyüş tapşırığını yerinə yetirməyə qadirdir!

Bu ordu ilə fəxr etməyə dəyər

Nümayəndə heyətinin digər üzvü, deputat Musa Quliyev də səfərdən çox məmnun qaldığını bildirdi. Həm qərargahda, həm taburda, həm də bölükdə gördüyü real vəziyyət deputatın Azərbaycan ordusuna olan inamını daha da artırıb:

- Biz burada ordumuzun mütəşəkkil döyüş hazırlığının, əsgərlərimizin çox yüksək hərbi-vətənpərvərlik hissinin şahidi olduq. Gördük ki, ordumuzun yüksək səviyyəli maddi-texniki bazası son dərəcə güclüdür. Azərbaycanın öz istehsalı olan "İstiqlal" silahının atəşi göstərdi ki, dövlətimizin nə qədər qüdrətli hərbi potensialı var. Bütün bunlar Azərbaycan Prezidenti İlham Əliyevin orduya göstərdiyi qayğının nəticəsidir. Artıq hiss olunur ki, gündən-günə ordunun qüdrəti yüksəlir, peşəkarlıq artır və nizam-intizam güclənir.

Bizi sevindirən odur ki, əsgərlərimiz burada evlərində olduğu kimi rahatdırlar. Onların qulluğu üçün hər bir şərait var. Bu, bir daha onu göstərir ki, Azərbaycan qüdrətli dövlətdir və onun ordusu ərazi bütövlüyümüzü təmin etməyə qadirdir! Azərbaycan xalqı sülhsevər xalqdır və dövlətimiz öz öhdəliklərinə sadiqdir. Məhz bu sadiqliyə görə biz hələ də sülh danışıqlarının davam etdirilməsinin tərəfdarıyıq. Amma paralel olaraq Silahlı Qüvvələrimizin gücü artırılır. Prezident İlham Əliyev isə hər dəfə qeyd edir ki, Azərbaycan xalqının səbri də sonsuz deyil! Əgər Ermənistan danışıqları hər dəfə uzadacaqsa, ordumuzun qüdrəti bizə imkan verir ki, torpaqlarımızı azad edək! Biz isə ön xətdə bir daha gördük ki, ordu və xalq birliyi Ali Baş Komandan tərəfindən çox uğurlu şəkildə təmin olunub.

Bu ordu ilə fəxr etməyə dəyər! Əminliklə demək olar ki, bu gün Azərbaycan əsgərləri vətənpərvər, yüksək mənəvi-psixoloji hazırlığı olan, yetərincə dünyagörüşə malik gənclərdir. Onların həyat məktəbi adlandırdıqları hərbi xidmət həyatlarında müsbət iz buraxmaq və formalaşmalarına təsir göstərməklə bərabər, həm də Azərbaycan Ordusunun qarşısında müəyyənləşən vəzifələrin tezliklə gerçəkləşməsinə inam yaradır.

Hüquq müdafiəçisi Novella Cəfəroğlu isə əsgərlərin şəraiti ilə tanış olduqlarını, onlarla söhbət etdiklərini, vəziyyətləri ilə maraqlandıqlarını söylədi:

- Əsgərlər xidmət şəraitindən narazılıq etmədilər. Müşahidələrimiz zamanı əsgərlərə xidmət üçün yüksək səviyyədə şərait yaradıldığını, təchizat və təminat məsələlərinin qaydasında olduğunu gördük. Ən əsası isə, biz əsgərlərimizdə yüksək döyüş ruhu hiss etdik! Hesab edirəm ki, Qapanlı kəndinə xüsusi diqqət ayrılmalıdır. Özəl şirkətlər burada insanlar üçün iş yerləri açmalıdırlar ki, yaşayış səviyyəsi yüksəlsin və daha çox insan işlə təmin olunsun. Bu, əsgərlərimizə də müsbət təsir göstərər.

Bölükdəki şəxsi heyət və buradakı vəziyyətlə tanış olduqdan sonra gecə-gündüz səngərdə düşmənlə üz-üzə dayanan əsgərlərimizə baş çəkməyə yollanırıq! Hərbi avtomobillər səngərə yaxınlaşdıqca həyəcan artır...

(Ardı var)

Rəşad BAXŞƏLİYEV

Azərbaycan.-2012.- 2 noyabr.- S.5.