Yüksək səhiyyə xidmətinin təşkili yaradılan şəraitdən çox asılıdır

Azərbaycanın sosial-iqtisadi qüdrətinin ildən-ilə daha da artması bölgələrin hərtərəfli inkişafını təmin edir. Ölkə Prezidenti İlham Əliyevin dəfələrlə vurğuladığı kimi, həyata keçirilən proqram və layihələrin bütün sferaları əhatə etməsi çox əhəmiyyətli məsələdir. Bu baxımdan təhsil, mədəniyyət, səhiyyə və digər sahələrlə bağlı infrastruktur layihələrin sistemli şəkildə gerçəkləşdirilməsi də diqqətçəkəndir.

Son dövrlər abadlıq-quruculuq işlərinin geniş vüsət aldığı Qobustan rayonunda əhaliyə səhiyyə xidmətinin təşkili ilə maraqlandıq. Açığını deyək ki, bu sahədə həllini gözləyən məsələlər çoxdur.

Qobustan Mərkəzi Rayon Xəstəxanasının baş həkimi Elşən Rəcəbov söhbət zamanı bildirdi ki, xəstəxana binası çox köhnədir. Avadanlıqlar müasir olmasa da, çalışırlar ki, əhaliyə normal tibb xidməti göstərsinlər.

1959-cu ildə inşa edilmiş mərkəzi rayon xəstəxanasının 3 korpusundan 2-si birmərtəbəli, 1-i ikimərtəbəlidir (xəstəxana 1991-ci ilədək Şamaxı Mərkəzi Rayon Xəstəxanasının tərkibində olub). 2005-ci ilin noyabr ayında Fövqəladə Hallar Nazirliyinin köməyi ilə əsaslı təmir olunan xəstəxananın dam örtüyü dəyişdirilib, yeni plastik qapı-pəncərələr qoyulub. Həmin vaxtlar bərk və yumşaq avadanlıq alınsa da, yetərli olmayıb. Indiyə qədər də heç bir yeni tibbi avadanlıq alınmayıb - mövcud olanın hamısı köhnədir.

90 çarpayılıq bu köhnə xəstəxanada terapiya, cərrahiyyə, uşaq xəstəlikləri, poliklinika, doğum, infeksion xəstəliklər, təcili və təxirəsalınmaz yardım şöbəsi fəaliyyət göstərir. Burada 58 həkim, 138 orta tibb işçisi çalışır. Kadr çatışmazlığı yaşayan xəstəxananın travmatoloqa, cərraha, oftalmoloqa ciddi ehtiyacı var. İşləmək üçün göndərilən həkimlər müəyyən müddətdən sonra çıxıb gedirlər. Yerli kadrların hazırlanması barədə düşünmək də çıxış yollarından biridir.

Qobustan Bakı-Şamaxı-Gürcüstan sərhədi avtomobil magistralının kənarında yerləşdiyinə görə qəzalar zamanı xəsarət alanlar rayon xəstəxanasına gətirilir. Bu baxımdan cərrahiyyə və travmatologiya işini gücləndirmək daha vacib məsələdir.

Kənd təsərrüfatı rayonu olduğuna görə, Qobustanda infeksion xəstəliklərə həssaslıq yüksəkdir. Heyvandarlıq sahəsində çalışanların brüselyoz xəstəliyinə tutulma ehtimalı çoxdur. Ancaq aparılan maarifçilik işi və həyata keçirilən qabaqlayıcı tədbirlər sayəsində bu xəstəlik 2006-2007-ci illərə nisbətən 40 faizə qədər azalıb.

Qobustanda 2 kənd sahə xəstəxanası (15 çarpayılıq Təklə və 20 çarpayılıq Sündü), 10 həkim məntəqəsi və 5 tibb məntəqəsi fəaliyyət göstərir. Dövlət proqramına əsasən daha 3 kənddə - Çalovda, Poladlıda və Cəmcəmlidə də həkim məntəqələrinin tikilməsi nəzərdə tutulub.

Baş həkim E.Rəcəbov bildirdi ki, rayondakı imtiyazlı xəstələrə, onların müvafiq dərmanla təmin olunmalarına lazımi diqqət yetirməyə çalışırlar. 6 talassemiyalı xəstəyə yardım məqsədilə hər il qanköçürmə aksiyaları keçirilir.

Onu da qeyd edək ki, "Regionların sosial-iqtisadi inkişafına dair Dövlət Proqramı"nda Qobustan Mərkəzi Rayon Xəstəxanasının əsaslı təmiri də nəzərdə tutulub. Ancaq mütəxəssislərin bildirdiyinə görə həddindən artıq köhnə binanın xeyli vəsait tələb edən təmirindənsə 80 çarpayılıq yeni xəstəxana binasının tikilməsi daha məqsədəuyğun olardı. Köhnə binanın şərait imkanları yeni tibb avadanlıqlarının yerləşdirilməsi və quraşdırılması baxımından da əlverişli deyil. Rayon icra hakimiyyətindən aldığımız məlumata görə artıq bu barədə müvafiq qurumlara müraciət olunub.

Qobustan Gigiyena və Epidemiologiya Mərkəzi 2008-ci ildə inşa edilmiş yeni ikimərtəbəli binada yerləşir. Mərkəzin direktoru Məlikağa Əhədov bildirdi ki, hər cür avadanlıq və texnika ilə təmin olunublar. Burada da həkimlərə ehtiyac var. Ancaq çalışırlar ki, yaradılmış şəraitin müqabilində əhaliyə daha yüksək xidmət göstərsinlər.

Şübhəsiz ki, xidmətin səviyyəsi yaradılmış şəraitdən də çox asılıdır. İnanmaq olar ki, Qobustan rayonunda da əhalinin yüksək səhiyyə xidməti ilə hərtərəfli təmin olunması üçün gərəkli tədbirlər həyata keçiriləcək.

Telman Nəzərli

Azərbaycan.-2012.- 2 noyabr.- S.9.