TürkPA-nın Hüquq Komissiyasının ikinci iclası keçirilib

Noyabrın 5-də Bakıda Türkdilli Ölkələrin Parlament Assambleyasının (TürkPA) Hüquq Komissiyasının 2-ci iclası keçirildi. Azərbaycan, Türkiyə, Qazaxıstan və Qırğızıstan parlamentlərinin deputatlarının və TürkPA katibliyinin əməkdaşlarının iştirak etdiyi iclasda "TürkPA üzv dövlətləri parlamentlərinin reqlamentləri və millət vəkillərinin səlahiyyətləri" və "TürkPA üzv ölkələri arasında qanunvericilik məsələləri üzrə əməkdaşlıq" mövzusu ilə bağlı hesabat və tövsiyə qərarları müzakirə olundu.

TürkPA Hüquq Komissiyasının sədri, Türkiyə Böyük Millət Məclisinin deputatı Haluk İpək iclası açaraq dedi ki, bu cür tədbirlər üzv ölkələr arasında əlaqələrin inkişafında, qanunvericilik sahəsində əməkdaşlığın genişlənməsində mühüm rol oynayır. Komissiyanın birinci iclasında TürkPA-ya üzv ölkələrin konstitusiyaları müzakirə olunub, hər bir üzv ölkənin konstitusiyası digər dillərə tərcümə olunaraq ayrıca kitab halında nəşr etdirilib. Bu iclasda parlamentlərin reqlamentləri və deputatların səlahiyyətləri, qanunvericilik sahəsində əməkdaşlıq və s. məsələlər müzakirə olunacaq. Düşünürük ki, komissiyanın iclasında müzakirə edilən və qəbul olunan qərarlar təşkilatımıza üzv ölkələr arasında əlaqələrin inkişafına müsbət təsir göstərəcək.

Haluk İpək göstərilən qonaqpərvərliyə və tədbirin yüksək səviyyədə təşkilinə görə qonaqlar adından Azərbaycan tərəfinə minnətdarlığını bildirdi.

Azərbaycan Respublikası Milli Məclisi Sədrinin birinci müavini Ziyafət Əsgərov qonaqları Milli Məclisin rəhbərliyi adından salamlayaraq dedi ki, TürkPA-ya üzv ölkələrin hamısı demokratik, dünyəvi dövlət qurublar. Bu ölkələrin konstitusiyalarının 4 dilə tərcümə olunması təkcə parlament diplomatiyası, demokratiyanın, parlamentlərarası əlaqələrin inkişafı deyil, bizim beynəlxalq əməkdaşlığımızın möhkəmlənməsi üçün də əhəmiyyətlidir. Bizi ümumi dəyərlər birləşdirir və hesab edirik ki, bugünkü iclasda müzakirə olunacaq məsələlər də əlaqələrimizin hərtərəfli inkişafı baxımından çox vacibdir.

Azərbaycanın TürkPA-nın fəaliyyətinə verdiyi əhəmiyyətdən danışan Ziyafət Əsgərov komissiyanın işinə uğurlar arzuladı.

TürkPA-nın Baş katibi Ramil Həsənov Hüquq Komissiyasının ikinci iclasının Azərbaycanda keçirilməsini yüksək qiymətləndirdi. Bildirdi ki, bu iclaslarda müzakirə olunan məsələlər və qəbul olunan qərarlar ümumi işin xeyrinədir. Baş katib TürkPA-nın həyata keçirdiyi layihələrdən danışaraq görülən işlərə üzv dövlətlərin başçılarının və parlament rəhbərlərinin verdiyi dəstəyi yüksək qiymətləndirdi. Qeyd etdi ki, Azərbaycan Prezidenti İlham Əliyev təşkilatın işinə daim diqqət və qayğı göstərir. Dövlət başçısının tapşırığına əsasən TürkPA katibliyi üçün yeni bina tikiləcək. Yeni bina üçün torpaq sahəsi də ayrılıb və yaxın vaxtlarda tikinti işlərinə başlanacaq.

Sonra iclas öz işini davam etdirdi. Əvvəlcə iclasın gündəliyi təsdiq olundu. İclasda "TürkPA milli parlamentlərinin prosedur qaydaları və parlament üzvlərinin mövqeyi" və "TürkPA üzv ölkələrinin qanunvericilik sahəsində əməkdaşlığı" mövzularında məruzələr dinlənildi, TürkPA-nın dördüncü ümumi iclasına məruzəçi təyin olundu. Daha sonra hər iki məsələ ilə bağlı milli parlamentlərə tövsiyələr qəbul edildi. Bildirildi ki, bu tövsiyələr TürkPA-nın 2013-cü ildə Türkiyədə keçiriləcək IV plenar sessiyasında təsdiq olunduqdan sonra üzv ölkələrin parlamentlərinə göndəriləcək. Milli parlamentlər həmin tövsiyələr əsasında yeni qanun layihələri hazırlayacaqlar.

Bununla da iclas başa çatdı.

Azərbaycan.-2012.- 6 noyabr.- S.3.