İranda fəaliyyət göstərən veb saytda Bakı İkinci Beynəlxalq Humanitar Forumu barədə məqalə yerləşdirilmişdir

İranda fəaliyyət göstərən nüfuzlu www.khabaronline.ir veb saytında cari ilin oktyabrında keçirilmiş Bakı İkinci Beynəlxalq Humanitar Forumu barədə fars dilində elmi məqalə yerləşdirilmişdir.

Müəllifinin Tehran Universitetinin professoru Bəhram Əmirəhmədianın olduğu məqalədə forumun əsas məqsəd və mahiyyəti geniş təhlil edilir. Müəllif yazır ki, bu beynəlxalq mərasim Azərbaycan Respublikasının dünya miqyaslı humanitar siyasətinin müsbət nəticələrinin nümunəsidir. Məqalədə Azərbaycanın beynəlxalq təşkilatlardakı yeri və rolu, dövlətimizin həyata keçirdiyi çoxşaxəli humanitar siyasətin mahiyyəti və nəticələri, qarşıya qoyulan məqsədlərə çatmaq üçün istifadə olunun vasitə və metodlar dərindən araşdırılmışdır. Bildirilir ki, forumda 70 ölkəni təmsil edən 694 görkəmli nümayəndənin iştirakına nail olmaq üçün Azərbaycan tərəfi böyük səmərəli fəaliyyət proqramı həyata keçirmişdir. Məqalədə yazılır: "Azərbaycan Respublikasına və Prezident İlham Əliyevə rəğbət və ehtiramlarını ifadə edən forum iştirakçıları bu beynəlxalq humanitar mərasimdə təmsil olmaqlarından iftixar duyduqlarını açıq şəkildə ifadə edirdilər. Forum XXI əsrdə bəşəriyyətin qarşısında dayanan problemlərin həlli üçün elmi-siyasi platformaların yaradılması, humanitar əməkdaşlığın səmərəliliyinin artırılması və genişləndirilməsi ətrafında hərtərəfli müzakirələrin aparılmasına və fikir mübadiləsinə şərait yaratmışdır. Professor çoxsaylı dəlillərlə əsaslandırır ki, Bakı İkinci Beynəlxalq Humanitar Forumunun nəticələri Azərbaycan Respublikasının beynəlxalq proseslərdəki rolu, tarixi, mədəniyyəti, iqtisadiyyatı, təbii resursları, insan potensialı, Azərbaycan xalqının milli mənəvi dəyərləri, əxlaqi keyfiyyətləri, adət-ənənələri və s. barədə həqiqətlərin dünya ictimaiyyətinə düzgün çatdırılması məsələsində növbəti bir uğurdur.

Sabir ŞAHTAXTI,

AzərTAc-ın xüsusi müxbiri

Tehran

Azərbaycan.-2012.- 6 noyabr.- S.7.