Qürurdan qaynaqlanan sevinc hissi

Ölkəmizin hər yerində böyük coşqu ilə zamanın tələbindən yaranmış, Azərbaycan vətəndaşlarının bütün arzu və istəklərinin tərənnümçüsü, ölkəmizin sürətli inkişafına töhfə verən böyük siyasi təşkilatın-Yeni Azərbaycan Partiyasının 20 illik yubileyi təntənə ilə qeyd edilir.

Yeni Azərbaycan Partiyası dedikdə, dərin minnətdarlıq duyğusu ilə ümummilli lider Heydər Əliyevi yada salır, onun hər birimizə örnək olan bənzərsiz ömür yoluna nəzər yetirməli oluruq.

Ümummilli liderimiz Heydər Əliyev ikinci dəfə Azərbaycana rəhbərlik etdiyi on ildə respublikamız bütün sahələrdə inkişaf etdi, güclü dövlətə çevrildi. İnkişaf edən iqtisadiyyatımız, nizami ordumuz yaradıldı.

Bu gün ulu öndərin siyasi kursunu Prezident İlham Əliyev uğurla davam etdirir. Bütün bölgələrimiz kimi, Yevlax da inkişaf edir, gözəlləşir, abadlaşır. İnsanlar daha firavan yaşayırlar.

Yevlax şəhərinin "Sahil" istirahət mərkəzində partiyanın yubileyi münasibətilə keçirilən tədbirdəki bütün çıxışlarda bu fikirlər təkrar-təkrar vurğulandı.

Tədbiri Milli Məclisin deputatı, YAP Yevlax rayon təşkilatının sədri İlham Məmmədov açdı. O, keçən dövr ərzində görülmüş işlərin böyüklüyünə diqqət çəkdi və bildirdi ki, xalqı bəlalardan, müstəqil dövlətçiliyimizi məhv olmaqdan xilas etmiş ümummilli liderin formalaşdırdığı bu siyasi təşkilatın 20 illik fəaliyyəti o qədər əhatəlidir ki, onun əzəmətini sözlərlə ifadə etmək çətindir. YAP yarandığı gündən vəzifələrinin öhdəsindən uğurla gəlir. İstər seçkilərin keçirilməsi, istərsə də partiyanın nüfuzunun gücləndirilməsi, həyata keçirilən siyasətin insanlar tərəfindən daha yaxşı qəbul olunması və təşviq edilməsi istiqamətində partiya öz vəzifələrini ardıcıl şəkildə, müvəffəqiyyətlə yerinə yetirir. Bu gün partiyanın ən böyük uğurlarından biri onun sıralarının günbəgün genişlənməsidir. Böyük sevinc hissilə qeyd edildi ki, YAP Yevlax rayon təşkilatının üzvlərinin də sayı artır. İndi təşkilatın üzvlərinin sayı 7400 nəfərdir. Bu, sadəcə statistika deyil, Azərbaycan vətəndaşlarının Prezident İlham Əliyevin siyasətinə münasibətidir. YAP Azərbaycanda fəaliyyət göstərən partiyalardan ən demokratiki, daim mübariz əhval-ruhiyyədə olan bir partiyadır.

Şəhər icra hakimiyyətinin baş referenti Vaqif Əliyev ŞİH başçısı Qoca Səmədovun yubileylə bağlı təbrik məktubunu oxudu. Təhbrik məktubunda deyilirdi:

"20 il ərzində ölkəmizdə əldə olunan nailiyyətlər, qələbələr, Azərbaycanın müasir, güclü dövlətə çevrilməsi, sözün həqiqi mənasında, Yeni Azərbaycan Partiyasının şərəfli tarixini ifadə edir. Partiyanın keçdiyi yolu Azərbaycanın bu illər ərzində keçdiyi yoldan ayrı təsəvvür etmək mümkün deyildir.

Müstəqil Azərbaycanın əldə etdiyi bütün uğurlar, yüksək nailiyyətlər, respublikamızın sosial-iqtisadi inkişafı ümummilli liderimiz Heydər Əliyevin yaratdığı Yeni Azərbaycan Partiyasının fəaliyyətilə bilavasitə bağlıdır.

Xalqın arzularının təcəssümü, yekdil iradəsinin ifadəsi olan Yeni Azərbaycan Partiyasının üzvləri Azərbaycan cəmiyyətinin inkişafında və yeniləşməsində, dövlət quruculuğunda yaxından iştirak etmiş, uğurlara imza atmışdır.

Azərbaycan Respublikasının Prezidenti cənab İlham Əliyevin diqqət və qayğısı sayəsində son 9 il ərzində şəhərimizdə həyata keçirilən geniş abadlıq, quruculuq, tikinti işlərində Yeni Azərbaycan Partiyasının Yevlax rayon təşkilatının üzvləri də fəal iştirak etmişlər".

Tədbirdə YAP Yevlax rayon təşkilatının bir qrup fəalına təşkilatın fəxri fərmanları və qiymətli hədiyyələr təqdim edildi.

Sonra YAP Yevlax rayon təşkilatının aparat rəhbəri Əli Quliyev çıxış etdi. Bildirdi ki, yubileylə bağlı YAP Yevlax rayon təşkilatı geniş tədbirlər planı hazırlayıb həyata keçirmişdir. Buraya şəhər məktəbliləri arasında şahmat yarışlarının, inşa yazı müsabiqəsinin, 9 rayon təşkilatının komandaları arasında mini-futbol turnirinin keçirilməsi və s. daxildir.

YAP Siyasi Şurasının üzvü, ekologiya və təbii sərvətlər nazirinin müavini Firdovsi Əliyev bildirdi ki, ölkədə bütün sahələrdə olduğu kimi, ekologiya sahəsində, ətraf mühitin sağlamlaşdırılmasında da böyük layihələr həyata keçirilib və bu iş davam etdirilir. Ölkə başçısının qayğı və diqqəti sayəsində Yevlax da daxil olmaqla ölkənin hər yerində əhalinin içməli suya olan tələbatının yüksək səviyyədə ödənilməsi üçün böyük layihələr icra edilir. Təmizləyici qurğuların işə salınması nəticəsində əhali Beynəlxalq Səhiyyə Təşkilatının standartlarına cavab verən su ilə təmin olunur. Ölkəmizdə aparılan düzgün siyasətin nəticəsidir ki, ekoloji problemlərin həlli istiqamətində də uğurlara nail olunur. Bu, insanların sağlamlığına xidmət edir.

Rayon prokuroru, baş ədliyyə müşaviri Elxan Pənahov, Yeni Azərbaycan Partiyası mərkəzi aparatının məsul işçisi Araz Xudadanov, YAP üzvü Qənimət Qaraşov və başqaları çıxışlarında siyasi həmfikirlərini şərəfli yubiley münasibətilə təbrik edərək partiyanın ötən dövr ərzindəki fəaliyyətindən söz açdılar. Qeyd edildi ki bu gün möhtərəm Prezident İlham Əliyevin rəhbərliyi altında xalqımız gözəl günlər yaşayır, ölkəmizdə sabitlik hökm sürür, əmin-amanlıq, insanların rifah halının durmadan yaxşılaşdırılması və s. həyatımızın istiqamətini müəyyən edir. Bunda YAP-ın böyük xidmətəlri var. Ölkə başçısının apardığı uğurlu daxili və xarici siyasət Azərbaycanı regionun qüdrətli dövlətinə çevirib. Ölkəmizin səsi ən mötəbər məclislərdən gəlir. Bu yolla inamla addımlayan Azərbaycanı daha işıqlı və nurlu gələcək gözləyir.

Yeni Azərbaycan Partiyasının yaranmasının 20 illik tarixi Yevlaxda təntənə ilə keçdi. Səmimi ovqatda saatlarla davam edən tədbirə musiqi töhfələri ilə rəngarəngliyi isə Gəncə Dövlət Filarmoniyasının F.Əmirov adına Kamera Orkestri və məşhur "Göygöl" xalq çalğı alətləri ansamblının kollektivləri bəxş etdilər.

Mərasim Kür çayı sahilindəki Bulvar istirahət mərkəzində xüsusi konsert proqramı ilə davam etdi.

Əminə YUSİFQIZI,

YAP Yevlax rayon təşkilatı

Qadınlar Şurasının sədri

Azərbaycan.-2012.- 8 noyabr.- S.4.