İnfrastruktur layihələri regionların simasını dəyişir

İdman Olimpiya kompleksləri, dünya standartlarına cavab verən tibbi diaqnostika mərkəzləri, müasir tipli məktəb və çoxmərtəbəli yaşayış binaları, istehsal obyektləri və digər infrastruktur layihələri indi hər bölgədə, hər rayonda həyata keçirilir. Paytaxtı görümlü-baxımlı edən yeniliklər indi ağırlıq mərkəzini regionlara salıb. Milli iqtisadiyyatın ildən-ilə güclənməsi regionlarda sosial-iqtisadi infrastrukturların yenidən qurulması prosesini daha da sürətləndirib. Bölgələrdə bir-birindən yaraşıqlı fərdi evlər tikilir, əhali su, qaz və elektrik enerjisi ilə fasiləsiz təmin edilir, yeni magistrallar, körpülər, yol qovşaqları tikilir, müəssisələr işə salınır, sosial-mədəni və turizm təyinatlı obyektlər yaradılır. Nəticədə rayon mərkəzlərinin, eləcə də qəsəbə və kəndlərin sosial-iqtisadi və mədəni siması sürətlə dəyişir. Artıq qəsəbələr şəhərlərə, kəndlər qəsəbələrə çevrilir, yeni yaşayış məskənləri salınır, bir sözlə, həyat başdan-başa yeniləşir.

Ölkənin ikinci böyük şəhəri olan Gəncə də başdan-başa yenidən qurulur. Cavad xan, Məhsəti, Natəvan, Sadıllı və Şıxzamanlı yaşayış massivləri artıq qəsəbə statusunu daşıyır. Prezident İlham Əliyevin xeyir-duası ilə təməli qoyulmuş Heydər Əliyev Mərkəzinin, Azərbaycanın dahi şairi və mütəfəkkiri Nizami Gəncəvi Muzeyinin, Gəncə Dövlət Filarmoniyasının və onlarca digər obyektin inşası davam etdirilir. Dövlət başçısının tövsiyəsi ilə İmamzadə ziyarətgahı yenidən qurulur, "Şah Abbas" və "Uğurlu xan" karvansaraları əsaslı təmir olunur, Gəncə-Bakı magistralının hər iki tərəfində inşa edilən "Qala" kompleksində yerli arxitektura üslubunda aparılan tikinti-quruculuq işləri müasirliyi ilə diqqət çəkir. Fikrət Əmirovun adını daşıyan parkda, Gəncəçay sahilindəki Nizami guşəsində, Hacı Zeynalabdin Tağıyev parkında aparılan yenidənqurma işləri isə yekunlaşmaq üzrədir. Yenidən qurulan C.Cabbarlı, A.Səhhət, M.Hadi, İstiqlal parkları ilə yanaşı, Əziz Əliyev və Məhsəti Gəncəvi adına yeni istirahət parkı yaradılır. Yaxın vaxtlarda istifadəyə veriləcək Beynəlxalq Nizami Mərkəzi, filarmoniya, Gənclər sarayı, Heydər Əliyev Mərkəzi, Kamera Orkestri, Kukla Teatrı, Mərkəzi Kitabxana, 10-a qədər orta məktəb, uşaq bağçası, məktəbəqədər müəssisə, Məhsəti muzeyi, onlarca mini idman meydançası, Gəncəçayın ətrafında yaradılacaq Sahil parkı və digər infrastruktur layihələrin həyata keçirilməsi şəhərin qədim görkəminə müasirliyi ilə seçilən yeniliklər bəxş edəcək.

Şəmkir rayonunda da iqtisadiyyatın bütün sahələrində müşahidə olunan iqtisadi artım, yaxşılaşan sosial şərait, iş adamlarına, fermerlərə, fiziki şəxslərə dəstək, yaşlı nəslə göstərilən qayğı insanlarda xoş ovqat yaradıb. Ötən üç ildə rayonda 1000-ə yaxın, cari ilin doqquz ayı ərzində isə 500-dən çoxu daimi olmaqla 3710 iş yerı açılmışdır. Azərbaycan Prezidenti İlham Əliyevin iştirakı ilə təməli qoyulan Şəmkirçay dəryaçasının tikintisi uğurla davam edir. Əhalinin içməli suya olan tələbatını ödəmək üçün Şəmkirçay dəryaçasından gətiriləcək suyu qəbul etmək üçün hər birinin tutumu 9 min kubmetr olan 4 su anbarı artıq hazırdır. Şəhər sakinlərinə verilməsi nəzərdə tutulan bulaq suyu üçün tutumu 3 min kubmetr olan su anbarının tikintisinə isə yaxın günlərdə başlanılacaq. Ötən ildən başlanılan qəsəbə və kənd yollarında əsaslı təmir və asfaltlanma işləri də yekunlaşmaq ərəfəsindədir. Kür qəsəbəsinə gedən 12 kilometr yol isə əsaslı təmirdən sonra müasir standartlar səviyyəsinə çatdırılıb, eyni zamanda, Qaracaəmirli ilə Təzəkəndi birləşdirən yol əsaslı təmir olunub. Bunlardan əlavə, şəhərin içməli su xətti və kanalizasiya sistemi yenidən qurulur, Qarabağ müharibəsi əlilləri və şəhid ailələri üçün 36 mənzilli bina inşa olunur, 14 hektara yaxın ərazini əhatə edəcək Heydər Əliyev Mərkəzinin, Gənclər evinin, Bayraq meydanının, abidələr parkının tikintisi davam etdirilir.

İnfrastruktur yenilikləri sırasında Heydər Əliyev Fondunun hesabına tikilmiş müasir tipli məktəblər xüsusilə seçilir. İki ay bundan əvvəl rayonun Düyərli, Şeyidlər, Abbaslı kəndlərində müasir standartlara cavab verən yeni məktəb binaları istifadəyə verilmişdir. Hazırda Sabirkənd, Seyfəli, Qasım İsmayılov, Qaralar, İsgəndərli kəndlərində və Zəyəm qəsəbəsində yeni məktəb binaları tikilir.

Rayon əhalisinin təbii qaz və elektrik enerjisi ilə fasiləsiz təmin edilməsi üçün də lazımi tədbirlər həyata keçirilir. Hazırda ən ucqar kəndlərdə belə əhali elektrik enerjisi ilə fasiləsiz təmin olunur. Bu gün rayon əhalisinin 95 faizi təbii qazdan istifadə edir.

Samux rayonunda da yolların təmiri və genişləndirilməsinə xüsusi diqqət yetirilir. Prezidentin sərəncamı əsasında tikilən Gəncə-Sərkar-Qarayeri-Qədili avtomobil yolunun Sərkar, Ziyadlı, Qovlarsarı kəndlərindən və Qarayeri qəsəbəsindən keçən hissələrinin kənarlarında abadlıq və yenidənqurma işləri artıq başa çatıb, yolun kənarında istirahət parkı salınıb. Həmçinin Alıuşağı-İnstitut-Gəncə yolunda təmir işləri aparılıb, yolun hər iki tərəfindəki yararsız tikililər və çəpərlər götürülüb, kənarlarına şam və sərv ağacları əkilib.

Nazirlər Kabinetinin 2012-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında ölkə başçısı demişdir: "Regional infrastruktur layihələri ilə bağlı digər istiqamətlər üzrə işlər sürətlə gedir. Həm magistral yollar, həm də şəhərlərarası yollar və kənd yolları tikilir. Deyə bilərəm ki, bu il kənd yollarına müasir Azərbaycan tarixində ən böyük vəsait qoyulmuşdur. Hər bir bölgədə kənd yolları tikilir və onlarca kənd, şəhərlər, rayon mərkəzləri bir-biri ilə birləşir. Bunun çox böyük mənası vardır. Bu, həm sosial məsələdir, biz bunu insanların rahatlığı üçün edirik. Eyni zamanda, bu, iqtisadi məsələdir. Çünki bir neçə bölgədə mənə müraciət olunarkən qeyd edilirdi ki, əgər kənd yolu çəkilərsə, o zaman bu bölgənin turizm imkanları açılacaqdır. Çünki turizmin inkişafı üçün kənd yolları əsas şərtdir. Nəzərə almalıyıq ki, bizdə turizm yerləri dağlıq ərazilərdədir, bəzi hallarda o gözəl, mənzərəli yerlərə çatmaq üçün insanların imkanı olmur. Ona görə biz bu məsələlərə fərdi qaydada baxırıq. İlin sonunda siyahı tutulur və kənd yollarının bəziləri dövlət büdcəsi, bəziləri isə Prezidentin Ehtiyat Fondu hesabına tikilir. Biz gələn il də eyni yanaşmanı tətbiq etməliyik".

Bu mənada turizm bölgəsi sayılan Lənkəranda həyata keçirilən tədbirlər diqqətəlayiqdir. Prezident İlham Əliyevin sərəncamı ilə Lənkəranın sosial-iqtisadi inkişafının sürətləndirilməsi məqsədilə ayrılmış 5 milyon vəsait hesabına rayon ərazisində xeyli işlər görülüb - yollar, küçələr təmir olunub, parklar, xiyabanlar yenidən qurulub, yaşıllıqlar salınıb. Artıq 40 kilometrlik Lənkəran-Vilvan-Osaküçə-Türkəncil yolunun yarıya qədəri asfaltlanıb. Şürük-Vel-Qamışlı yolunun tikintisi isə başa çatmaq üzrədir.

Prezidentin sərəncamı ilə Astara rayonunun sosial-iqtisadi inkişafının sürətləndirilməsi üçün ümumilikdə 7 milyon manata yaxın vəsait ayrılması burada aparılan tikinti-quruculuq və yolların əsaslı təmiri işlərinə yeni ahəng vermişdir. Cari ilin doqquz ayında yolların təmiri, abadlaşdırılması və asfaltlanması Yardımlı, Lerik və Cəlilabad rayonlarında da uğurla davam etmişdir. Göyçayda isə İkinci Kənd İnvestisiya Layihəsi çərçivəsində Çayarxı, Çaxırlı və Yekəxana kəndlərində ümumi uzunluğu 15,3 kilometr olan kəndarası yollar təmir edilmiş, 6 yerdə su keçidləri bərpa olunmuş, yeni su keçidləri tikilmiş, Hacalıkənd-Qaraman-Ləkçılpaq kəndarası avtomobil yolunun bir hissəsinə yeni asfalt salınmışdır. Habelə Goranboy rayonunda şəhərin Gəncə istiqamətindən girişində ikitərəfli yolun tikintisi başa çatdırılmış, Nizami Gəncəvi adına parkın 1,5 hektardan ibarət birinci hissəsi istifadəyə verilmişdir. Saatlı rayonunda Gənclər Mərkəzi, Tarix-Diyarşünaslıq Muzeyi və Rəsm Qalereyası, Şahmat məktəbi açılmış, habelə əsaslı yenidənqurmadan sonra rayon Mərkəzi xəstəxanası, Saatlı-Musalı-Məzrəli avtomobil yolunun Araz çayı üzərindən keçən hissəsində körpü istifadəyə verilmişdir. Bu günlər Beyləqan rayonunda da bir sıra təzə tikililər və sosial obyektlər açılmışdır. Yeni yaradılan Heydər Əliyev Mərkəzi və yenidən qurulan Mədəniyyət sarayı hamının sevincinə səbəb olmuşdur. Rayonda həmçinin Beyləqan-Kəbirli-Baharabad avtomobil yolu yenidənqurmadan sonra istifadəyə verilmiş, Beyləqan şəhərinin su və kanalizasiya sistemləri kompleksinin tikintisinə başlanılmışdır. Cari ilin doqquz ayında abadlıq, tikinti-quruculuq işləri ilə diqqətçəkən İmişlinin də sosial-iqtisadi həyatında əsaslı dəyişikliklər baş vermiş, bir sıra sosialyönümlü obyektlər istifadəyə verilmiş, mühüm infrastruktur layihələr yerinə yetirilmişdir. Heydər Əliyev Mərkəzi, Şahmat məktəbi, Olimpiya İdman Kompleksi inşa edilmiş, ümumi ərazisi 21,2 min kvadratmetr olan ikimərtəbəli Mərkəzi xəstəxana əsaslı təmirdən sonra fəaliyyətə başlamışdır.

Bütün bunlar onu göstərir ki, ölkə əhalisinin sosial həyat şəraitini yaxşılaşdırmaq üçün dövlət tərəfindən qayğı da var, diqqət də. Odur ki, paytaxtda olduğu kimi, respublikamızın bölgələrində də tikinti-quruculuq və abadlıq işləri, həyata keçirilən yeni infrastruktur layihələri getdikcə daha geniş vüsət alır.

Rəhman SALMANLI

Azərbaycan.-2012.- 9 noyabr.- S.8.