Bakı Metropoliteninin 45 illik yubileyinə həsr olunmuş təntənəli mərasim keçirilmişdir

Bakı metrosunun fəaliyyətə başlamasının 45 illik yubileyi və metropoliten işçilərinin peşə bayramı günü münasibətilə Müslüm Maqomayev adına Azərbaycan Dövlət Filarmoniyasında təntənəli mərasim keçirilmişdir.

AzərTAc xəbər verir ki, mərasimdə dövlət və hökumət rəsmiləri, Milli Məclisin deputatları, elm, mədəniyyət, siyasət xadimləri, "Metro" Beynəlxalq Assosiasiyasına daxil olan metropolitenlərin, istehsalat müəssisələrinin rəhbərləri və nümayəndələri iştirak etmişlər.

Yubiley tədbirində əvvəlcə dövlət himni səsləndirilmişdir.

Sonra Bakı Metropoliteninin rəisi Tağı Əhmədov Prezident İlham Əliyevin noyabrın 7-də metropoliten əməkdaşlarının fəxri adlara, dövlət mükafatlarına və Prezidentin fərdi təqaüdünə layiq görülməsi ilə bağlı sərəncamlarını oxumuş, bunu metro işçilərinə dövlət səviyyəsində göstərilən diqqət və qayğının təzahürü kimi qiymətləndirmişdir.

Bakı Metropoliteninin 45 illik fəaliyyəti barədə geniş məruzə ilə çıxış edən Tağı Əhmədov daim inkişafda olan metronun paytaxt Bakı üçün əhəmiyyətini vurğulamışdır. Dövlət başçısının 2011-ci ilin martında imzaladığı "Bakı Metropoliteninin perspektiv inkişafı ilə bağlı əlavə tədbirlər haqqında" sərəncamına əsasən hazırlanan "Bakı Metropoliteni xətlərinin Konseptual İnkişaf Sxemi"ndən və Bakı Metropoliteninin inkişafına dair Dövlət Proqramının uğurlu icrasından danışan T.Əhmədov metropolitenin qarşıdakı 20 il üçün inkişaf planına uyğun olaraq yeraltı polad yolların uzunluğunun 119 kilometrə, stansiyaların sayının isə 76-ya çatdırılacağını demişdir.

"Bu gün Bakını metrosuz təsəvvür etmək mümkün deyildir. Azərbaycanın memarlıq ənənələrini və milli koloriti əks etdirən metronun stansiyaları - yeraltı sarayları əsl incəsənət əsərləridir" - deyən T.Əhmədov bildirmişdir ki, hazırda Bakı Metropoliteni "İçərişəhər-Həzi Aslanov" və "Xətai-Dərnəgül" xətlərindən ibarətdir. Metropolitendə 52 eskalator işə salınmışdır. Metro tunellərinin ümumi uzunluğu 91,36 kilometrdir.

Bakı Metropoliteninin rəisi qeyd etmişdir ki, dövlətimizin diqqət və qayğısı sayəsində metropoliten hazırda yeni stansiyaların inşasını fəal surətdə həyata keçirir. Son üç il ərzində rahatlığı və dizaynı ilə seçilən "Nəsimi", "Azadlıq prospekti" və "Dərnəgül" stansiyaları istismara verilmişdir. "Azadlıq prospekti" stansiyası isə Bakı Metropoliteninin ilk təktağlı və sütunsuz stansiyasıdır.

Həmçinin indi ikinci elektrik deposunun və yeni stansiyanın layihələndirilməsi və tikintisi ilə bağlı hazırlıq işləri gedir ki, bu da Beynəlxalq Bakı Avtovağzal Kompleksini şəhərin digər hissələri ilə birləşdirəcəkdir.

Bakı Metropoliteninin perspektiv inkişaf proqramına əsasən metropolitenin 5 xətdən ibarət olacağını vurğulayan T.Əhmədov diqqətə çatdırmışdır ki, perspektivdə 53 yeni stansiyanın və 84,4 kilometr uzunluqda metro xətlərinin inşası nəzərdə tutulur.

"Koroğlu" və "İçərişəhər" stansiyalarında yenidənqurma işləri aparılmış, müasir eskalatorlar quraşdırılmışdır. Cari ilin yayında sərnişin axınının çoxluğu ilə fərqlənən "28 May" stansiyasında mövcud LT-3 eskalatorları əvəzinə, Almaniya istehsalı olan 4 müasir "Tugela" eskalatoru istifadəyə verilmişdir. Yenidənqurma işləri bundan sonra da davam etdiriləcəkdir. Metro stansiyalarının inşası sahəsində ən yeni üsulların tətbiqi stansiyanın həm yerüstü vestibülünün dizaynını, həm də yeraltı görkəmini tamamilə dəyişəcəkdir. "Elmlər Akademiyası" stansiyasının ikinci çıxışının inşasına başlanılmışdır ki, bu da stansiyanın hərəkət yükünü azaltmağa, sərnişinlərin rahatlığını təmin etməyə imkan verəcəkdir.

T.Əhmədov vurğulamışdır ki, metro vaqonları parkının proqrama uyğun surətdə yeniləşdirilməsi üçün dövlətin yardımı ilə Bakı Metropoliteni sıx əməkdaşlıq etdiyi Rusiyanın "Metrovaqonmaş" müəssisəsindən 166 yeni vaqon almışdır. Görülən tədbirlər nəticəsində Bakı Metropoliteni ötən müddətdə 177 milyon sərnişin daşımışdır.

Son illərdə təhlükəsizliyə də böyük əhəmiyyət verildiyini deyən metropoliten rəisi vurğulamışdır ki, hər hansı terror aktlarının qarşısını operativ surətdə almaq, sərnişinlərin təhlükəsizliyini təmin etmək, qatarların hərəkətini və sərnişin axınını tənzimləmək, mühəndis-texniki qurğulara nəzarət etmək, ictimai asayişin pozulması hallarının qarşısını operativ surətdə almaq, Bakı Metropoliteninin stansiyalarındakı mühüm obyektlərin mühafizəsini təmin etmək məqsədilə mərkəzləşdirilmiş vahid "təhlükəsizlik və videomüşahidə şəbəkəsi" yaradılmışdır. Vestibüllərdə, eskalatorlarda, stansiyaların platformalarında, keçidlərdə, vaqonlarda 3 mindən çox videomüşahidə kamerası qurulmuşdur ki, bunlar metropolitenin bütün sahələrində vəziyyəti müntəzəm müşahidə etməyə imkan verir.

Sonra nəqliyyat naziri Ziya Məmmədov metropoliten işçilərini təbrik edərək, 1967-ci ildən etibarən metro tikintisinin uğurla davam etdirildiyini və bu günədək böyük inkişaf yolu keçdiyini diqqətə çatdırmışdır. Nəqliyyat naziri bildirmişdir ki, metropolitenin inkişafı ulu öndər Heydər Əliyevin Azərbaycana rəhbərlik etdiyi dövrə, xüsusilə, 1970-ci illərə və müasir dövrə təsadüf edir. Ümummilli liderin müstəqillik dövründə ölkəyə rəhbərliyə qayıtması ilə Bakı Metropoliteninin həyatında növbəti yeni mərhələ başlamışdır. Beş stansiya istisna olmaqla, Bakı Metropoliteninin bütün stansiyalarının tikintisi məhz ulu öndərin adı ilə bağlıdır. Bu gün ümummilli lider Heydər Əliyevin Bakı Metropoliteninə və metro işçilərinə qayğı və diqqətini Prezident İlham Əliyev uğurla davam etdirir.

Nazir bildirmişdir ki, hazırda metropolitenin tikintisi ilə yanaşı, istismarda olan metro şəbəkəsinin maddi-texniki bazasının gücləndirilməsi, yenidənqurma və bərpa işlərinin aparılması da uğurla həyata keçirilir. Metronun vaqon parkı yenidən qurulur, yeni vaqonlar alınır.

Metropolitenin bundan sonra da paytaxtın əsas ictimai nəqliyyat vasitəsi kimi daha da inkişaf edəcəyinə əminliyini bildirən Z.Məmmədov nəqliyyat sistemində metronun xüsusi ağır sahə olduğunu vurğulayaraq, yeraltı yollarımızın daimi fəaliyyətini təmin edən metropolitençilərə təşəkkürünü bildirmişdir.

Daha sonra Moskva Metropoliteninin rəhbəri İvan Besedin, Bakı Dövlət Universitetinin rektoru, Milli Məclisin deputatı Abel Məhərrəmov, Rusiyanın "Transmaşholdinq" müəssisəsinin rəhbəri Andrey Andreyev və "Metro" Assosiasiyası Müdiriyyətinin baş direktoru İqor Yermolenko çıxış edərək bildirmişlər ki, Bakıda yeraltı yollara dövlət səviyyəsində göstərilən böyük qayğı və diqqət digər postsovet ölkələrinə nümunə ola bilər. Bakı Metropoliteni fəaliyyəti dövründə ağır tarix də yaşayıb, keçid dövrləri də. Lakin bu illərdə metropoliten öz qaydasında və ritmində çalışmış, ən nümunəvi ictimai nəqliyyat növü olmuşdur. Natiqlər Bakı Metropoliteninin paytaxtın nəqliyyat infrastrukturunda xüsusi rol oynadığını, metronun vaqon parkının yeniləndiyini, göstərilən xidmətin keyfiyyətinin ildən-ilə yaxşılaşdığını və metropoliten sistemində ən müasir standartların tətbiqini yüksək qiymətləndirmişlər.

Bildirilmişdir ki, Azərbaycanda metro tikintisi ilə yanaşı, metropoliten işçilərinin sosial rifahının yaxşılaşdırılması məsələsinə də xüsusi diqqət göstərilir. Bu gün dinamik inkişaf edən Azərbaycanda yeraltı nəqliyyatın sərnişindaşıma sahəsində rolu danılmazdır. Metro həmçinin Bakıya xüsusi gözəllik verir. Müasirliyi ilə seçilən yaraşıqlı stansiyalar könül oxşayır. Dövlətimizin qayğısı ilə Bakı metrosu hələ çox uzaqları yaxın edəcək, paytaxt meqapolisinin ən əhəmiyyətli nəqliyyat vasitələrinin birinə çevriləcəkdir.

Mərasim Azərbaycan incəsənət ustalarının konserti ilə davam etmişdir.

AzərTAc

Azərbaycan.-2012.- 9 noyabr.- S.10.