YAP Yasamal rayon təşkilatı partiyanın 20 illik yubileyi ilə əlaqədar konfrans keçirdi

Dünən YAP Yasamal rayon təşkilatı Yeni Azərbaycan Partiyasının yaranmasının 20 illik yubileyi ilə bağlı konfrans keçirmişdir. Tədbiri açan YAP Yasamal rayon təşkilatının sədri Fikrət İsmayılov bildirdi ki, müasir Azərbaycan tarixində əlamətdar günlər çoxdur. Belə günlərdən biri də analoqu olmayan, zəmanəmizin ən mütərəqqi partiyası YAP-ın yubileyinin qeyd olunmasıdır.

Qeyd edildi ki, 1992-ci ilin oktyabr ayının 14-də ulu öndər Heydər Əliyevə 91 nəfər ziyalının müraciəti ünvanlanmışdır. Bundan iki gün sonra bu müraciət "Səs" qəzetində dərc edilmiş, oktyabrın 20-də isə Heydər Əliyevdən bu müraciətə cavab alınmışdır. Ümummilli lider bu partiyanı yaratmaq istəyənlərin qarşısına bir sıra tələb qoymuşdur. Əgər partiyanı yaratmaq istəyənlər qarşıya qoyulan ideyaların həyata keçirilməsində iştirak edəcəksə, onda Heydər Əliyev partiyanı yaratmağa və ona rəhbərlik etməyə razılıq verirdi.

1992-ci il noyabrın 21-də ölkəmizin bütün bölgələrini təmsil edən 550 nəfər Naxçıvan şəhərində Heydər Əliyevin ətrafında sıx birləşdi və Yeni Azərbaycan Partiyası yaradıldı.

Hazırda YAP-ın 600 min nəfər üzvü var. Bu rəqəm ölkə vətəndaşlarının YAP-a olan hörmətini, inamını, etiqadını əks etdirir.

Partiyanın hazırkı sədri, Azərbaycan Prezidenti cənab İlham Əliyev ulu öndər Heydər Əliyevin ən layiqli varisidir. Prezident hakimiyyətdə, idarəçilikdə, diplomatiyada ümummilli liderin məktəbini keçib. Cənab İlham Əliyevin bugünkü fəaliyyəti, Azərbaycanın dinamik inkişafı bunu bir daha təsdiqləyir.

Bakı Metropoliteninin rəisi, YAP Yasamal rayon təşkilatının sədr müavini Tağı Əhmədov partiyanın yaranma tarixindən bəhs etdi. Bildirdi ki, Yeni Azərbaycan Partiyası Azərbaycan tarixinin son dərəcə ağır və kəşməkəşli günlərində, ölkənin ciddi sınaqlara məruz qaldığı bir dövrdə 91 ziyalının təşəbbüsü və iştirakı ilə yaranmışdır. Ölkəmizin taleyini düşünən insanlar xalqımızın sınanmış lideri və müdrik oğlu Heydər Əliyevin ətrafında birləşmişlər.

T.Əhmədov qeyd etdi ki, Azərbaycanın xilaskarı Heydər Əliyevin ideyaları bu gün də həyata keçirilir və təkamül yolu ilə daha da inkişaf etdirilir.

Yasamal Rayon İcra Hakimiyyətinin başçısı İbrahim Mehdiyev çıxışında toplantı iştirakçılarını həm partiyanın 20 illik yubileyi, həm də Konstitusiya Günü münasibətilə təbrik etdi. O qeyd etdi ki, YAP-ın yaranmasının əsas səbəblərindən biri ötən əsrin 90-cı illərinin əvvəllərində ölkədə gedən neqativ proseslər, yaşayış səviyyəsinin pisləşməsi, müstəqilliyimizin təhlükə ilə üz-üzə qalması idi. Belə bir vaxtda 91 ziyalı ulu öndər Heydər Əliyevin hüzuruna gedərək ölkənin bu acınacaqlı vəziyyətdən çıxarılmasını üzərinə götürməyi xahiş etdi.

Bütün çətinliklərə baxmayaraq YAP Heydər Əliyevin rəhbərliyi altında xalqı bəlalardan xilas etdi, müstəqil ölkəmizin yeni iqtisadi strategiyasını və gələcək inkişaf yollarını müəyyənləşdirdi. Ölkədə sabitlik bərqərar olundu. Ulu öndərin bütün həyat yolu bizə və gələcək nəsil üçün örnəkdir.

2003-cü ildən isə YAP-a möhtərəm İlham Əliyev rəhbərlik edir. Onun quruculuq fəaliyyəti, uğurlu daxili və xarici siyasəti iqtisadiyyatımızın dinamik inkişafına yol açmış və hazırda Azərbaycan regionun lider dövlətinə çevrilmişdir.

İ.Mehdiyevin çıxışından sonra bir sıra ali təhsil məktəbinin tələbələri və bəzi müəssisələrin gənc əməkdaşları partiya sıralarına qəbul edildi və onlara üzvlük vəsiqələri təqdim olundu.

Sonra YAP qadınlar şurasının sədri Nurlana Əliyeva çıxış etdi. O bildirdi ki, bu gün təkcə Yeni Azərbaycan Partiyasının deyil, bütün Azərbaycanın bayramıdır. Əbədiyaşar şəxsiyyət, müdrik siyasətçi Heydər Əliyevin yaratdığı partiyanın 600 min üzvünün 48 faizini qadınlar təşkil edir. Qadınlar cəmiyyətimizin aparıcı qüvvəsidir və bütün dövrlərdə gənclərin vətənpərvər, sağlam ruhda böyüməsində onların böyük rolu olmuşdur. YAP sıralarında birləşən on minlərlə qadın cəmiyyətimizdə yüksək nüfuz sahibidirlər və bu vəzifələrin öhdəsindən layiqincə gəlmək iqtidarındadırlar. Ən böyük məqsədimiz Qarabağı azad edə biləcək əqidəli, məsləkli gənclərin yetişdirilməsidir. Ölkəmizin daxili və xarici siyasətində Heydər Əliyevin atdığı müdrik addımlar Azərbaycanı yüksəklərə qaldırmışdır. Bu siyasət indi də davam edir. Ölkəmizin inkişafı və intibahı üçün biz qadınlar əlimizdən gələni əsirgəməyəcəyik.

N.Əliyevanın çıxışından sonra "Azərsu", Bakı Metropoliteni ərazi ilk partiya təşkilatı, 2 nömrəli tibb məktəbi və "Neft-qaz layihə" elmi-tədqiqat institutu "Partiyanın ictimai-siyasi həyatında fəal iştirakına görə" fərqlənmə diplomu ilə təltif olundular.

Bir müddət əvvəl YAP Yasamal rayon təşkilatı partiyanın formalaşmasında və inkişafında tarixi şəraitin rolu mövzusunda inşa müsabiqəsi elan etmişdir. Müsabiqənin nəticələrinə görə beş qalib müəyyənləşdirilmişdir. Tədbirdə onlara fəxri diplomlar və pul mükafatları təqdim olundu.

Müsabiqənin qaliblərindən Afaq Abdullayeva (BDU-nun hüquq fakültəsi) və Nərmin Abbasəliyeva (BDU-nun tarix fakültəsi) çıxış edərək müstəqil Azərbaycan tarixində öz üzərinə böyük missiya götürən və xalqımızın həyatında mühüm hadisəyə çevrilən Yeni Azərbaycan Partiyasının yaranmasından, partiyanın proqramında irəli sürülmüş əsas vəzifələr - dövlət müstəqilliyinin möhkəmləndirilməsindən, demokratik, hüquqi, dünyəvi dövlətin qurulmasından, vətəndaşların firavan həyatının təmin edilməsindən danışdılar.

Bakı Dövlət Universitetinin rektoru, YAP İdarə Heyəti və Siyasi Şurasının üzvü Abel Məhərrəmov çıxışında bildirdi ki, YAP yeganə partiyadır ki, bir ildən az vaxtda yaradılmış, bir ildən az vaxt ərzində hakimiyyətə gəlmiş və bu gün də hakimiyyətdədir. Ümummilli lider Heydər Əliyevin tarixi xidmətlərindən bəhs edən natiq qeyd etdi ki, ölkə həyatında - siyasətdə, iqtisadiyyatda, elm və təhsildə, digər sahələrdə geniş islahatlar, möhtəşəm layihələr həyata keçirilir.

Bu gün ulu öndərin siyasi kursu Azərbaycan Prezidenti cənab İlham Əliyev tərəfindən uğurla davam etdirilir. Alternativi olmayan Yeni Azərbaycan Partiyası uzun illər hakimiyyətdə qalacaq və xalqımızı işıqlı yolla irəli aparacaq.

Yubiley tədbiri konsert proqramı ilə davam etdirildi.

Rizvan HİLALOĞLU

Azərbaycan.-2012.- 13 noyabr.- S.9.