Azərbaycan nümayəndə heyəti Xorvatiya və Albaniyada səfərdə olmuşdur

İqtisadi İnkişaf naziri Şahin Mustafayevin rəhbərliyi ilə Azərbaycan nümayəndə heyəti Xorvatiya və Albaniyada səfərdə olmuşdur. Xorvatiya Respublikasına səfər zamanı Şahin Mustafayev Xorvatiyanın Baş naziri Zoran Milanoviç ilə görüşmüşdür. Görüşdə iqtisadi əlaqələrin mövcud vəziyyəti, əməkdaşlığın inkişaf perspektivləri müzakirə edilmişdir.

Azərbaycan nümayəndə heyətinin Xorvatiyanın Baş nazirinin birinci müavini, iqtisadiyyat naziri Radimir Çaçiç, dənizçilik, nəqliyyat və infrastruktur naziri Sinisa Haydas-Donçiç ilə görüşlərində iqtisadiyyatın müxtəlif sahələrində əməkdaşlığın genişləndirilməsi, eləcə də qarşılıqlı maraq doğuran digər məsələlər müzakirə olunmuşdur.

Səfər çərçivəsində Xorvatiya-Azərbaycan biznes forumu keçirilmişdir. Forumda çıxış edən Radimir Çaçiç ölkəsində Azərbaycanla əlaqələrə böyük önəm verildiyini qeyd etmiş, biznes forumu və işgüzar görüşlərin iş adamları arasında əməkdaşlığın daha da genişlənməsində, ikitərəfli ticarət əlaqələrinin inkişafında əhəmiyyətini vurğulamışdır. Şahin Mustafayev isə Azərbaycan və Xorvatiya arasında əlaqələrin qarşılıqlı dostluq, faydalı əməkdaşlıq prinsipləri üzərində qurulduğunu, dövlət başçılarının qarşılıqlı rəsmi səfərlərinin, aparılan danışıqların ikitərəfli əlaqələrin genişlənməsində əhəmiyyətini vurğulamışdır. Azərbaycan-Xorvatiya iqtisadi əməkdaşlığının uğurla inkişaf etdiyini diqqətə çatdıran nazir Ş.Mustafayev ölkələrimiz arasında 10-dan çox sənədin imzalandığını, bu ilin yanvar-sentyabr ayları ərzində ticarət dövriyyəsinin ötən ilin analoji dövrü ilə müqayisədə 26 faiz artdığını bildirmişdir. Biznes forumlarının ticarət əlaqələrinin inkişafında, iş adamları arasında işgüzar əlaqələrin genişlənməsində əhəmiyyətli olduğunu qeyd edən nazir bu il Azərbaycan və Xorvatiya arasında 2-ci biznes forumunun keçirilməsinin işgüzar dairələrin əlaqələrinin inkişafında müsbət rol oynayacağını vurğulamış, turizm, energetika, əczaçılıq, kənd təsərrüfatı və s. sahələrdə əlaqələrin genişləndirilməsi üçün böyük potensialın olduğunu bildirmişdir. Şahin Mustafayev Azərbaycan iqtisadiyyatı və qazanılmış nailiyyətlər barədə məlumat vermiş, Prezident İlham Əliyev tərəfindən uğurla həyata keçirilən sosial-iqtisadi siyasət nəticəsində ölkədə möhkəm siyasi və makroiqtisadi sabitliyin, davamlı və dayanıqlı iqtisadi inkişafın təmin olunduğunu, əlverişli biznes və investisiya mühitinin yaradıldığını vurğulamış, xorvatiyalı iş adamlarını azərbaycanlı həmkarları ilə fəal əməkdaşlığa dəvət etmişdir.

Biznes forumunda AZPROMO-nun rəhbəri Rüfət Məmmədov Azərbaycanın biznes və investisiya imkanlarına, Xorvatiyanın İnvestisiya və Rəqabətlilik Agentliyinin rəhbəri Damir Noviniç isə Xorvatiyanın investisiya mühitinə dair təqdimatlarla çıxış etmişlər.

Tədbir çərçivəsində bir sıra Xorvatiya şirkətlərinin təqdimatları keçirilmişdir.

Səfərin sonunda mətbuat konfransı keçirilmiş, jurnalistləri maraqlandıran suallar cavablandırılmışdır.

Azərbaycan nümayəndə heyəti həmçinin Albaniya Respublikasında olmuş, bir sıra görüşlər keçirmişdir. Albaniyanın Baş naziri Sali Berişa ilə keçirilmiş görüşdə ölkələrimiz arasında əlaqələrin uğurla inkişaf etdiyi vurğulanmış, iqtisadi sahədə Azərbaycan-Albaniya əməkdaşlığının genişləndirilməsi ilə bağlı ətraflı fikir mübadiləsi aparılmışdır.

Azərbaycan nümayəndə heyətinin Albaniya Baş nazirinin müavini, iqtisadiyyat, ticarət və energetika naziri Edmond Haksinasto və Tirana şəhərinin meri Lulzim Başa ilə keçirilmiş görüşlərində isə Azərbaycan və Albaniyanın iqtisadiyyatına dair məlumatlar verilmiş, iki ölkə arasındakı iqtisadi əlaqələr və əməkdaşlıq imkanları müzakirə olunmuşdur.

Səfər çərçivəsində Azərbaycan nümayəndə heyəti üçün Albaniyanın İnvestisiyaların İnkişafı Agentliyi tərəfindən "Albaniyada investisiya mühiti və imkanlar" mövzusunda təqdimat keçirilmişdir. Azərbaycan nümayəndə heyəti Dürres və Porto Romano dəniz limanlarının fəaliyyəti ilə də tanış olmuşdur.

Azərbaycan.-2012.- 14 noyabr.- S.5.