AMEA-da «Din və etiqad azadlığı: hüquqi, siyasi və ictimai aspektlər» mövzusunda respublika konfransı keçirilir

Noyabrın 14-də Azərbaycan Milli Elmlər Akademiyasının (AMEA) İnsan Hüquqları İnstitutu və Dini Qurumlarla İş üzrə Dövlət Komitəsinin birgə təşkilatçılığı ilə "Din və etiqad azadlığı: hüquqi, siyasi və ictimai aspektlər" mövzusunda beynəlxalq səviyyəli respublika konfransı işə başlamışdır.

AzərTAc xəbər verir ki, tədbirin məqsədi din və etiqad azadlığı məsələlərinin hüquqi, siyasi və ictimai yönlərini beynəlxalq, regional və milli hüquqi sənədlər çərçivəsində dəyərləndirməkdir.

AMEA-nın İnsan Hüquqları İnstitutunun direktoru, Milli Məclisin deputatı Aytən Mustafayeva konfransda çıxış edərək bildirmişdir ki, Ümumdünya İnsan Hüquqları Bəyannaməsində, İnsan Hüquqları üzrə Avropa Konvensiyasında və digər beynəlxalq sənədlərdə təsbit olunmuş dini etiqad azadlığı hüququna ölkəmizdə Azərbaycan Konstitusiyası və milli qanunvericiliklə təminat verilmişdir.

Dini təriqətlər və təhlükəsizlik məsələlərindən söz açan A.Mustafayeva qeyd etmişdir ki, qədim dövrlərdən digər dinlərə loyal münasibət göstərən, tolerant dövlət və zəngin tarixə malik Azərbaycanda xristianlar, yəhudilər, müsəlmanlar sülh və bir-birilərinə hörmət şəraitində dinc yanaşı yaşamışlar. Lakin təəssüflər olsun ki, hazırda bəşəriyyət inkişafın müasir mərhələsində mövcud olan dinlərin parçalanmasına istiqamətlənmiş, ölkə, cəmiyyət və insan təhlükəsizliyinə ciddi hədə olan destruktiv, radikal dini təriqətlərlə qarşılaşmışdır. Azərbaycanda da yüzlərlə təriqət qeydə alınmışdır. Onların arasında dinc, zərərsiz təriqətlərlə yanaşı, millətimizin genofonduna, ölkəmizin milli maraqlarına və təhlükəsizliyinə ciddi təhlükə təşkil edənlər də az deyildir. Həmin təşkilatların nümayəndələri din pərdəsi altında ölkənin strateji vəziyyətini müəyyən edən proseslər haqqında məlumatları toplamaq imkanı verən strukturlar yaradırlar.

A.Mustafayeva destruktiv və dini törəmələrdən irəli gələn təhlükələri nəzərə alaraq onların qeydiyyat qaydalarını sərtləşdirməyin və bu qurumların ölkənin gənc nəslinə təsirinin hədə yaradan məqamlarına daha ciddi yanaşmağın zəruriliyini vurğulamışdır.

Dini Qurumlarla İş üzrə Dövlət Komitəsinin sədri Elşad İskəndərov vicdan azadlığının cəmiyyətin inkişaf meyarı kimi rolundan danışmışdır. O bildirmişdir ki, müasir qloballaşan dünyada baş verən mürəkkəb siyasi kataklizmlər, etnik-dini münaqişələr, aqressiv separatçılıq və dini ekstremizm, terrorizm kimi təhdidlər beynəlxalq sülh və təhlükəsizlik üçün ciddi maneə olaraq qalmaqdadır. Bu baxımdan dinin insan mənəviyyatında, əxlaqında və ictimai şüurunda oynadığı mühüm rolun və təsirin doğru məcraya yönləndirilməsi bilavasitə cəmiyyət həyatında vicdan azadlığı meyarlarının düzgün müəyyənləşdirilməsindən asılıdır.

Komitə sədri vurğulamışdır ki, hazırkı mərhələdə də dövlətimizin din siyasətinin əsas məqsədi ölkədə dini durumun müsbət və münaqişələrdən uzaq məcrada inkişafı üçün əlverişli şəraitin yaradılmasından, həmçinin cəmiyyətdaxili sabitliyin möhkəmləndirilməsindən ibarətdir. Məhz buna görə də vətəndaşlarımızın beynəlxalq səviyyədə tanınan fundamental hüquqlarının, xüsusilə də vicdan azadlığının qorunması yüksək səviyyədə təmin edilir.

Qafqaz Müsəlmanları İdarəsinin sədri, Şeyxülislam Allahşükür Paşazadə çıxış edərək demişdir ki, bu gün öz tarixinin parlaq səhifələrindən birini yaşayan müstəqil Azərbaycan tarixən müxtəlif xalqların, millətlərin və dinlərin birgə yaşadığı, mədəniyyətlərin qovuşduğu müqəddəs məkan olmuşdur. Tolerantlığın Azərbaycanda çox möhkəm təməl sütunları, zəngin ənənələri, dərin tarixi və mədəni kökləri vardır.

A.Paşazadə Azərbaycanda din-dövlət münasibətlərinin sarsılmaz zəmində olduğunu və bu birliyin həmişə dövlətçiliyin möhkəmləndirilməsinə, vətəndaş həmrəyliyinə və ictimai-siyasi həyatda uğurlara xidmət etdiyini vurğulamışdır. Bu gün Azərbaycanda bütün insan hüquq və azadlıqları kimi, dini etiqad azadlığı da yüksək səviyyədə qorunur və buna qanunlarımızla təminat verilir.

Azərbaycan Respublikasının Prezidenti yanında Strateji Araşdırmalar Mərkəzinin direktoru Fərhad Məmmədov, Azərbaycan pravoslav yeparxiyasının başçısı Aleksandr İşeyin, Azərbaycan dağ yəhudiləri icmasının rəhbəri Milix Yevdayev Azərbaycanın müxtəlif konfessiyaların dinc yanaşı fəaliyyət göstərdiyi tolerant ölkə olduğunu vurğulamış, burada bütün dinlərə bərabər şərait yaradıldığını, onlara eyni cür diqqət göstərildiyini bildirmişlər. Qeyd olunmuşdur ki, dini icmaların dəstəklənməsi dövlət səviyyəsində həyata keçirilir və bu, xalqlarımız arasında uzun əsrlərdən bəri mövcud dost və qarşılıqlı anlaşma münasibətlərini daha da möhkəmləndirir.

Sonra konfrans işini plenar sessiyada davam etdirmişdir. İclasda mövzuya dair məruzələr dinlənilmiş, Azərbaycanda din və etiqad azadlığının hüquqi, siyasi və ictimai aspektləri ətrafında geniş fikir mübadiləsi aparılmış, iştirakçılar müzakirə olunan məsələlərlə bağlı təklif və mülahizələrini bildirmişlər.

Tədbirdə Azərbaycan Respublikasının Prezidenti Administrasiyasının məsul işçiləri, Milli Məclisin deputatları, ölkəmizdə fəaliyyət göstərən konfessiyaların və dini icmaların rəhbərləri, nazirlik və komitələrin nümayəndələri, beynəlxalq təşkilatların təmsilçiləri, alimlər iştirak etmişlər.

Konfrans noyabrın 15-də işini davam etdirəcəkdir.

Azərbaycan.-2012.- 15 noyabr.- S.7.