Milli Məclisdə
2013-cü il dövlət büdcəsi zərfinə daxil olan layihələrin
müzakirəsi başa çatdı
Dünən Milli Məclisdə "Azərbaycan
Respublikasının 2013-cü il dövlət büdcəsi
haqqında" qanun layihəsinin müzakirəsi başa
çatdı. İclasda eyni zamanda büdcə zərfinə
daxil olan "Dövlət Sosial Müdafiə Fondunun
2013-cü il büdcəsi haqqında", "Azərbaycan
Respublikasında 2013-cü il üçün
yaşayış minimumu haqqında", "Azərbaycan
Respublikasında 2013-cü il üçün ehtiyac
meyarının həddi haqqında", "Milli Məclisin
2013-cü il üçün xərclər smetasi
haqqında" və "Hesablama Palatasının 2013-cü
il üçün xərclər smetası haqqında"
qanun layihələri də müzakirə edildi.
Neftin qiymətinin
kəskin düşməsi büdcəyə ciddi risk
yaratmayacaqdır
Milli Məclisin
Sədri Oqtay Əsədov bildirdi ki, ötən iki gün ərzində
2013-cü ilin dövlət büdcəsi geniş müzakirə
olunub, deputatlar bir sıra məsələlərlə
bağlı rəy və təkliflərini səsləndiriblər.
Bu iclasda maliyyə naziri və İqtisadi İnkişaf
Nazirliyinin nümayəndəsi deputatların
qaldırdıqları məsələlərə aydınlıq
gətirəcəklər.
Öncə maliyyə naziri Samir Şərifov
çıxış edərək bildirdi ki, deputatların bəziləri
çıxışlarında büdcə layihəsində
neftin 1 barelinin qiymətinin 100 dollar olması ilə
bağlı risklərin yaranacağını söylədilər:
Amma bu, belə deyildir: "Dövlət büdcəsinin gəlirlərinin
bir qismi gömrük və vergi orqanlarından daxilolmalar və
Dövlət Neft Fondundan transfertlər hesabına
formalaşacaqdır. Büdcəyə Dövlət Neft
Fondundan transfert neft rəqəmləri ilə bağlı
deyildir. Vergi daxilolmaları qeyri-neft sektorundan, ARDNŞ və
ABƏŞ-dən daxil olan vergilərdən ibarətdir. Mənfəət
vergiləri müəyyən risklərlə üzləşə
bilər. Digər tərəfdən, neftin qiymətinin kəskin
düşməsi büdcəyə ciddi risk yaratmayacaqdır.
Hökumət beynəlxalq vəziyyəti izləyir və
növbəti illərdə neftin qiymətinə dəyişikliklər
edilə bilər. Lakin hökumətin hesablamalarına görə,
dövlət büdcəsinin gəlirlər hissəsinə dəyişikliklər
gözlənilmir".
Nazir bildirdi ki, 2013-cü ilin dövlət
büdcəsində həkimlərin, müəllimlərin əməkhaqlarının
artırılması nəzərdə tutulur. Onun sözlərinə
görə, 2004-cü ildən minimum aylıq əməkhaqlarının
baza hissəsinin 10 dəfədən çox artımı
baş verib: "Həkim və müəllimlərin əməkhaqları
11 dəfə artırılıb. Gələn il də bu ənənə
davam etdiriləcək və maaşlar
qaldırılacaqdır".
İqtisadi inkişaf nazirinin müavini
Sevinc Həsənova da deputatların irəli sürdükləri
təkliflərə münasibət bildirdi. Nazir müavini eyni
zamanda, iqtisadi inkişaf konsepsiyasının məqsədlərini
açıqladı. Bildirdi ki, həmin sənəddə
iqtisadiyyatın bütün sahələrinin inkişaf istiqamətləri
müəyyən olunub. Konsepsiyada maşınqayırma, kimya,
metallurgiya, yüngül sənaye, turizmin inkişafı əsas
götürülüb: " Qarşıdan gələn 10 ildə ÜDM-in həcmini
2 dəfədən çox artırmağı,
adambaşına düşən gəliri 13 min dollara
çatdırmağı qarşımıza məqsəd qoymuşuq.
Gələn il qeyri-neft sektorunda 11,7 faiz artım olacaqdır.
Büdcəyə qeyri-neft sektorundan vergi gəlirləri 14,7
faizə çatacaqdır. Qeyri-neft sektorunun, xüsusən,
ticarət sektorunun genişmiqyaslı dəstəklənməsi
üçün tədbirlər görüləcək.
Hazırda Azərbaycanda sənayenin modernləşdirilməsi,
sənayeləşmə siyasəti həyata
keçirilir".
Sevinc Həsənova subsidiya mexanizminin təkmilləşdirildiyini
də xüsusi qeyd etdi. Onun sözlərinə görə,
İqtisadi İnkişaf Nazirliyi və Kənd Təsərrüfatı
Nazirliyi yeni subsidiya sistemi hazırlayıb. Nazir müavini
vurğuladı ki, regionların inkişafı əsas
prioritetlərdən biri kimi müəyyənləşdirilib.
Bu sahədə birinci proqram başa çatıb, artıq
ikinci proqramın icrasına başlanılıb.
Sonra çıxış edən Milli Məclisin
Sədri Oqtay Əsədov bildirdi ki, parlamentin üç gün davam edən
iclaslarında 2013-cü ilin dövlət büdcəsi
geniş müzakirə olunub. Hökumət iclaslarda səslənən
rəy və təklifləri nəzərdən keçirmək
üçün parlamentdən vaxt istəyib. Hökumətə
bu məqsədlə vaxt verilir. Rəy və təkliflərə
baxıldıqdan sonra büdcə zərfi yenidən parlamentə
qaytarılacaq və səsvermə olacaq.
Gələn il
ölkədə pensiyaçıların sayının 1
milyon 279 min nəfər olacağı gözlənilir
İclasda
"Dövlət Sosial Müdafiə Fondunun 2013-cü il
büdcəsi haqqında" qanun layihəsinin müzakirəsi
başlandı. İlk çıxış edən Milli Məclisin
Sosial siyasət komitəsinin sədri Hadi Rəcəbli bildirdi
ki, dünyanın əksər dövlətləri iqtisadi
böhran üzündən ciddi sıxıntılar
keçirsə də, Azərbaycanda iqtisadiyyat, sosial durum
yaxşılaşıb: "Fondun bu il üçün 2 milyard
632 milyon 695 min manatlıq büdcəsini 2006-cı ilin rəqəmləri
ilə tutuşdurduqda artımın beş dəfədən
çox olduğu aydınlaşar. Bu, bizi sevindirir. Hər il
olduğu kimi, növbəti ildə də bu məbləğin
əksəriyyəti, yəni, 97,6 faizi bilavasitə
insanların pensiya təminatına yönəldiləcəkdir.
Ödəmələrin təsnifatına diqqət yetirdikdə
bunlardan 64,5 faizinin yaşa, 27 faizinin əlilliyə, 135 min nəfərinin
isə ailə başçısını itirməyə
görə pensiya alacağı göründü".
Sonra Dövlət Sosial Müdafiə
Fondunun sədri Səlim Müslümov "Azərbaycan
Respublikası Dövlət Sosial Müdafiə Fondunun
2013-cü il büdcəsi haqqında" qanun layihəsi barədə
məlumat verdi. Onun sözlərinə görə, DSMF-in gələn
il üçün büdcə layihəsi tərtib edilərkən
Azərbaycanda cari ilin sosial-iqtisadi inkişaf göstəriciləri
və növbəti ilin sosial-iqtisadi proqnozları, 2012-ci ilin
yanvar-sentyabr aylarında DSMF-in büdcəsinin icra vəziyyəti,
ölkəmizin növbəti il üçün demoqrafik
inkişaf meyilləri, sığorta-pensiya sisteminin əsas
parametrləri, pensiyaçıların say göstəriciləri
nəzərə alınıb. 2013-cü ildə ölkəmizdə
pensiyaçıların sayının 1 milyon 279 min nəfər
olacağı gözlənilir.
Layihəyə əsasən, 2013-cü
ildə DSMF-in büdcəsinin gəlir və xərclərinin
hər birinin 2 632 695 000 manat həcmində olması nəzərdə
tutulur. Bu, 2012-ci illə müqayisədə 178,7 milyon manat və
ya 7,3 faiz çoxdur. Bu vəsaitin 2 milyard 500,3 milyon manatı
pensiyaların maliyyələşdirilməsinə, 70 milyon
manatı sosial müavinətlərə yönəldiləcək.
Fondun gələn il üçün
büdcəsinin gəlirləri barədə də ətraflı
məlumat verən Səlim Müslümov dedi ki, gəlirlərin
mənbələri əsasən məcburi dövlət sosial
sığorta haqları, o cümlədən büdcədən
maliyyələşən təşkilatlar, büdcədən
maliyyələşən təşkilatlarda işləyənlər
üzrə, dövlət büdcəsindən ayrılan
subsidiya hesabına və büdcə təşkilatlarının
büdcədənkənar vəsaitləri, ali təhsil müəssisələrində
yeni maliyyələşmə mexanizminin tətbiqi üzrə
daxilolmalar, digər sığortaedənlər, sahibkarlıq fəaliyyəti
ilə məşğul olan fiziki şəxslər üzrə,
sanatoriya-kurort yollayışlarının qismən dəyəri
üzrə daxilolmalar və dövlət büdcəsindən
ayırmalardan (transfert) və sair gəlirlərdən ibarət
olacaq.
Xərclərin istiqamətləri isə
daha çoxdur. Burada bir neçə istiqamət diqqəti cəlb edir. Məsələn, əhaliyə
ödənişlər sırasında
əmək qabiliyyətinin
müvəqqəti itirilməsinə
görə 18 milyon manat, hamiləliyə və doğuşa görə 22 milyon manat, uşağın anadan olmasına görə 4,5 milyon manat, 3 yaşına çatanadək uşaqlara
qulluqla əlaqədar
8 milyon, dəfn üçün 12,7 milyon
və işsizliyə
görə 4,9 milyon manat ayrılması nəzərdə tutulub.
Fondun sədri
bildirdi ki, son illər Azərbaycanda böyük sayda iş yerlərinin açılmasına baxmayaraq,
bəzi iş yerləri gizlədilir və işləyənlərə
verilən əməkhaqları
rəsmi sənədlərdə
çox aşağı
səviyyədə - real məbləğdən
təqribən 2-2,5 dəfə
aşağı göstərilir.
Buna sübut olaraq S.Müslümov əhalinin
gəlirlərində əməkhaqqının
payının aşağı
olduğunu göstərdi.
Statistik məlumatlara əsasən, Azərbaycan
əhalisinin illik gəlirləri 30,660 mlrd. manat təşkil edir və bunun
yalnız 23 faizi əməkhaqqıdır. Başqa
rəsmi statistikaya görə, iqtisadiyyatda məşğul olanların
cəmi 31,7 faizi müqavilə əsasında
muzdla işləyənlərdir.
S.Müslümov dövlət
başçısının bununla bağlı ciddi tapşırığından sonra
tədbirlərə başlandığını
və bir neçə ay ərzində
180-190 min nəfərlə yenidən əmək müqaviləsi bağlandığını
vurğuladı. Onun fikrincə, gələn il pensiyalar 9,1 faiz artaraq 163 manata çatacaq. İlk dəfə pensyia məbləği
200 dolların üzərinə
qalxacaq.
Fondun büdcəsinin
müzakirəsi zamanı
çıxış edən
deputatlar əhalinin pensiya və müavinətlərini almalarını
daha da asanlaşdırmaq
üçün ölkənin
şəhər və
rayonlarında bankomatların
sayının artırılmasının
vacibliyini vurğuladılar.
Eyni zamanda, yeni doğulmuş uşaqlara verilən birdəfəlik müavinətlərin
məbləğinin artırılması
da məqsədəuyğun
hesab olundu. Çıxış
edən deputatlar Mübariz Qurbanlı, Zahid Oruc, Qənirə
Paşayeva, Əli Məsimli, Hikmət Atayev, İlham Məmmədov, Fəzail İbrahimli və Əhməd Vəliyev bildirdilər ki, sənəd kifayət qədər təkmil hazırlanıb. Son bir neçə ildə Azərbaycanda bu sahəyə xüsusi diqqətin ayrıldığını
söyləyən deputatlar
dedilər ki, ölkədə bu istiqamət üzrə işləri gücləndirmək
hökumətin apardığı
siyasətin əsas prinsiplərindən biridir.
Sonra iclasda
Milli Məclisin İqtisadi siyasət daimi komitəsinin sədri Ziyad Səmədzadə "Azərbaycan
Respublikasında 2013-cü il
üçün yaşayış
minimumu haqqında"
və "Azərbaycan
Respublikasında 2013-cü il
üçün ehtiyac
meyarının həddi
haqqında" qanun layihələri barədə
məlumat verdi. Bildirildi ki, Azərbaycan Respublikasında
2013-cü ildə yaşayış
minimumu adambaşına
116, əmək qabiliyyətlilər
üçün 125, pensiyaçılar
üçün 94, uşaqlar
üçün 93 manat
nəzərdə tutulub.
Ölkədə ehtiyac
meyarı isə 93 manat olacaq.
Milli Məclisin
Sosial siyasət komitəsinin sədri Hadi Rəcəbli dedi ki, dövlət
başçısının həyata keçirdiyi məqsədyönlü sosial
siyasətin uğurlu nəticəsidir ki, bu rəqəmlər ötən illərlə müqayisədə əsaslı
surətdə artıb.
Deputatlar ezamiyyət xərclərinin artırılmasını
istəyirlər
Sonra parlamentin İşlər İdarəsinin
müdiri Firudin Hacıyev "Azərbaycan
Respublikası Milli Məclisinin 2013-cü il üçün xərclər
smetası haqqında"
məlumat verdi. O bildirdi ki, Milli
Məclisin və onun aparatının
2013-cü il üçün
xərclər smetası
18 milyon 529 min 231 manat
məbləğində nəzərdə
tutulub. Bu vəsaitin
67,2 faizi əməkhaqlarının
ödənməsinə sərf
olunacaqdır. Yeni avtomobillərin alınması
üçün 250 min manat,
qonaqların qarşılanması
və yerləşdirilməsi
üçün 850 min manat,
xaricə ezamiyyət üçün 400 min manat,
icarə və muzdlu xidmətlər üçün 200 min manat,
dəftərxana ləvazimatları
üçün 10 min manat,
kommunal xərclərə
12 min 500 manat tələb
olunur. F.Hacıyev eyni zamanda qeyd
etdi ki, Milli Məclis üçün 200 ədəddən
artıq avtomobil tutacaq avtoparkın tikilməsi də nəzərdə tutulur.
Müzakirələrdə çıxış edən
Sosial siyasət komitəsinin sədri Hadi Rəcəbli, Aqrar siyasət komitəsinin sədri Eldar İbrahimov, Mədəniyyət komitəsinin
sədri Nizami Cəfərov, deputatlar Aydın Mirzəzadə, Zahid Oruc, Etibar
Hüseynov, Elmira Axundova
deputatların ezamiyyət
xərclərinin artırılmasını
təklif etdilər. Onların sözlərinə
görə, artıq Milli Məclis 70-dən çox ölkənin parlamenti ilə dostluq qrupu yaradıb
və tez-tez səfərlər reallaşır.
Buna görə də
ezamiyyət xərclərinə
əlavələr edilməlidir.
İclasda "Azərbaycan Respublikası
Hesablama Palatasının
2013-cü il üçün
xərclər smetası
haqqında" məsələyə
də baxıldı. Palatanın sədri Heydər Əsədov diqqətə çatdırdı
ki, Hesablama Palatası üçün
2013-cü ilin dövlət
büdcəsində nəzərdə
tutulmuş vəsait palatanın səmərəli
fəaliyyəti üçün
kifayət edir.
Bununla da,
2013-cü ilin dövlət
büdcəsinin və
büdcə zərfinə
daxil olan qanun layihələrinin müzakirəsi başa çatdı.
Rəşad
BAXŞƏLİYEV
Azərbaycan.-2012.-
16 noyabr.- S.4.