Dövlət İdarəçilik Akademiyasında «Yaşıl həftə» layihəsi çərçivəsində tədbir keçirilmişdir

Heydər Əliyev Fondunun vitse-prezidenti Leyla xanım Əliyevanın təşəbbüsü ilə yaradılmış IDEA (International Dialogue for Environmental Action) Ətraf Mühitin Mühafizəsi üzrə Beynəlxalq Dialoq Kampaniyası və BMT-nin Ətraf Mühit Proqramının (UNEP) əməkdaşlığı ilə Azərbaycanda ilk dəfə keçirilən "Yaşıl həftə" layihəsi çərçivəsində noyabrın 15-də Azərbaycan Respublikasının Prezidenti yanında Dövlət İdarəçilik Akademiyasında (DİA) gənclər üçün ingilis dilində xüsusi məruzə təqdim edilmişdir.

AzərTAc xəbər verir ki, əvvəlcə DİA-nın rektoru, akademik Urxan Ələkbərov ekoloji problemlərin qlobal məsələlərdən biri olduğunu diqqətə çatdırmışdır.

Dünyada, eləcə də Azərbaycanda ekoloji maarifləndirmənin vacibliyindən danışan rektor tədbirin əhəmiyyətini vurğulamışdır. Qeyd etmişdir ki, ölkəmizdə birbaşa hökumətin dəstəyi ilə uğurlu ekoloji siyasət aparılır. Belə ki respublikamızda yeni qoruqların, milli parkların yaradılması, meşə zolaqlarının salınması və s. müvafiq sahədə reallaşdırılan əhəmiyyətli tədbirlərdir.

Sonra BMT-nin Ətraf Mühit üzrə Proqramının Ətraf mühit, əməkdaşlıq və səhiyyə məsələləri üzrə regional direktoru Vondvozen Asnak Kibret "Ətraf mühit problemlərinin həllində gənclərin rolu: BMT-nin Ətraf Mühit Proqramının təcrübəsində" mövzusunda məruzə etmişdir. Məruzəçi gəncləri yaşadığımız planetin gələcəyi barədə indidən düşünməyə, fikir mübadiləsi aparmağa və zəruri biliklər əldə etməyə çağırmışdır. Bildirmişdir ki, insanlar kiçik yaşlarından ətraf mühitlə bağlı biliklərə yiyələnməli, özləri üçün davranış qaydaları müəyyənləşdirməlidirlər.

V.A.Kibret, eyni zamanda, gənclərin ətraf mühitlə bağlı elmi tədqiqatlara cəlb edilməsinin, müxtəlif müvafiq treninqlərin təşkil olunmasının, diskussiya xarakterli görüşlərin keçirilməsinin vacibliyini də vurğulamışdır.

Sonra müzakirələr olmuş, suallar cavablandırılmışdır.

Azərbaycan.-2012.- 16 noyabr.- S.4.