Azərbaycanın müasirləşməsi, yeniləşməsi istiqamətində həyata keçirilən siyasətdə Yeni Azərbaycan Partiyasının özünəməxsus rolu vardır

Noyabrın 15-də Azərbaycan Dövlət Xəzər Dəniz Gəmiçiliyində Yeni Azərbaycan Partiyasının (YAP) yaradılmasının 20 illiyinə həsr olunmuş tədbir keçirilmişdir.

Gəmiçiliyin rəisi Aydın Bəşirov çıxış edərək YAP-ın iyirmi il əvvəl - 1992-ci il noyabrın 21-də Naxçıvanda ulu öndər Heydər Əliyevin rəhbərliyi ilə təsis konfransının keçirildiyi, o vaxtkı hakimiyyətin bütün maneçilik cəhdlərinə baxmayaraq qısa müddətdə iqtidara gələn partiyanın xalqın etimadını qazandığı diqqətə çatdırılmışdır.

Qeyd olunmuşdur ki, Heydər Əliyev zəkasının bəhrəsi olan partiya ötən 20 ildə həm çətin, həm də şərəfli bir yol keçərək inkişaf etmişdir. Bu gün mütəşəkkil siyasi qüvvəyə çevrilən YAP dövlət başçısı İlham Əliyevin dediyi kimi, nəinki Azərbaycanda, bütövlükdə Cənubi Qafqazda ən böyük siyasi təşkilatdır. Azərbaycanın müasirləşməsi, yeniləşməsi istiqamətində həyata keçirilən siyasətdə YAP-ın özünəməxsus rolu vardır. Sıralarını günbəgün genişləndirən, alternativsiz siyasi qüvvəyə çevrilən YAP qarşıda duran vəzifələrin həlli istiqamətində də fəaliyyətini davam etdirir.

Gəmiçiliyin rəisi ulu öndər Heydər Əliyevin siyasi xəttinin layiqli davamçısı İlham Əliyevin YAP-ın sədri seçilməsi ilə partiyanın həyatında yeni mərhələnin başlandığını bildirərək demişdir ki, onun bütün fəaliyyəti Azərbaycanın tərəqqisinə, ölkədə demokratik dəyərlərin qorunmasına və inkişafına, xalqın rifah halının yaxşılaşdırılmasına, ölkəmizin qüdrətli dövlətlər sırasına çıxarılmasına yönəlmişdir. Ölkə rəhbəri Azərbaycanın inkişafı üçün bütün qüvvələrin, hər bir vətəndaşın səfərbər olunması naminə olduqca səmərəli işlər görməkdədir.

Bildirilmişdir ki, Prezident İlham Əliyevin diqqət və qayğısı ilə 2004-cü ildən bəri 10 iritonnajlı tanker, bir quru yük gəmisi, 4 gəmi-bərə istifadəyə verilmişdir. Xorvatiyanın "Ulyanik" tərsanəsində son 10 ayda tikilmiş daha 2 bərənin Bakıya gətirilməsi isə bu ilin nailiyyətlərindəndir.

Bütün bunlar, ilk növbədə, ümummilli lider Heydər Əliyevin əsasını qoyduğu və həyata keçirdiyi nəhəng layihələrin, o cümlədən Azərbaycanın neft strategiyasını müəyyənləşdirən "Əsrin müqaviləsi"nin, tarixi "İpək yolu"nun bərpasının, Bakı-Tbilisi-Ceyhan neft boru kəmərinin istismara verilməsinin reallaşması və nəhayət, Bakı-Tbilisi-Qars dəmir yolu layihəsinin gerçəkləşməsi ilə bağlı yükdaşımalarının artması ilə əlaqədardır.

Çıxışlarda YAP-ın yaranma tarixindən və keçdiyi inkişaf yolundan danışılmış, ölkəmizdə son illərdə əldə olunan uğurlar, həyata keçirilən irimiqyaslı layihələr, respublikamızın regionda və beynəlxalq aləmdə söz və nüfuz sahibinə çevrilməsi diqqətə çatdırılmışdır.

AzərTAc

Azərbaycan.-2012.- 16 noyabr.- S.9.