Mingəçevirin 64 yaşı tamam oldu

Bənzərsiz, valehedici gözəlliyə, ecaskar təbiətə, özünəməxsus mədəniyyətə, həmçinin böyük sənaye potensialına malik Mingəçevir hazırda Azərbaycanın sürətlə inkişaf edən şəhərlərindən biridir. Ana Kür nur şəhərinin sirli, sehrli, nəğməli təbiətinə yeni bir gözəllik əlavə edir.

Gündən-günə gözəlləşən Mingəçevir ulu öndər Heydər Əliyevin hər zaman diqqət və qaygı göstərdiyi bir ünvan olmuşdur. Məhz bu diqqət və qayğının məntiqi nəticəsidir ki, bu gün Mingəçevir ölkənin iri sənaye şəhərlərindən birinə çevrilib. Ölkəmiz müstəqillik əldə etdikdən sonra həyata keçirilən regionların sosial-iqtisadi inkişafı Dövlət Proqramının uğurlu nəticələrini özündə əks etdirən məntiqi bir yanaşma ilə nur şəhəri adlandırılan Mingəçevir hazırda respublikanın dördüncü böyük sənaye şəhəridir.

Kür çayının üzərində su-elektrik stansiyasının tikintisi ilə bağlı olaraq salınan Mingəçevir əlverişli coğrafi-strateji əhəmiyyətə malikdir. Bozdağ silsiləsinin ətəyində, Kür çayının sahilində yer alan bu məkan ana təbiətin füsunkar gözəlliyindən sanki ruh alır. Bu şəhər nəinki mingəçevirliləri, ora gələn turistləri də öz gözəlliyi ilə məftun edir.

Hər gün gözəlliyinə yeni bir naxış vurulan Mingəçevir şəhərinin yaranmasından 64 il ötür. Yubiley münasibətilə şəhərdə təntənəli bayram tədbiri keçirilmişdir. Tədbir iştirakçıları əvvəlcə ulu öndər Heydər Əliyevin xatirəsini ehtiramla yad etmiş, ümummilli liderin abidəsi önünə gül dəstələri qoymuşlar. Ulu öndər Heydər Əliyevin adını daşıyan meydana toplaşan minlərlə şəhər sakini qarşısında çıxış edən natiqlər bayram münasibətilə mingəçevirliləri təbrik etmiş, energetiklər şəhərinin 64 illik tarixinə nəzər salmışlar. Şəhərin inkişaf tarixindən söz açan natiqlər 1948-ci il noyabrın 11-də Mingəçevirə şəhər statusu verildiyini bildirmişlər. Ümummilli lider Heydər Əliyevin qayğısı sayəsində Mingəçevirdə Azərbaycan DRES-in (İES) tikintisi ilə bu şəhər nəinki respublikamızın, eləcə də bütün Qafqazın energetika nəhənginə, ölkənin dördüncü sənaye şəhərinə çevrilmişdir.

Sonra qonaqlar və yerli sakinlər "Şəhər günü" münasibətilə Heydər Əliyev meydanında Mingəçevirin tarixi inkişaf yolunu əks etdirən sərgi ilə tanış olmuşlar. Burada nümayiş olunan məktəblilərin əl işləri tədbir iştirakçıları tərəfindən maraqla qarşılanmışdır. Şəhər rəhbərliyi Mingəçevirin ilk qurucuları ilə görüş keçirmiş, onların qayğı və problemləri ilə maraqlanmışdır. İdmançıların, eləcə də folklor qruplarının, musiqi kollektivlərinin çıxışları hamının ürəyincə olmuşdur. Mingəçevir Dövlət Dram Teatrı kollektivinin hazırladığı səhnəcik, şəhər tarix-diyarşünaslıq muzeyinin təqdim etdiyi qədim maddi-mədəniyyət nümunələri "Şəhər günü"nə xüsusi bir çalar əlavə etmişdir.

"Şəhər günü" respublikamızın tanınmış incəsənət ustalarının təqdim etdiyi bayram konserti ilə davam etmişdir.

L.QULİYEV

Azərbaycan.-2012.- 16 noyabr.- S.12.