Şoran torpaqlarda quruculuq işləri uğurla gedir

Ucarda son illər ərzində abadlıq-quruculuq işləri uğurla gedir. Əminəm ki, gələcək illərdə də bu meyillər daha da güclənəcəkdir. Elə etməliyik ki, hər bir bölgə, hər bir rayon mərkəzi, hər bir kənd abadlaşsın, gözəlləşsin. Bunu etmək üçün imkanlarımız vardır.

İlham ƏLİYEV

Bakı-Yevlax-Gürcüstan avtomobil magistralından Ucar rayonunun mərkəzinə tərəf dönəndə hiss edirsən ki, digər bölgələrimiz kimi, bu rayon da dövlətimizin mövcud imkanlarından, hərtərəfli diqqət və qayğısından yetərincə bəhrələnir. Abad avtomobil yolu, səliqəli küçə və səkilər, milli ornamentli daş hasarlar, "nizam"la düzülmüş ticarət-məişət obyektləri və bütün bu mənzərələrin baxımlılığını bir az da artıran müasir işıq dirəkləri ilk andaca xatırladır ki, Ucar artıq ötən dövrlərdəki rayon deyil.

Axşamlar bu dirəklərdəki işıqlar yananda bir vaxtlar şər qarışmamış "yuxuya gedən" Ucarı sakinlər özləri də indi keçmiş xatirə kimi yada salırlar. İndi tək Ucarda deyil, digər bölgələrimizdə də sakinlər cavanlı, qocalı axşam həyatını yaşamağa başlayıblar. Gəzintiyə çıxmaq, dost-tanışla görüşmək, səliqə-sahmanlı kafelərin (çayxanaların) birində əyləşib çay içə-içə söhbət etmək və ya kiçik yaşlıları təmiz havada əyləndirmək üçün yetərincə müasir istirahət parkları mövcuddur. Bütün bunlar bu gün Ucarın da reallıqlarıdır. Həm də qeyd etmək lazımdır ki, dövlətin yüksək qayğısı sayəsində inkişaf rayon mərkəzi ilə məhdudlaşmır, qəsəbə və kəndlər də tərəqqi dövrünü yaşayır.

Ucardakı möhtəşəm Heydər Əliyev Mərkəzinin qarşısındakı park həmişə qonaq-qaralı olur. Bu həm də insanların normal gün-güzəranının, dolanışığının əlamətidir ki, könüllərində bir rahatlıq tapıb parka, bağa istirahət etməyə çıxa bilirlər.

Şübhəsiz ki, rayonda gedən abadlıq-quruculuq işləri, sosial-iqtisadi layihələrin gerçəkləşdirilməsi insanların ovqatının yüksəlməsinə də təsir edir. Bütün bu tədbirlərin həyata keçirilməsi həm də yeni iş yerlərinin açılması deməkdir. Təsadüfi deyildir ki, bu ilin doqquz ayı ərzində açılan 342 iş yerindən 305-i daimidir.

Regionların sosial-iqtisadi inkişafına dair ikinci Dövlət Proqramında Ucar rayonu ilə bağlı nəzərdə tutulan tədbirlərin icrasının sürətləndirilməsi məqsədi ilə ölkə rəhbərinin

1 noyabr 2011-ci il tarixli "Ucar rayonunun sosial-iqtisadi inkişafının sürətləndirilməsinə dair əlavə tədbirlər haqqında" sərəncamına əsasən Prezidentin Ehtiyat Fondundan

2 milyon manat vəsait ayrılıb. RİH-dən aldığımız məlumata görə, həmin vəsaitin 1,3 milyon manatı şəhərdaxili yolların salınmasına, 0,7 milyon manatı isə ictimai yaşayış binalarının dam örtüklərinin dəyişdirilməsinə yönəldilib. İlin əvvəlindən şəhər ərazisində 22 yaşayış binasının dam örtüyü dəyişdirilib və məhəllədaxili yollara 75968 kvadratmetr asfalt örtük çəkilib. Şəhərin Koroğlu küçəsində divarların 1500 kvadratmetrdən artıq hissəsi üzlənib, qalan işlər də davam edir.

Daxili imkanlar hesabına şəhərin Heydər Əliyev prospektində ictimai yaşayış binalarının kompakt olduğu ərazidə 250 yerlik xeyir-şər evi tikilib istifadəyə verilib.

Dövlət proqramına uyğun olaraq magistral avtomobil yolunun rayon ərazisindən keçən hissəsi yenidən qurulub. Rayon mərkəzi ATS-ində rekonstruksiya işləri görülüb, telefon rabitəsi sistemi elektronlaşdırılıb.

Ucar şəhərinin su təchizatının və kanalizasiya sisteminin yenidən qurulması, rayonun yaşayış məntəqələrinin su təchizatının yaxşılaşdırılması işləri də qaydasındadır.

Rayonda broyler quşçuluq fabrikinin tikintisinə başlanılıb, su kanal idarəsi üçün inzibati binanın inşası davam edir, statistika idarəsi üçün tikilən binada isə son tamamlama işləri gedir.

Təhsil, səhiyyə və mədəniyyət sahələrinin maddi-texniki bazalarının möhkəmləndirilməsi istiqamətində də tədbirlər həyata keçirilir. 220 şagirdlik Qazyan kənd 3 nömrəli və şəhər 5 nömrəli tam orta məktəblərin tikintisi başa çatdırılaraq istifadəyə verilib. Bərgüşad kənd 2 nömrəli və Xalac kənd tam orta məktəblərin binalarının tikintisi davam edir. Rayon uşaq xəstəxanası və poliklinika şöbəsi əsaslı təmir olunub, Məhkəmə-Tibbi Ekspertiza və Patoloji Birliyinin Ucar rayon şöbəsi üçün bina tikilib istifadəyə verilib. Rayon mərkəzi xəstəxanasının, təcili və təxirəsalınmaz tibbi yardım stansiyasının inşası davam edir.

Ölkə rəhbərinin dəfələrlə qeyd etdiyi kimi, ən ucqar kəndlərin qazlaşdırılması prioritet məsələlərdəndir. Bu baxımdan Ucar rayonunda da xeyli iş görülüb. Xalac, Qazıqumlaq və Məlikballı kəndlərinin birpilləli sistem üzrə qazlaşdırılması başa çatdırılıb, hazırda sayğaclaşdırma işləri gedir. Ucar şəhərinin küçələrində, Qarabörk və Gəraybəyli kəndlərində müxtəlif diametrli qaz xətlərinin çəkilişi və təmir-bərpa işləri, həmçinin Qazyan kəndinin birpilləli sistem üzrə qazlaşdırılması davam edir. İstismar müddəti başa çatan 2048 ədəd qaz sayğacı yenisi ilə əvəz olunub.

Kollektor drenaj şəbəkələrində 453,4 min kubmetr həcmində, 108,2 kilometr uzunluğunda lildən təmizləmə və torpaqbasma işləri görülüb. Sel sularının qarşısının alınması məqsədi ilə rayon ərazisindən keçən Türyançay və Göyçay çaylarının sağ və sol sahilləri boyunca Lək, Qazyan, Şahlıq kəndlərində çay məcrasının təmizlənməsi, bəndin təmiri və sahilbərkitmə işləri də keyfiyyətlə yerinə yetirilib.

Ucar kimi şoran torpaqlı rayonda xeyli yaşıllaşdırma işləri görülüb. Belə ki, Ucar şəhərində, kənd yerlərində və yolkənarı ərazilərdə 6200 ədəddən çox müxtəlif ağac və gül kolları əkilib.

Ucarda diqqətçəkən məsələlərdən biri də görülən işləri rayon sakinlərinin razılıq hissi ilə qarşılamaları, dövlətin və dövlət başçısının göstərdiyi qayğını yüksək qiymətləndirmələri və həyata keçirilən tədbirlərdə fəal iştirak etməyə çalışmalarıdır. Ucarlılar yaxşı bilirlər ki, dövlət qayğısı və insan zəhməti sayəsində şoran torpaq üstündə də gülüstan yaratmaq olar.

Telman NƏZƏRLİ

Azərbaycan.-2012.- 20 noyabr.- S.8.