Bakıda «Enerji səmərəliliyi: iqtisadi və institusional aspektlər və perspektivlər» mövzusunda konfrans keçirilmişdir

Noyabrın 21-də Azərbaycan Respublikasının Prezidenti yanında Strateji Araşdırmalar Mərkəzinin (SAM) və Qara Dəniz Beynəlxalq Araşdırmalar Mərkəzinin birgə təşkilatçılığı ilə "Avropa" hotelində "Enerji səmərəliliyi: iqtisadi və institusional aspektlər və perspektivlər" mövzusunda konfrans keçirilmişdir.

AzərTAc xəbər verir ki, SAM-ın direktoru Fərhad Məmmədov konfransda enerji səmərəliliyi və onun perspektivlərinin, həmçinin mövcud hüquqi normativ bazanın müzakirə mövzusu olacağını bildirmişdir. Enerji təhlükəsizliyinin Azərbaycanda diqqət yetirilən əsas məsələlərdən biri olduğunu vurğulayan F.Məmmədov qeyd etmişdir ki, hazırda SAM tərəfindən enerji təhlükəsizliyi, digər enerji mənbələrindən istifadə və s. ilə bağlı tədqiqatlar aparılır.

Qara Dəniz Beynəlxalq Araşdırmalar Mərkəzinin direktoru xanım Zefi Dimadama müzakirə olunacaq mövzunun aktuallığını vurğulayaraq Azərbaycanda bu sahədə görülən işləri yüksək qiymətləndirmişdir. "Ölkənizə səfərim zamanı azərbaycanlı mütəxəssislərin ekologiya və energetika sahələrində səmərəli işlədiklərinin şahidi oldum. Neft-qaz ehtiyatlarınızın çox olmasına baxmayaraq, perspektiv tədqiqatlarınızı görməkdən və indidən gələcəyi düşünməyinizdən çox mütəəssir oldum" - deyə Z.Dimadama qeyd etmişdir.

"Enerji səmərəliliyi: imkanlar, iqtisadi və maliyyə davamlılığı" adlı birinci bölmə iclasında çıxış edən Alternativ və Bərpa olunan Enerji Mənbələri üzrə Dövlət Şirkətinin direktor müavini Cəmil Məlikov bildirmişdir ki, beynəlxalq aləmdə enerji səmərəliliyi sahəsində müasir biliklər və innovativ texnologiyalar tətbiq olunur. Azərbaycanda da bu sahədə perspektiv baxışlar, strategiyalar qurulur. Ölkəmizdə sahənin inkişafı üçün alternativ və bərpa olunan enerji mənbələrindən istifadə ilə bağlı bir sıra qərarlar qəbul edilmiş və hazırda dövlət tərəfindən bir neçə pilot layihə həyata keçirilir.

Konfrans bölmə iclasları ilə işini davam etdirmişdir. Bölmə iclaslarında "Avropa İttifaqının artan enerji səmərəliliyi ilə bağlı tələbləri", "Azərbaycanın enerji potensialı və perspektivlər", "Azərbaycanın elektroenergetika sistemində enerji səmərəliliyi", "Enerji səmərəliliyi ətraf mühitə təsir kontekstində", "Neft və qaz sahəsində enerji səmərəliliyi" və s. mövzular müzakirə olunmuşdur.

Azərbaycan.-2012.- 22 noyabr.- S.3.