«Milli müstəqilliyimizin yetirməsi» kitabı TQDK-nın inkişaf mərhələlərindən bəhs edir

Milli müstəqillik tariximizdə mühüm yeri olan Tələbə Qəbulu üzrə Dövlət Komissiyası (TQDK) ötən 20 ildə Azərbaycan təhsilinin inkişafına böyük töhfələr vermişdir. Dövlət müstəqilliyimizin ilk illərində yaranan TQDK-nın keçdiyi çətin, eyni zamanda şərəfli yol "Milli Müstəqilliyimizin yetirməsi" kitabında geniş və əhatəli şəkildə öz əksini tapmışdır.

Kitabın ön səhifələrində ümummilli liderimiz Heydər Əliyevin və ulu öndərin siyasi kursunun layiqli davamçısı Prezident İlham Əliyevin ölkəmizdə ali və orta ixtisas təhsili məktəblərində aparılan tələbə qəbulunun müasir tələblərə tam və yüksək səviyyədə cavab verməsini əks etdirən dəyərli fikirləri yer almışdır.

TQDK-nın sədri Məleykə Abbaszadənin kitaba yazdığı "Tələbə Qəbulu üzrə Dövlət Komissiyası 20 ildə: tələbə qəbulu sisteminin inkişaf mərhələləri" ön sözündə qurumun fəaliyyəti xronoloji ardıcıllıqla izah olunmuşdur. Bildirilmişdir ki, ötən 20 ildə 2 milyon 155 min insan TQDK-nın keçirdiyi imtahanlarda iştirak etmişdir.

Məleykə Abbaszadə yazır: "1993-1996-cı illərdə ali məktəblərə qəbul qaydaları Prezidentin xüsusi fərmanları ilə təsdiq olunurdu və bu, ölkə başçısının test üsulunu, təhsil sisteminin inkişafını dəstəkləməsinə dair cəmiyyətə sanki bir mesaj idi. Komissiyamız o dövrdə məhz dahi Heydər Əliyevin siyasi müdrikliyi sayəsində bir təşkilat kimi formalaşma mərhələsinə qədəm qoydu. O vaxtdan etibarən Komissiyanın fəaliyyəti bir neçə əsas istiqamət üzrə, özü də bir-birindən əlaqəsiz şəkildə deyil, bütöv bir prosesin tərkib hissələri kimi vəhdətdə formalaşmağa başladı".

Ön sözdə qeyd olunmuşdur ki, TQDK-nın istifadə etdiyi bütün tətbiqi proqram təminatı qurumun öz mütəxəssisləri tərəfindən hazırlanmışdır. TQDK-nın fəaliyyətinin digər mühüm istiqamətlərindən biri də respublikada İKT-nin inkişaf etdirilməsi, aidiyyəti beynəlxalq qurumlarla əlaqələri yaratmaqdan ibarət olmuşdur.

Kitabda vurğulanır ki, 1999-2004-cü illərdə Tələbə Qəbulu üzrə Dövlət Komissiyası yüksək etimad göstərilmiş və respublikada İKT-nin inkişaf etdirilməsi işi bu quruma həvalə edilmişdir. Həmin illərdə Azərbaycan Prezidentinin fərmanı ilə dövlət qulluğuna işə qəbul, hakim vəzifəsinə və prokurorluq orqanlarına namizədlərin seçilməsi işləri də TQDK-ya tapşırılmışdır. O illərdə Azərbaycan hökumətinin tapşırığı və BMT-nin İnkişaf Proqramının qrantı əsasında Tələbə Qəbulu üzrə Dövlət Komissiyası tərəfindən qısa zamanda "Seçkilər" Dövlət Avtomatlaşdırılmış İnformasiya Sistemi yaradılmışdır. Bu sistem 2000-ci ilin noyabrında Azərbaycan Respublikasının Milli Məclisinə keçirilmiş seçkilərdə və sonrakı seçkilərdə istifadə edilmişdir.

TQDK-nın inkişaf mərhələlərini, qarşılaşdığı çətinlikləri, əldə etdiyi uğurları oxucuya çatdıran M.Abbaszadə, həmçinin təmsil etdiyi təşkilatın həyata keçirdiyi yerli və beynəlxalq layihələrdən geniş söz açmışdır.

"TQDK-nın yaranması: ilk addımlar", "Təşkilatlanma və texnoloji təminatın formalaşması", "Qəbul imtahanlarının elmi cəhətdən əsaslandırılmış məzmununun formalaşdırılması", "Qəbul prosesinin bütün mərhələlərinin avtomatlaşdırılması", "Elmi-texniki, texnoloji təminat və avtomatlaşdırma istiqamətindəki işlərin davamı", "Qabaqcıl təcrübənin təbliği", "TQDK-nın İKT üzrə təcrübəsinin yerli və beynəlxalq layihələrdə tətbiqi", "Beynəlxalq əlaqələr və əməkdaşlıq", "TQDK-nın 1992-2012-ci illərdə müxtəlif istiqamətlər üzrə keçirdiyi imtahanlar" və s. bölmələrdən ibarət kitabda ötən 20 ildə görülmüş işlər rəngli fotoşəkillərin müşayiəti ilə oxuculara təqdim olunmuşdur.

Ümumilikdə 16 bölmədən ibarət olan bu nəfis tərtibatlı kitabda ulu öndər Heydər Əliyevin müvafiq fərmanlarının mətnləri və prezident təqaüdünə layiq görülmüş tələbələrlə görüşlərini əks etdirən fotoşəkillər, həmçinin Prezident İlham Əliyevin TQDK-nın formalaşması və inkişafı ilə bağlı imzaladığı fərman və sərəncamlar yer almışdır. Eyni zamanda, nəşrdə TQDK tərəfindən keçirilmiş yerli və beynəlxalq tədbirlər əksini tapmışdır.

Kitabda TQDK-nın iş prinsipi, strukturu, müasir texnologiyaların tətbiqi istiqamətində gördüyü işlərlə bərabər, qurumun yaradılmasının 20 illiyi münasibətilə tanınmış ictimai-siyasi xadimlərin, elm adamlarının təbrikləri, məktubları, rəyləri də verilmişdir.

Oxucular bu nəşr vasitəsilə, həmçinin imtahanlarda açıq tipli test tapşırıqlarından istifadə, rezidenturaya qəbul məsələləri, regional bölmələrin yaradılması və fəaliyyəti, imtahanların keçirilmə coğrafiyasının genişlənməsi, TQDK-nın beynəlxalq əlaqələri, elmi-metodiki nəşrləri və digər çoxsaylı tədbirləri barədə geniş və əhatəli informasiyalar əldə edə biləcəklər.

AzərTAc

Azərbaycan.-2012.- 23 noyabr.- S.7.