ICAPP-ın VII Baş Assambleyası çərçivəsində «Asiyada qadınlar: təhlükəsizlik, sülh və tərəfdaşlıq» mövzusuna həsr olunmuş bölmə iclası keçirilmişdir

Asiya Siyasi Partiyalarının Beynəlxalq Konfransının VII Baş Assambleyasının noyabrın 23-də davam edən plenar sessiyası çərçivəsində siyasətçi qadınların bölmə iclası keçirilmişdir.

Milli Məclisin deputatı, Yeni Azərbaycan Partiyası Siyasi Şurasının üzvü Məlahət İbrahimqızının sədrliyi ilə keçən iclas "Asiyada qadınlar: təhlükəsizlik, sülh və tərəfdaşlıq" mövzusuna həsr olunmuşdur.

Məlahət İbrahimqızı iclası açaraq ICAPP-ın əhəmiyyətindən danışmış, bu təşkilatın tarixində ilk dəfə qadın mövzusunda sessiyanın keçirildiyini bildirmişdir.

Dünyada təhlükəsizlik və sabitlikdə qadınların rolundan danışan M.İbrahimqızı vurğulamışdır ki, hərbi əməliyyatlar, terror aktları və digər zorakılıq hallarında qadınlar daha çox əziyyət çəkirlər. Milli Məclisin deputatı Ermənistan-Azərbaycan, Dağlıq Qarabağ münaqişəsi nəticəsində çoxlu sayda azərbaycanlı qadının qətlə yetirildiyini, girov götürüldüyünü diqqətə çatdırmışdır. Vurğulanmışdır ki, BMT qadınların bütün sahələrdə artan nüfuzunu xüsusilə qeyd edir və bununla bağlı bir neçə sənəd qəbul olunmuşdur.

Bölmə iclasında çıxış edənlər Azərbaycanda olmaqdan və tədbirdə iştirak etməkdən məmnunluqlarını bildirmişlər. Qeyd olunmuşdur ki, belə tədbirlər siyasətçi qadınların bir araya gələrək mühüm məsələləri müzakirə etməsi baxımından böyük əhəmiyyətə malikdir.

Asiyanın dünyada artan strateji əhəmiyyətindən danışan qadın siyasətçilər demişlər ki, uzunmüddətli inkişafa nail olmaq üçün sabitlik mühüm şərtdir və bu məsələdə qadınlar müstəsna xidmətlərə malikdirlər.

Tədbirdə qadınların ailədə, cəmiyyətdə və iş yerindəki artan rolundan da danışılmışdır.

ICAPP-ın da bu istiqamətdə müəyyən addımlar atması, dünyada sülhün, təhlükəsizliyin və əməkdaşlığın genişlənməsində qadınların rolunu artırması təqdirəlayiq hal kimi qiymətləndirilmişdir.

AzərTAc

Azərbaycan.-2012.- 24 noyabr.- S.2.