Xalqının xoşbəxt gələcəyini düşünən bütün dövlətlər gənclərə xüsusi diqqət yetirir, onların fikirlərini və baxışlarını nəzərə alırlar

Xalqının xoşbəxt gələcəyini düşünən bütün dövlətlər gənclərə xüsusi diqqət yetirir, onların fikirlərini və baxışlarını nəzərə alırlar.

AzərTAc xəbər verir ki, bu fikir Asiya Siyasi Partiyalarının Beynəlxalq Konfransının (ICAPP) VII Baş Assambleyasının noyabrın 23-də davam edən plenar sessiyası çərçivəsində keçirilmiş gənc siyasi liderlərin bölmə iclasında səslənmişdir.

Yeni Azərbaycan Partiyası (YAP) Gənclər Birliyinin sədr müavini Ramin Məmmədovun moderatorluğu ilə keçən iclasda Asiyada sülhün, təhlükəsizliyin və tərəfdaşlığın inkişafında gənc liderlərin rolu xüsusi müzakirə mövzusu olmuşdur.

Qloballaşan dünyada gənclərin rolundan danışan R.Məmmədov Azərbaycan dövlətinin gənclərə xüsusi diqqət və qayğı göstərdiyini, ölkəmizdə gənclərlə bağlı xüsusi dövlət proqramlarının icra olunduğunu diqqətə çatdırmışdır.

Sonra Kamboca Nazirlər Kabinetinin dövlət katibi Suas Yera, bu ölkənin Fun Cin Pek Partiyası sədrinin müşaviri Ti Çin Senq, COPPPAL-in sədri Xorxe Lui Fuentes Karanza, Yaponiyanın Kapti Partiyası sədrinin müavini İtari İssi, ICAPP Gənclər Birliyinin katibi Mustafa Hayder Sayed Asiya dövlətlərində, eləcə də dünyanın inkişaf etmiş ölkələrində baş verən siyasi proseslərə nəzər salmışlar.

Çıxışlarda bildirilmişdir ki, hər yerdə inkişafa nail olmaq üçün sülh və təhlükəsizliyin bərqərar edilməsi əsas amildir.

ICAPP-ın baş katibi Xose de Venesia bölmə iclasında demişdir ki, gələcək gənclərin əlindədir. Onlar təkcə öz müqəddəratlarını deyil, bəşəriyyətin xilası və xoşbəxt gələcəyi üçün çalışmalıdırlar. Bütün dövlətlər gənclərə bu istiqamətdə dəstək olmalıdırlar.

Gənc liderlər ICAPP-ın gənclər təşkilatlarının gələcək fəaliyyət istiqamətləri, Gənclər Birliyinin mərkəzi ofisi və katibliyinin iş prinsipləri, beynəlxalq təşkilatlarla əməkdaşlıq və sair təkliflər səsləndirmiş, fikir mübadiləsi aparmışlar.

Gənclər arasında əlaqələrin daha da inkişaf etdirilməsi üçün qarşılıqlı səfərlərin, görüşlərin, təcrübə mübadiləsinin təşkilinin vacibliyi vurğulanmışdır.

Müzakirələrin sonunda ICAPP-ın Gənclər Birliyinin fəaliyyətinin gücləndirilməsi, onlara maliyyə dəstəyinin artırılması, İllik Gənclik Festivalının keçirilməsi, media ilə əlaqələrin inkişaf etdirilməsi, yoxsulluğun azaldılması istiqamətində və korrupsiyaya qarşı mübarizədə gənclərin fəaliyyətinin artırılması, təhsil strategiyasının hazırlanması və təqaüdlərin təyin edilməsi, beynəlxalq təşkilatlarla əməkdaşlığın qurulması və inkişaf etdirilməsi, idman və mədəniyyət sahəsində müxtəlif layihələrin həyata keçirilməsi ilə bağlı bir sıra tövsiyə xarakterli qərarlar qəbul olunmuşdur.

Azərbaycan.-2012.- 24 noyabr.- S.2.