Azərbaycan parlament nümayəndə heyəti MDB PA-nın növbəti iclasında iştirak etmişdir

Xəbər verildiyi kimi, Milli Məclisin Sədri Oqtay Əsədovun başçılığı ilə parlament nümayəndə heyəti Müstəqil Dövlətlər Birliyi Parlamentlərarası Assambleyasının 38-ci plenar iclasında iştirak etmək üçün noyabrın 21-dən 23-dək Sankt-Peterburq şəhərində səfərdə olmuşdur.

Nümayəndə heyətinin tərkibinə Milli Məclisin Regional məsələlər komitəsinin sədri Arif Rəhimzadə, deputatlardan Elton Məmmədov, Aslan Cəfərov, Rüfət Quliyev, parlament aparatının rəhbəri Səfa Mirzəyev və digər rəsmi şəxslər daxil idilər.

Plenar iclas çərçivəsində ilk tədbir MDB Parlamentlərarası Assambleyası Şurasının iclası oldu. Əvvəlcə təşkilatı məsələyə baxıldı. Rusiya Federasiyası Federal Məclisi Federasiya Şurasının Sədri Valentina Matviyenko yenidən qurumun sədri seçildi.

Sonra şuranın iclasının gündəliyinə daxil olan bir sıra məsələlər təqdim olundu, 38-ci plenar iclasın gündəliyi də daxil olmaqla, qaldırılan məsələlər müzakirə olunaraq təsdiq edildi.

Noyabrın 23-də keçirilən 38-ci plenar iclası qurumun sədri Valentina Matviyenko açdı. Artıq ənənəyə çevrilən bu tədbirin əhəmiyyətindən danışan xanım Matviyenko MDB-yə üzv olan ölkələr arasında əlaqələrin daha da möhkəmləndirilməsində və genişləndirilməsində Parlament Assambleyasının və onun keçirdiyi ayrı-ayrı tədbirlərin xüsusi önəm daşıdığını diqqətə çatdırdı. İclasda MDB-yə üzv olan ölkələrin parlament sədrləri ilə yanaşı beynəlxalq təşkilatların nümayəndələri də iştirak edirdilər. İclasın gündəliyinə salınmış bütün məsələlər, o cümlədən model qanunlar müzakirə olunaraq təsdiq edildi.

İclas başa çatdıqdan sonra mətbuat konfransı keçirildi. Nümayəndə heyətlərinin rəhbərləri jurnalistləri maraqlandıran suallara cavab verdilər.

Milli Məclisin Sədri Oqtay Əsədov MDB PA-nın 38-ci plenar sessiyası çərçivəsində bir sıra ikitərəfli görüşlər keçirdi. Milli Məclis Sədrinin Rusiya Federasiyası Federal Məclisinin Dövlət Dumasının Sədri Sergey Narışkin, Rusiya Federasiyası Federal Məclisi Federasiya Şurasının Sədri Valentina Matviyenko, Moldova Respublikası Parlamentinin Sədri Marian Lupu və Ukrayna Ali Radasının Sədri Vladimir Litvinlə görüşlərində ikitərəfli münasibətlərin, o cümlədən parlamentlərarası əlaqələrin bu günü, perspektivləri və daha da inkişaf etdirilməsi istiqamətində atılacaq addımlar barədə fikir mübadiləsi aparıldı.

Bununla da, Milli Məclisin Sədri Oqtay Əsədovun rəhbərliyi ilə parlament nümayəndə heyətinin Sankt-Peterburq şəhərinə səfəri başa çatdı.

Akif TƏVƏKKÜLOĞLU,

Milli Məclisin mətbuat katibi

Azərbaycan.-2012.- 25 noyabr.- S.2.