Viktor Tvirkun: QİƏT PM-in Baş Assambleyasının plenar sessiyası Bakıda çox yüksək səviyyədə təşkil olunmuşdur

Noyabrın 26-da Milli Məclisin Sədri Oqtay Əsədov Bakıda səfərdə olan Qara Dəniz İqtisadi Əməkdaşlıq Təşkilatının (QİƏT) baş katibi Viktor Tvirkun ilə görüşmüşdür.

Oqtay Əsədov QİƏT-in əhəmiyyətindən, üzv ölkələr arasında əlaqələrin inkişafındakı rolundan danışmış və bildirmişdir ki, bu təşkilat xalqları və dövlətləri yaxınlaşdırır, onların əməkdaşlıq imkanlarını daha da genişləndirir. Qurumun qəbul etdiyi qərarlar üzv ölkələrin beynəlxalq məsələlərdəki mövqeyini də gücləndirməyə xidmət edir. Ona görə də Azərbaycan təşkilata üzv olan dövlətlərin inteqrasiyasına çalışır və bu mötəbər qurumun tədbirlərinə ev sahibliyi edir.

Viktor Tvirkun demişdir ki, QİƏT PM-in Baş Assambleyasının 40-cı plenar sessiyası Bakıda çox yüksək səviyyədə təşkil olunmuşdur. Biz təşkilatın fəaliyyətini gücləndirməklə quruma üzv dövlətlərin bir-biriləri ilə sıx əməkdaşlıq qurmasını istəyirik və bundan sonrakı fəaliyyətimizi də bu istiqamətdə davam etdirəcəyik.

Sonra görüşdə QİƏT çərçivəsində əməkdaşlığın perspektivləri, üzv dövlətlər arasında əlaqələrin inkişafı və qarşılıqlı maraq doğuran digər məsələlər ətrafında geniş fikir mübadiləsi aparılmışdır.

Azərbaycan.-2012.- 27 noyabr.- S.2.