QİƏT PM-in Daimi Komitəsinin 40-cı iclası

Bakıda keçirilən Qara Dəniz İqtisadi Əməkdaşlıq Təşkilatı Parlament Məclisi (QİƏT PM) Baş Assambleyasının 40-cı plenar sessiyası çərçivəsində noyabrın 26-da bu qurumun Daimi Komitəsinin 40-cı iclası olmuşdur.

QİƏT PM-in sədr müavini, Azərbaycanın bu təşkilatdakı nümayəndə heyətinin rəhbəri Asəf Hacıyev iclası açaraq iştirakçıları Milli Məclisin rəhbərliyi adından salamlamış, Daimi Komitə çərçivəsində keçirilən görüşlərin, müzakirə olunan məsələlərin və qəbul olunacaq qərarların üzv ölkələr arasında əlaqələrin inkişafına təkan verəcəyini bildirmişdir. Sonra gündəlik təsdiq edilmişdir.

Bildirilmişdir ki, Daimi Komitənin iclasında Türkdilli Ölkələrin Parlament Assambleyasının QİƏT PM-ə müşahidəçi statusu ilə qəbul edilməsi, PM-in baş katibinin, Assambleya sədrinin 2 müavininin seçilməsi, maliyyə məsələləri, Daimi Komitənin növbəti iclasının keçirilməsi və s. məsələlər müzakirə olunmuş, müvafiq qərarlar qəbul edilmişdir.

Daimi Komitə TürkPA-nın QİƏT PM-ə müşahidəçi statusunun verilməsini razılıqla qarşılamışdır.

Qurumun növbəti iclasının gələn ilin mayında Bolqarıstanda keçirilməsi qərara alınmışdır.

AzərTAc

Azərbaycan.-2012.- 27 noyabr.- S.3.