Görüşdə Azərbaycan ilə Latviya arasında iqtisadi əlaqələrin intensivləşdirilməsinin zəruriliyi vurğulanmışdır

Azərbaycan Respublikasının Baş naziri Artur Rasizadə noyabrın 28-də Latviya Respublikasının Baş naziri Valdis Dombrovskisin başçılıq etdiyi nümayəndə heyəti ilə görüşmüşdür.

Təkbətək keçən görüş daha sonra geniş heyətdə davam etmişdir. Baş nazir ölkəmizdə həyata keçirilən iqtisadi islahatların nəticələrindən, ümumi daxili məhsulun artım tempindən, infrastruktura yatırılan yerli və xarici sərmayələrdən danışmış, nəqliyyat və kommunikasiya sahələrində həyata keçirilən irimiqyaslı layihələr barədə məlumat vermişdir. Artur Rasizadə Azərbaycanın iqtisadi siyasəti haqqında danışarkən xüsusilə vurğulamışdır ki, hazırda ölkədə əsas prioritet qeyri-neft sektorunun inkişafıdır. Bu istiqamətdə həyata keçirilən islahatlar nəticəsində qeyri-neft sektoru son illərdə 10 faizdən çox artmışdır.

Latviyalı həmkarının səfərinin əhəmiyyətini vurğulayan Azərbaycanın Baş naziri keçirilən yüksək səviyyəli görüşlərin, həmçinin biznes forumun nəticələrinin uğurlu olduğundan, yeni perspektivlərə yol açılacağından əminliyini ifadə etmişdir. İqtisadi əlaqələrinin hər iki ölkənin potensialını əks etdirmədiyini diqqətə çatdıran Artur Rasizadə bu istiqamətdə fəaliyyətin intensivləşdirilməsinin vacibliyini vurğulamışdır.

Baş nazir vurğulamışdır ki, Azərbaycanın başlıca bir problemi vardır. Bu da Azərbaycan torpaqlarının işğalına və bir milyon insanın doğma yurd-yuvalarından didərgin düşməsinə səbəb olmuş Ermənistan-Azərbaycan, Dağlıq Qarabağ münaqişəsinin indiyədək həll edilməməsidir. Vurğulanmışdır ki, bu münaqişə sülh yolu ilə, yalnız Azərbaycanın ərazi bütövlüyü çərçivəsində, beynəlxalq normalar əsasında həll edilməlidir.

Latviyanın Baş naziri Valdis Dombrovskis Azərbaycan və Latviya hökumətlərinin dəstəyi ilə keçirilmiş biznes forumun nəticələri barədə məlumat vermişdir. Ticarət-iqtisadi sahədə əlaqələrin inkişafı üçün çox əlverişli imkanların olduğunu, latviyalı iş adamlarının Azərbaycana marağının getdikcə artdığını vurğulayan Baş nazir energetika, sənaye, kənd təsərrüfatı məhsullarının idxalının, mədəniyyət, turizm sahələrində qarşılıqlı əməkdaşlığın genişləndirilməsinin hər iki tərəf üçün əhəmiyyətli ola biləcəyini demişdir.

Valdis Dombrovskis keçirilmiş görüşlərin, yüksək səviyyəli səfərlərin əhəmiyyətini də qeyd etmişdir.

Görüşdə Latviya ilə Azərbaycan arasında birbaşa və tranzit aviareyslərin açılması, sənaye, rabitə, texnologiyalar sahəsində birgə layihələrin işlənib hazırlanması və qarşılıqlı maraq doğuran digər məsələlərlə bağlı fikir mübadiləsi aparılmışdır.

AzərTAc

Azərbaycan.-2012.- 29 noyabr.- S.2.