Azərbaycan, Türkiyə, Gürcüstan və Qazaxıstan arasında «Avropa, Qafqaz və Orta Asiya nəqliyyat dəhlizi Sazişi» imzalanmışdır

Azərbaycan, Türkiyə, Gürcüstan və Qazaxıstan arasında "Avropa, Qafqaz və Orta Asiya nəqliyyat dəhlizi Sazişi" imzalanmışdır.

Türkiyənin İzmir şəhərində keçirilmiş 6 ölkədən nazir, 6 ölkədən isə nazir müavini və məsul şəxslərin iştirakı ilə keçirilmiş Qara Dəniz İqtisadi Əməkdaşlıq Təşkilatına (QİƏT) üzv ölkələrin nəqliyyat nazirlərinin toplantısından sonra baş tutmuş imzalama mərasimində sazişi Türkiyənin nəqliyyat, dənizçilik və kommunikasiya naziri Binali Yıldırım, Azərbaycanın nəqliyyat naziri Ziya Məmmədov, Gürcüstanın nəqliyyat naziri Georgi Kıvınaşvili və Qazaxıstanın nəqliyyat nazirinin müavini Kairat Absattarov imzalamışlar.

Toplantıda TRACECA proqramı çərçivəsində niyyət protokolu və Türkiyə, Azərbaycan və Gürcüstan arasında Bakı-Batumi-Trabzon magistral avtomobil yolunun beynəlxalq standartlara uyğun olaraq rekonstruksiyasına dair B.Yıldırım, Z.Məmmədov və G.Kıvınaşvili əməkdaşlıq sazişi də imzalamışlar.

QİƏT ölkələrinin nəqliyyat nazirləri təşkilat çərçivəsində həyata keçirilən nəqliyyat layihələrinin perspektivlərini, yükdaşımaların son vəziyyətini və kommunikasiya sahəsində yeni layihələri də müzakirə etmişlər.

Oqtay Bayramov,

AzərTAc-ın xüsusi müxbiri

Ankara

Azərbaycan.-2012.- 29 noyabr.- S.5.