Elmar VƏLİYEV: Nizami Gəncəvinin yubiley tədbirlərində dünyanın 45 ölkəsindən 156 nümayəndənin iştirakı təqdirəlayiq hadisədir

Dahi Azərbaycan şairi Nizami Gəncəvinin yubiley tədbirlərində dünyanın 45 ölkəsindən 156 nümayəndənin iştirakı təqdirəlayiq hadisədir. Bu insanların hər biri ayrı-ayrılıqda Nizami Gəncəvinin həyat və yaradıcılığının tədqiqinə və böyük mütəfəkkirin dünya miqyasında təbliğinə öz töhfəsini vermişdir.

Bu sözləri Gəncə Şəhər İcra Hakimiyyətinin başçısı Elmar Vəliyev Nizami Gəncəvinin anadan olmasının 870 illiyi ilə bağlı yubiley tədbirlərində iştirak etmək üçün Azərbaycana gəlmiş qonaqlar və Gəncə ziyalıları ilə birlikdə dahi şairin Bakıdakı abidəsini ziyarət edərkən jurnalistlərə müsahibəsində demişdir.

Bildirilmişdir ki, Azərbaycan Prezidenti İlham Əliyevin "Dahi Azərbaycan şairi və mütəfəkkiri Nizami Gəncəvinin 870 illik yubileyinin keçirilməsi haqqında" 2011-ci il 23 dekabr tarixli sərəncamına müvafiq olaraq Gəncə Şəhər İcra Hakimiyyəti, Mədəniyyət və Turizm və Təhsil nazirlikləri, eyni zamanda, Azərbaycan Milli Elmlər Akademiyası ilə birgə tədbirlər planı hazırlanmış və bütün il boyu silsilə tədbirlər keçirilmişdir. Son tədbir, yəni yubiley tədbirləri sentyabrın 29-30-da Gəncə şəhərində reallaşmış, burada beynəlxalq konfrans keçirilmişdir.

E.Vəliyev nəzərə çatdırmışdır ki, Nizami Gəncəvi adına Beynəlxalq Mərkəzin ilk təsis yığıncağı Gəncə şəhərində keçirilmişdir. Almaniyanın, Böyük Britaniyanın, Avstriyanın və Rusiyanın kitabxanalarından Nizami Gəncəvinin əsərlərinin orijinalları respublikamıza gətirilmişdir. Bundan əlavə, məşhur İsgəndəriyyə Kitabxanasının direktoru, Misir Elmlər Akademiyasının prezidenti İsmayıl Səragəldinin köməyi ilə Nizami Gəncəvinin əsərlərinin bir neçə nüsxəsinin orijinalından bir neçə səhifə əldə etmişik. Bu istiqamətdə işlər davam etdiriləcəkdir.

Tədbirlərin yüksək səviyyədə təşkil olunmasından danışan E.Vəliyev dahi Nizamı irsinin təbliğinə yaratdığı əla şəraitə görə bütün gəncəlilər adından dövlət başçısına minnətdarlığını ifadə etmişdir. O, həmçinin Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri Mehriban Əliyevanın təşəbbüsü ilə Nizaminin əsərlərinin həm külliyyat formasında, həm ayrı-ayrılıqda artıq nəşr olunduğunu diqqətə çatdırmış, bu istiqamətdə işlərin davam etdiriləcəyini söyləmişdir.

AzərTAc

Azərbaycan.-2012.- 2 oktyabr.- S. 6.